བྱང་ཤར་ཁུལ་གྱི་བདེན་པའི་མེ་ལྕེའི་ལས་འགུལ།
ཟླ་འདིའི་ཚེས་༢༦ ཉིན་བོད་མི་མང་སྤྱི་འཐུས་ལྷན་ཚོགས་ནས་སྣེ་ཁྲིད་པའི་རྒྱ་གར་བྱང་ཤར་ཁུལ་གྱི་བོད་ཀྱི་བདེན་པའི་མེ་ལྕེའི་ལས་འགུལ་མུ་མཐུད་སྤེལ་བཞིན་ཡོད་པ་རེད།
ཟླ་འདིའི་ཚེས་ ༢༡ ཉིན་རྒྱ་གར་བྱང་ཤར་བསྟན་སྒང་གཞིས་སྒར་ནས་རྒྱང་ཐག་ཀི་ལོ་མི་ཊ་ ༡༨ ཡོད་པའི་གྲོང་འཁྱེར་ཁ་ལག་ཐང་ས་གནས་སུ་དགོང་དྲོ་ཆུ་ཚོད་ ༥།༣༠ ནས་འགོ་འཛུགས་ཀྱིས། ས་གནས་ཡུལ་མིའི་འགོ་ཁྲིད་དང་སློབ་ཕྲུག་མི་མང་རྣམས་མཉམ་འཛོམས་ཐོག ས་གནས་འགོ་འཛིན་གྱིས་བདེན་པའི་མེ་ལྕེ་སྐོར་གྱི་སྐོར་འགྲེལ་བརྗོད་དང་སྦྲགས། མི་གྲངས་ ༣༥༠ ལྷག་ཙམ་ནས་ཁུལ་འདིའི་ས་གནས་སུ་ཁྲོམ་སྐོར་བྱས་ཡོད་པ་རེད། ས་གནས་འགོ་འཛིན་གྱིས་རྒྱ་གར་ཡུལ་མིས་རྒྱབ་སྐྱོར་བྱས་ཏེ། ལས་འགུལ་ནང་མཉམ་ཞུགས་བྱས་པར་ཐུགས་རྗེ་ཆེ་ཞུས་ཡོད་པ་རེད།
ཟླ་ ༧ ཚེས་ ༢༢ ཉིན་བསྟན་འཛིན་སྒང་གཞིས་སྒར་ནས་རྒྱང་ཐག་ཀི་ལོ་མི་ཊར་ ༢༠ ཙམ་ཡོད་པའི་གྲོང་འཁྱེར་ཤེར་སྒང་དུ། འབྲེལ་ཡོད་ལས་ཁུངས་ནས་ཆོག་མཆན་ཐོབ་པ་ཡུལ་མི་མང་པོ་ལས་འགུལ་ནང་མཉམ་ཞུགས་ཀྱིས་ཁྲོམ་སྐོར་ལས་འགུལ་སྤེལ་ཡོད་པ་རེད།
ཟླ་ ༧ ཚེས་ ༢༣ ཉིན་བསྟན་སྒང་གཞིས་སྒར་ནང་ཆོས་འཁོར་དུས་ཆེན་དང་སྟབས་བསྟུན་སྟེ། ལས་འགུལ་སྤེལ་བ་དང་། ལྷག་པར་དུ་བོད་དོན་ཆེད་སྐུ་ལུས་མཆོད་མེ་འབུལ་མཁན་དཔའ་བོ་དཔའ་མོ་རྣམས་ཀྱི་ཆེད་དུ། ཉིན་རྒྱབ་སྨོན་ལམ་མཆོད་འབུལ་ཞུས་པ་སོགས་ཀྱི་ལས་འགུལ་སྤེལ་འདུག
ཟླ་ ༧ ཚེས་ ༢༤ ཉིན་བསྟན་སྒང་གཞིས་སྒར་ནས་རྒྱང་ཐག་ཀི་ལོ་མི་ཊ་ ༦༠ ཙམ་ཡོད་པའི་གྲོང་འཁྱེར་ཆེ་གྲས་རུ་པ་ས་གནས་སུ་ཁྲོམ་ཁྲོམ་སྐོར་ལས་འགུལ་སྤེལ། དེ་ནས་ས་གནས་འགོ་འཛིན་དང་གཞིས་མི་དྭང་བླང་བ་རྣམས་དགོང་དྲོ་འབུམ་སྡེ་ལ་རུ་བདེ་འཁོད་བྱུང་ནས། མུ་མཐུད་ལས་འགུལ་སྤེལ་ཡོད་པ་རེད།
ལས་འགུལ་འདིར་ཉིན་གྲངས་ ༤ ཙམ་རིང་ལས་གཞི་ལག་བསྟར་གང་ལེགས་ཞུ་ཐུབ་པ་བྱུང་བ་མ་ཟད། ཡུལ་མི་འགོ་འཁྲིད་དང་མི་མང་ངོས་ནས་རྒྱབ་སྐྱོར་མཚོན་ཆེད། ལས་འགུལ་ལ་མཉམ་བཞུགས་གནང་བ་དང་། ཆོས་དང་རིག་གཞུང་གཅིག་པའི་མི་རིགས་ཡིན་པར་བརྟེན་དམིགས་བསལ་དོ་སྣང་རྒྱབ་བསྐྱོར་གནང་ཡོད་པ་རེད།།
