བདེན་པའི་མེ་ལྕེའི་ལས་འགུལ་ཌ་ཧོར་དུ་འབྱོར་འདུག

ཟླ་འདིའི་ཚེས་ ༡༩ ཉིན་ཀ་ཤི་མིར་མངའ་སྡེའི་ནང་བདེན་པའི་མེ་ལྕེ་བསྐོར་བསྐྱོད་ཀྱི་ལས་འགུལ་གྲུབ་སྟེ། Pathankot  དུ་འབྱོར་སྐབས། དེར་ཌལ་ཧོར་གཞོན་སྐྱེས་མི་གྲངས་ ༢༢ ནས་རྩིས་ལེན་གྱིས་ཟླ་ཚེས་༢༠ སྔ་དྲོའི་ཚོུད་ ༡༡ ཐོག་ཌལ་ཧོར་དུ་ཁྲོམ་སྐོར་ལས་འགུལ་འགོ་འཛུགས་བྱས་ཡོད་པ་རེད།

དེར་ཌལ་ཧོར་བོད་མིའི་ས་གནས་འགོ་འཛིན་དང༌། ས་གནས་འཐུས་ཚོགས་ཚོགས་གཙོ། ས་གནས་རང་དབང་བདེན་པའི་ལས་འགུལ་ཚོགས་གཙོ་དང་། མི་མང་བཅས་འདུ་འཛོམས་ཐོག མཛད་སྒོའི་སྐུ་མགྲོན་གཙོ་བོ་ས་གནས་ཧིན་བོད་མཛའ་གྲོགས་ཚོགས་པའི་ཚོགས་གཙོ་ Dr. G.S. Dhillon མཆོག་ནས་བདེན་པའི་མེ་ལྕེ་རྩིས་ལེན་དང༌། སྣང་གསལ་མཆོད་མེ་ཞལ་ཕྱེས་གནང༌། དེ་ནས་སློབ་གྲྭའི་རོལ་དབྱངས་དང་བཅས་འཕགས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་རྗེས། བོད་དོན་ཆེད་རང་ལུས་མེར་སྲེག་གནང་མཁན་དཔའ་བོ་དཔའ་མོ་རྣམས་ཀྱི་ཆེད་མྱ་ངན་ངག་བཅད་སྐར་མ་གཅིག་ཞུས། དེ་ནས་ས་གནས་འགོ་འཛིན་གྱིས་ལས་འགུལ་ངོ་སྤྲོད་མདོར་བསྡུས་དང༌། སྐུ་མགྲོན་གཙོ་བོས་ལས་འགུལ་དང་འབྲེལ་བའི་གསུང་བཤད་གནང་། སྐུ་མགྲོན་གཙོ་བོ་མཆོག་ནས་བདེན་པའི་མེ་ལྕེའི་མཚན་རྟགས་བསྡུ་རུབ་ལས་འགུལ་རྒྱབ་བསྐྱོར་ཆེད་རང་ཉིད་ཀྱི་མཚན་རྟགས་བཀོད་དེ་མཚན་རྟགས་བསྡུ་རུབ་ཀྱི་ལས་འགུལ་འགོ་བཙུགས་པ་དང་། དེ་ནས་མི་མང་རྣམས་ Gandhi Chowk  ས་གནས་ནས་ Subhash Chowk བར་བདེན་པའི་མེ་ལྕེ་ཁྲོམ་བསྐོར་དང༌། མཚན་རྟགས་བསྡུ་རུབ་ཞུས། མཚན་རྟགས་བསྡུ་རུབ་ཀྱི་ལས་འགུལ་འདི་བཞིན་ཉིན་གསུམ་རིང་གནང་རྒྱུ་དང༌། ཟླ་ཚེས་ ༢༤ ཉིན་ས་གནས་ཀྱི་བདེན་པའི་མེ་ལྕེ་ལས་འགུལ་མཇུམ་བསྒྲིལ་ཏེ་རྡ་རམ་ས་ལར་རྩིས་འབུལ་ཞུ་རྒྱུ་ཡིན་པ་རེད།།