ནང་ཆོས་ངོ་སྤྲོད་དང་བདེ་ཆེན་ཞིང་སྒྲུབ།
ཟླ་འདིའི་ ༡༩ ནས་ ༢༣ བར་ཉིན་གསུམ་རིང་རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་གི་གཞིས་གྲོང་གཉིས་པའི་གོ་སྒྲིག་འོག མཁན་པོ་ཀར་བསྟན་ལགས་ཆེད་དུ་ཕེབས་ནས་ནང་ཆོས་ངོ་སྤྲོད་དང་བདེ་ཆེན་ཞིང་སྒྲུབ་ཆེན་མོ་བཅས་རིམ་པའི་ས་གནས་དེ་གའི་འདུ་ཁང་གསར་བའི་ནང་འཚོགས་ཡོད་པ་དང་།
དེ་ཡང་ཕྱི་ཚེས་ ༡༩ ཉིན་ཀོ་ལི་གྷལ་ས་གནས་ཀྱི་གཞིས་གྲོང་ཁག་ ༢༢ ནས་མི་མང་ ༣༠༠ ལྷག་མཉམ་འཛོམས་ཐོག མཁན་པོ་ཀར་བསྟན་ལགས་ཀྱིས་མི་མང་ལ་མི་དགེ་བཅུ་སྤོང་གི་སྡོམས་ཁྲིམས་གཏོང་ལེན་དང་ལས་རྒྱུ་འབྲས་སོགས་ཀྱི་སྐོར་ལ་ནང་ཆོས་ངོ་སྤྲོད་གནང་སོང་ལ། ཚེས་ ༢༠ ཉིན་ནས་མི་མང་ལ་བདེ་ཆེན་ཞིང་སྒྲུབ་ཆེན་པོའི་སྒོ་ནས་གསུང་ཆོས་དང་སྨྱུང་གནས་སོགས་ཉིན་གསུམ་རིང་གནང་གྲུབ་པ་དང་། ཉིན་དེར་བོད་བསྟན་སྲིད་མི་རིགས་དང་བཅས་ཀྱི་ཆེད་དུ་སྐུ་ལུས་ཞུགས་འབུལ་གནང་མཁན་འདས་པོ་རྣམས་ཀྱི་དགོངས་རྫོགས་དང་། པཎ་ཆེན་ཆུང་སྲིད་རིན་པོ་ཆེའི་གཙོས་བཙོན་ཁང་ནང་དུ་མནར་གཅོད་མྱངས་དང་མྱོང་བཞིན་པ་དག་གི་ཞབས་བརྟན་དང་། ཁོང་རྣམ་པའི་ཤུལ་ལུས་ནང་མི་གཉེན་ཉེ་ཡོངས་ལ་གདུང་སེམས་མཉམ་བསྐྱེད་མཚོན་ཆེད་བཅས་སུ་མར་མེ་སྟོང་མཆོད་ལྔ་དང་བདེ་ཆེན་ཞིང་སྒྲུབ་ཀྱི་ཆོ་གའི་སྒོ་ནས་བསྔོ་བ་དང་སྨོན་ལམ་ཟབ་རྒྱས་ཤིག་ཀྱང་འཚོགས་སོང་།
མོན་གྷོ་གསར་འགོད་པས། རྒྱ་གར་ལྷོ་ཕྱོགས་ཀོ་ལི་གྷལ་ས་གནས་ནས།
