སྐར་ཁུང་དྲ་བ་སྒོ་འབྱེད།

དྲ་རྒྱ་བཀོལ་སྤྱོད་མང་དུ་འགྲོ་བཞིན་པའི་སྐབས་འདིར་བོད་མི་ཁག་ཅིག་གིས་སྐར་ཁུང་དྲ་རྒྱ་www.karkhung.comཞེས་པ་ཞིག་གསར་དུ་བཟོས་འདུག

དེ་ཡང་སྐར་ཁུང་སྒྲིག་པས་བཏང་གནས་ལྟར་ན། སྐར་ཁུང་དྲ་བ་འདི།  ཡིག་སྒྱུར་ལ་སྤྲོ་སྣང་དང་ཉམས་མྱོང་། ཡིག་སྒྱུར་གྱི་ལམ་ནས་བོད་པའི་སྤྱི་ཚོགས་ལ་ཞབས་འདེགས་ཕྲ་མོ་ཙམ་སྒྲུབ་འདོད་པའི། བོད་རིགས་ཡིག་སྒྱུར་བ་སྐོར་ཅིག་དང་མཉམ་རུབ་བྱས་ཏེ། གསར་བཟོ་བྱས་པ་ཡིན་འདུག

སྐར་ཁུང་དྲ་བའི་གསལ་བསྒྲགས་ནང་འཁོད་དོན། “དམིགས་ཡུལ་ནི། བོད་ཡིག་གི་བརྗོད་བྱའི་ཁྱབ་ཁོངས་ཆེ་རུ་གཏོང་བ་དང་བོད་ཡིག་གི་བཀོལ་སྤྱོད་མ་ལག་ཇེ་འཐུས་སུ་གཏོང་བ། ཕྱིའི་རིག་གནས་ནང་འདྲེན་བྱེད་པ། བོད་ཡིག་ནང་རྩོམ་བྲིས་སྤེལ་མཁན་རྣམས་ལ་ཆེ་མཐོང་བསྐྲུན་པ་བཅས་ཡིན་ཞིང་། དམིགས་ཡུལ་འདི་དག་འགྲུབ་པ་ལ། ང་ཚོས་དབྱིན་ཡིག་དང་རྒྱ་ཡིག་ནང་ཡོད་པའི་ལེགས་རྩོམ་རིགས་བོད་བསྒྱུར་བྱེད་བཞིན་ཡོད། དེའི་ཞོར་ནས། ང་ཚོས་འཛམ་གླིང་ཤར་ནུབ་ཀྱི་བོད་རིགས་ཤེས་ལྡན་པ་ཚོར་དྲི་བ་གསུམ་ཅན་གྱི་བཅར་འདྲི་རེ་བྱེད་རྒྱུ་དང་བོད་ཡིག་ནང་བྲིས་བའི་ལེགས་རྩོམ་རིགས་ལ་མ་འོངས་པར་རྩོམ་ཡོན་ཕུལ་རྒྱུ་བཅས་ཡིན། འོན་ཀྱང་། དམིགས་ཡུལ་སྔ་མ་དག་གཙོ་བོ་དང་ཕྱི་མ་གཉིས་ཕལ་བ་ཡིན་”ཞེས་འཁོད་འདུག

གསལ་བསྒྲགས་དེའི་ནང་མུ་མཐུད་འཁོད་དོན། “ང་ཚོར་དབྱིན་ཡིག་ནས་བསྒྱུར་མཁན་དྲུག་དང་རྒྱ་ཡིག་ནས་བསྒྱུར་མཁན་བཞི་ཡོད་།  ད་དུང་། བོད་རིགས་གཞན་གྱིས་བསྒྱུར་པའི་ལེགས་རྩོམ་དེ་འདྲ་ང་ཚོར་བཏང་ཚེ་དེ་ལ་ཡང་དགའ་བསུ་ཞུ་བཞིན་ཡོད། སྐར་ཁུང་དུ་ཐོན་པའི་རྩོམ་རྣམས་ལ་མཆན་བུ་བཏབ་ལོས་ཆོག་ཀྱང་དངོས་མིང་བེད་སྤྱོད་གཏོང་མཁན་ཚོར་མ་གཏོགས་མཆན་བུའི་གོ་སྐབས་མེད་། ལྷག་པར་དུ་། རང་གིས་གཏམ་ཡག་པོ་ཞིག་བཤད་པ་ལ་གཞན་གྱི་གཏམ་ལ་ཡག་པོ་ཉན་དགོས་པ་ལྟར། སྐར་ཁུང་ནི་ཆེད་དུ་གཞན་གྱི་གཏམ་ལ་ཉན་ས་དང་གཞན་གྱི་ཚིག་ལ་བལྟ་སའི་དྲ་བ་ཞིག་ཡིན་”ཞེས་འཁོད་འདུག །