རྒྱ་གར་ཀར་ན་ཊ་ཀ་རུ་བདེན་པའི་མེ་ལྕེ་སྐོར་བསྐྱོད།
ཕྱི་ཟླ་ ༧ ཚེས་ ༡༨ ཉིན་ལྷོ་ཕྱོགས་ཁུལ་གྱི་བདེན་པའི་མེ་ལྕེ་སྐོར་བསྐྱོད་དེ་ཏ་མིལ་ན་ཊུ་མངའ་སྡེའི་གྲོང་ཁྱེར་ཅེ་ན་ཡི་ ཁུལ་གྱི་རྒྱ་མཚོའི་ཉེ་འགྲམ་དུ་ཡོད་པའི་མེས་པོ་དམ་གྷན་རྡིའི་སྐུ་བརྙན་མདུན་སྐོར་བསྐྱོད་མཇུག་བསྡུས་ཡོད་པ་རེད།
སྐབས་དེར་ཅེ་ན་ཡི་བོད་རིགས་སློབ་ཕྲུག་ཚོགས་པའི་རྒྱུན་ལས་དང་། ལྕམ་ ཨ་ཤ་ར་ཌི་སོགས་ཕེབས་ཡོད་པ་རེད། དེ་རྗེས་དེ་རིང་ཕྱི་ཚེས་ ༡༩ དགོང་དྲོ་བོད་རིགས་སློབ་ཕྲུག་ཚོགས་པའི་སྐུ་ཚབ་གཉིས་ཀྱི་འགན་འཁུར་འོག་བདེན་པའི་མེ་ལྕེ་སྐོར་བསྐྱོད་དེ་བཞིན་རྒྱ་གར་ལྷོ་ཕྱོགས་ཀར་ན་ཊ་ཀ་ མངའ་སྡེའི་ནང་རྟེན་གཞིས་བྱས་པའི་སྦེལ་ཀོབ་བོད་མིའི་གཞིས་ཆགས་སུ་བསྐྱོད་དེ། ཕྱི་ཚེས་ ༢༠ ཞོགས་པ་བདེན་པའི་མེ་ལྕེ་སྦེལ་ཀོབ་བོད་མིའི་གཞིས་ཆགས་སུ་འབྱོར་རྒྱུ་དང་དེ་ནས་ཁུལ་དེར་ཉིན་ཤས་རིང་སྐོར་བསྐྱོད་དང་བོད་དོན་ས་རྟགས་བསྡུ་འགོད་སོགས་གནང་རྒྱུ་ཡིན་པ་རེད།
བདེན་པའི་མེ་ལྕེ་སྐོར་བསྐྱོད་ལས་འགུལ་འདིའི་དགོས་འདུན་དོན་ཚན་གསུམ་ནི།
༡༽ ཕྱི་ལོ་ ༡༩༥༩ དང་། ༡༩༦༡། ༡༩༦༥ བཅས་སོ་སོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་བོད་དོན་ཐོག་བཞག་པའི་གྲོས་ཆོད་ཁག་སླར་ཡང་རྒྱལ་ཚོགས་ནས་གླེང་སློང་དང་ལག་བསྟར་མཇུག་གནོན་དགོས་པ།
༢༽ བོད་ནང་ད་ལྟའི་ཛ་དྲག་གི་གནས་སྟངས་རྟོག་ཞིབ་སླད་རང་དབང་ཅན་གྱི་རྒྱལ་སྤྱིའི་སྐུ་ཚབ་ཁག་ཅིག་འཕྲལ་གཏོང་དགོས་པ།
༣༽ བོད་ནང་གི་བོད་མིའི་མངོན་འདོད་བསྒྲུབ་རྒྱུར་མཉམ་འབྲེལ་རྒྱལ་ཚོགས་ཀྱིས་དམིགས་བསལ་འགན་འཁུར་བཞེས་དགོས་པ།
