བཀའ་ཁྲི་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་འདུག
ཉིན་འདི་འགར་བཀའ་ཁྲི་བློ་བཟང་སེང་གེ་ཨ་རིའི་རྒྱལ་ས་ཝ་ཤིང་ཊོན་དུ་འབྱོར་ཏེ། ཁུལ་དེར་ཡོད་པའི་སྐད་གྲགས་ཅན་གྱི་རྒྱང་བསྲིངས་ལས་ཁུངས་ཁག་ཅིག་གི་འགན་འཛིན་མི་སྣ་དང་མཇལ་འཕྲད་བྱས་ཡོད་འདུག
དེ་ཡང་ཟླ་འདིའི་ཕྱི་ཚེས་ ༡༧ ཉིན་བཀའ་ཁྲི་བློ་བཟང་སེང་གེས། ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་འཛམ་གླིང་གི་མང་གཙོ་དང་རང་དབང་སྲུང་སྐྱོབ་ཆེད་བཙུགས་པའི་གནས་ཚུལ་རྒྱང་བསྲིངས་ལས་ཁུངས་ཀྱི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་མེ་ཁལ་མི་ཧན་དང་། རྒྱལ་སྤྱིའི་རྒྱང་བསྲིངས་ལས་ཁུངས་ཀྱི་འགན་འཛིན་སྐུ་ཞབས་རི་ཆ་ཌི་ཨེམ་ལོ་བྷོ་གཉིས་ལ་མཇལ་འཕྲད་གནང་ཡོད་འདུག
སྐབས་དེར་འགན་འཛིན་རྣམ་གཉིས་ཀྱིས་བོད་མིའི་རང་དབང་དང་མང་གཙོའི་ལམ་ལུགས་ལ་མཐའ་གཅིག་ཏུ་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་འཆང་བཞིན་ཡོད་སྐོར་བརྗོད་པ་མ་ཟད། རྒྱལ་སྤྱིའི་གསར་འགྱུར་བརྒྱུད་ལམ་ཁག་ནང་བོད་ཀྱི་གནས་ཚུལ་རྒྱ་ཁྱབ་ཏུ་གཏོང་ཐབས་བྱ་རྒྱུའི་ཁས་ལེན་ཡང་གནང་ཡོད། གོང་བརྗོད་རྒྱང་བསྲིངས་ལས་ཁུངས་དེ་དག་གིས། བོད་སྐད་གསར་འགྱུར་བརྒྱུད་ལམ་ཨ་རིའི་བོད་སྐད་རླུང་འཕྲིན་ཁང་དང་ཨེ་ཤི་ཡ་རང་དབང་རླུང་འཕྲིན་ཁང་སོགས་ཀྱི་མཐུན་འགྱུར་གནང་བཞིན་ཡོད་པ་རེད་འདུག
མཇལ་འཕྲད་སྐབས་བཀའ་ཁྲི་དང་བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས། དབུ་སྐལ་ཚང་སྐལ་རྡོ། འཇིགས་མེད་རྣམ་རྒྱལ་བཅས་ཡོད་འདུག མཇལ་འཕྲད་གྲུབ་མཚམས་གནས་ཚུལ་རྒྱང་བསྲིངས་ལས་ཁུངས་ཀྱི་འགན་འཛིན་ལྷན་ཚོགས་ཀྱིས་གསར་འགོད་གསལ་བསྒྲགས་ཤིག་སྤེལ་བའི་ནང་། གནས་ཚུལ་རྒྱང་བསྲིངས་ལས་ཁུངས་ཀྱི་འགན་འཛིན་ལྷན་ཚོགས་ནས་བོད་ཀྱི་གནས་ཚུལ་སྐོར་རླུང་འཕྲིན་དང་བརྙན་འཕྲིན། དྲ་རྒྱ་སོགས་བརྒྱུད་ལམ་འདྲ་མིན་ཁག་ནང་ཆུ་ཚོད་ ༢༤ རིང་རྒྱང་བསྲིང་ཞུ་ཐབས་བྱེད་རྒྱུ་རྒྱུ་ཡིན་པ་རེད།།
