བོད་ཀྱི་བདེན་པའི་མེ་ལྕེ་སྦེལ་ཀོབ་ཏུ་འབྱོར་བྱུང་།

ཟླ་འདིའི་ཚེས་ ༢༠ ཉིན་རྒྱ་གར་ལྷོ་ཕྱོགས་ཀྱི་བདེན་པའི་མེ་ལྕེ་སྐོར་བསྐྱོད་དེ་བཞིན་མཻ་སོར་ཁུལ་སྦེལ་ཀོབ་བོད་མིའི་གཞིས་ཆགས་སུ་འབྱོར། དེར་ས་གནས་མི་མང་ལས་འགུལ་ནང་མཉམ་ཞུགས་བྱས་ཡོད་པ་རེད།

དེ་ཡང་ཞོགས་པའི་ཆུ་ཚོད་ ༡༠ པའི་ཐོག་སྦེལ་ཀོབ་བོད་མིའི་ས་ཁུལ་སྒོ་ཆེན་ཨ་མ་ནས་ཕྱོགས་བཞུགས་སྤྱི་འཐུས་འཇིགས་མེད་འབྱུང་གནས་དང་། སྤྱི་འཐུས་བློ་བཟང་ཡེ་ཤེས་གཉིས་ཀྱི་གཙོས་པའི་གཞིས་ཆགས་ཁག་གཉིས་ཀྱི་ས་གནས་འགོ་འཛིན་དང་། ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་། ལྷོ་ཕྱོགས་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་སོགས་མཉམ་ཞུགས་ཐོག ས་གནས་གཞིས་གྲོང་ཁག་གི་བོད་མི་གཞོན་སྐྱེས་རེ་ནས་སྦག་སྦག་གིས་བསུ་མ་བྱས་དེ་གཞིས་སྤྱི་རྒྱལ་བའི་ཕོ་བྲང་དུ་འབྱོར་བ་དང་། དེར་ཡོད་སེར་སྐྱ་མི་མང་གིས་བོད་གྱི་རྒྱལ་དར་ཕྱར་ཞིང་བོད་རང་བཙན་དང་། བོད་རྒྱལ་ལོ་ཞེས་པའི་འབོད་སྒྲ་སྒྲོག་བཞིན་དགའ་བསུའི་སྣེ་ལེན་བྱས་སོང་། དེ་རྗེས་ཆོས་རིག་བཀའ་བློན་ཟུར་པ་ཚེ་རིང་ཕུན་ཚོགས་དང་། ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ཀྱིས་གཙོས་པའི་འབྲེལ་ཡོད་དབུ་ཁྲིད་རྣམས་དང་སེར་སྐྱ་མི་མང་མཉམ་འཛོམས་ཐོག་འཕགས་བོད་རྒྱལ་ཁབ་གཉིས་ཀྱི་རྒྱལ་གླུ་བླངས་པ་དང་། ལུགས་བསམ་ས་གནས་འགོ་འཛིན་གྱིས་ལས་འགུལ་ངོ་སྤྲོད་བྱས།

སྤྱི་འཐུས་འཇིགས་མེད་འབྱུང་གནས་དང་རྒྱ་གར་ལྷོ་ཕྱོགས་བོད་དོན་རྒྱབ་སྐྱོར་ཚོགས་ཚོགས་པའི་ཚོགས་གཙོ་ J.P Urs གཉིས་ཀྱིས་ལས་འགུལ་དང་འབྲེལ་བའི་གཏམ་བཤད་སྤེལ་རྗེས་ས་གནས་སུ་ཉིན་དང་པོ་སྐོར་བསྐྱོད་མཛད་སྒོ་གྲོལ་ཡོད་པ་རེད།

འབྲེལ་ཡོད་ནས་ངོ་སྤྲོད་བྱས་པ་ལྟར་ན། སྦེལ་ཀོབ་ས་གནས་སུ་བོད་དང་རྒྱ་གར་ཧིན་བོད་མཛའ་འབྲེལ་ཚོགས་པ་ཟུང་འབྲེལ་གྱིས་ཉིན་བརྒྱད་ཀྱི་རིང་ལ་སྦེལ་ཀོབ་ལུགས་ཟུང་བསམ་འགྲུབ་གླིང་དང་། བདེ་སྐྱིད་སླར་གསོ་སྟེ་བོད་མི་གཞིས་ཆག་ཁག་གཉིས་ཀྱི་གཞིས་གྲོང་ཁག་གིས་གཙོས་པའི་འབྲེལ་ཡོད་ས་གནས་ཡུལ་མིའི་ས་ཁུལ་མ་ཌི་ཀ་རི་ས་གནས་རྫོང་དང་། པིར་ཡ་པད་ཎ། ཀུ་ཤལ་ན་གྷར་སོགས་སུ་ཡང་སྐོར་བསྐྱོད་ཀྱིས་བོད་དོན་དྲིལ་བསྒྲགས་དང་འབྲེལ་བའི་མིང་རྟགས་བསྡུ་རུབ་བྱེད་རྒྱུ་ཡིན་པ་རེད་འདུག །

མེ་སོར་གསར་འགོད་པས།