༧གོང་ས་མཆོག་ལ་དྭགས་སུ་ཕེབས་པ།

༧གོང་ས་མཆོག་གིས་ཀ་ཤི་མིར་ཁུལ་གྱི་མཛད་འཕྲིན་ཁག་ལེགས་པར་གྲུབ་རྗེས་ལ་དྭགས་ཀྱི་རྒྱལ་ས་སླེ་རུ་ཞབས་སོར་བདེ་བར་འཁོད་དེ། ཁུལ་དེའི་མི་མང་རྣམས་ལ་མཇལ་འཕྲད་དང་འབྲེལ་ལམ་སྟོན་བཀའ་སློབ་ཀྱང་གནང་ཡོད་འདུག

དེ་ཡང་ཟླ་འདིའི་ཕྱི་ཚེས་༡༨ ཉིན་གོང་ས་མཆོག་གིས་ཀ་ཤི་མིར་ཁུལ་གྱི་མཛད་འཕྲིན་ཁག་ལེགས་པར་གྲུབ་རྗེས་ལ་དྭགས་ཀྱི་རྒྱལ་ས་སླེའི་གནམ་ཐང་དུ་ཞབས་སོར་བདེ་བར་འཁོད་ཡོད་པ་དང་། སྐབས་དེར་ལ་དྭགས་ནང་པའི་ཆོས་ཚོགས་ཀྱི་ཚོགས་གཙོ་དང། དགོན་པའི་ཆོས་ཚོགས་ཀྱི་ཚོགས་གཙོ། ཡུལ་སྐོར་སྤྲོ་འཆམ་པའི་བློན་ཆེན་རིན་འཛིན་ཇོ་ར་མཆོག དེ་བཞིན་ལ་དྭགས་ཡར་རྒྱས་ཚོགས་པའི་འཐུས་མི་རྣམ་པ་དང་། བླ་སྤྲུལ་རྣམ་པ། ས་གནས་ཀྱི་ཆབ་སྲིད་ཚོགས་པ་ཁག་གཅིག་གི་སྐུ་ཚབ་རྣམ་པ་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད་འདུག་ལ།

༧གོང་ས་མཆོག་གིས་ལ་དྭགས་ནང་གི་འཛུགས་སྐྲུན་ཡར་རྒྱས་དང། དེ་བཞིན་ཆུ་གློག་གི་གོད་ཆག་ཕོག་པ་ཚོར་ཉམས་གསོའི་ལས་དོན་སོགས་ཀྱི་སྐོར་ལ་བཀའ་སློབ་སྩལ་ཡོད་པ་མ་ཟད། ཧི་མཱ་ལ་ཡའི་རི་རྒྱུད་ཀྱི་མི་མང་རྣམས་ལ་བོད་ཀྱི་ནང་ཆོས་མི་ཉམས་རྒྱུན་འཛིན་དང་ཉམས་པ་སླར་གསོའི་འགན་ཁུར་དམིགས་བསལ་ཡོད་སྐོར་གྱི་བཀའ་སློབ་གནང་ཡོད་པ་རེད།

ཐེངས་འདིར་༧གོང་ས་མཆོག་ལ་དྭགས་སུ་གདན་ཞུ་གནང་མཁན་གཙོ་བོ་ལ་དྭགས་ས་གནས་ནང་པའི་ཆོས་ཚོགས་དང་དགོན་པའི་ཆོས་ཚོགས་གཉིས་ཡིན་འདུག