བདེན་པའི་མེ་ལྕེ་དེ་དྷ་སའི་ཉེ་སྐོར་གྱི་ས་གནས་ཁག་ཏུ་སྐོར་བསྐྱོད།
བྱང་ཕྱོགས་སུ་སྐོར་བསྐྱོད་བྱེད་བཞིན་པའི་བདེན་པའི་མེ་ལྕེ་དེ་དྷ་སའི་ཉེ་སྐོར་དྷ་ཤོད་བོད་ཁྱིམ་སློབ་གྲྭ་དང་། ཤེས་རབ་དགའ་ཚལ་སློབ་གླིང་། འཆི་མེད་དགའ་ཚལ་གླིང་། སྙིང་སྟོབས་གླིང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་བཅས་སུ་སྐོར་བསྐྱོད་བྱེད་བཞིན་ཡོད་པ་རེད།
ཟླ་འདིའི་ཚེས་༢༩ ཉིན་བྱང་ཕྱོགས་སུ་སྐོར་བསྐྱོད་བྱེད་བཞིན་པའི་བདེན་པའི་མེ་ལྕེ་དེ་དྷ་ཤོད་བོད་ཁྱིམ་སློབ་གྲྭ་ནས་གསོག་སྒར་སློབ་གྲྭ་རྩིས་སྤྲོད་ལེན་བྱས་པ་དང་། དྷ་ས་ས་གནས་འགོ་འཛིན་གྱིས་གསོག་སྒར་དགེ་སློབ་༤༠༠ ལྷག་ཙམ་ལ་བདེན་པའི་མེ་ལྕེ་སྐོར་བསྐྱོད་ཀྱི་དགོས་དམིགས་དང་འབྲེལ་བའི་སྐོར་ལ་གསུང་བཤད་གནང་བ་དང་། དགེ་སློབ་རྣམས་ཀྱི་ས་རྟགས་བསྡུ་ལེན་གནང་རྗེས་ནོར་གླིང་ས་གནས་བོད་རིགས་སྤྱི་འཐུན་ཚོགས་པར་རྩིས་སྤྲོད་བྱས་སོང་། 
ནོར་གླིང་བོད་རིགས་སྤྱི་འཐུན་ཚོགས་པས་སྦག་སྦག་༤༠ ལྷག་གིས་བདེན་པའི་མེ་ལྕེ་བསུ་བ་བྱས་ཏེ་གསོག་སྒར་ནས་དྷ་ཤོད་བརྒྱུད་འཆི་མེད་དགའ་ཚལ་གླིང་དུ་གདན་འདྲེན་བྱས་སོང་ལ། འཆི་མེད་དགའ་ཚལ་གླིང་དུ་ས་གནས་བོད་རིགས་རྣམས་ཀྱིས་བདེན་པའི་མེ་ལྕེ་བསུ་བ་ཞུ་བའི་མཛད་སྒོའི་ཐོག དྷ་ས་ས་གནས་འགོ་འཛིན་དང་། ནོར་གླིང་ས་གནས་བོད་རིགས་སྤྱི་འཐུས་ཚོགས་པའི་ཚོགས་གཙོ། འཆི་མེད་དགའ་ཚལ་གླིང་གི་དགེ་སྐོས་བཅས་ཀྱིས་བདེན་པའི་མེ་ལྕེ་དང་འབྲེལ་བའི་སྐོར་ལ་གསུང་བཤད་གནང་བ་དང་། ནོར་གླིང་བྱིས་བཅོལ་ཁང་གི་སློབ་མ་རྣམས་ཀྱིས་མི་མང་ལངས་གླུ་གཏོང་རྗེས་མཛད་སྒོ་གྲོལ་སོང་།
དེ་ནས་བདེན་པའི་མེ་ལྕེ་དེ་སྙིང་སྟོབས་གླིང་དུ་སྐོར་བསྐྱོད་གྲུབ་རྗེས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་ཁྱེར་ཡོད་པ་དང་། དེར་མཛད་སྒོ་སྟབས་བདེ་ཞིག་གནང་རྗེས་བདེན་པའི་མེ་ལྕེ་དེ་ས་གནས་དེར་བཅོལ་འཇོག་བྱས་ཡོད་པ་རེད།
དགོང་མོ་དེར་ནོར་གླིང་ས་གནས་བོད་རིགས་སྤྱི་འཐུས་ཚོགས་པའི་གོ་སྒྲིག་འོག་བདེན་པའི་མེ་ལྕེ་ཁྱེར་ནས་མར་མེའི་ཁྲོམ་སྐོར་གཞི་རྒྱ་ཆེ་བ་ཞིག་གནང་སོང་།།
