བཀའ་ཁྲི་དང་ཀར་ན་ཊ་ཀ་མངའ་སྡེའི་བློན་ཆེན་མཇལ་འཕྲད།

བཀའ་བློན་ཁྲི་པ་བློ་བཟང་སེང་གེས་དེང་སྐབས་རྒྱ་གར་ལྷོ་ཕྱོགས་མེ་སོར་ཁུལ་དང་། མོན་གྷོ་སོགས་སུ་གཟིགས་སྐོར་གནང་ཟིན་པ་དང་། ཟླ་འདིའི་ཚེས་༤ ཉིན་རྒྱ་གར་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་དང་མཇལ་འཕྲད་གནང་འདུག

དེ་ཡང་ཟླ་འདིའི་ཚེས་༤ ཕྱེད་ཡོལ་ཆུ་ཚོད་ ༢།༣༠ ཐོག་བཀའ་ཁྲི་བློ་བཟང་སེང་གེས་རྒྱ་གར་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཇཱ་ག་ ཌི་ཤི་ཤེ་ཊར་དང་ཆུ་ཚོད་ཕྱེད་ཀ་ལྷག་ཙམ་རིང་མཇལ་འཕྲད་གནང་བ་དང་། སྐབས་དེར་བཀའ་ཁྲིས་ཀར་ན་ཊ་ཀ་མངའ་སྡེའི་གཞུང་མང་གཉིས་ཀྱིས་ད་བར་བོད་མི་བཙན་བྱོལ་བ་རྣམས་ལ་གང་ཅིའི་ཐད་ནས་མཐུན་འགྱུར་རོགས་རམ་ཧ་ཅང་ཡག་པོ་གནང་བར་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་བཀའ་དྲིན་རྗེས་དྲན་ཞུས་པ་མ་ཟད། དེ་སྔོན་གྱི་མངའ་སྡེའི་བློན་ཆེན་སྐབས་མོན་གྷོ་དང་ཀོ་ལེ་གྷལ། སྦེལ་ཀོབ་བཅས་བོད་མིའི་གཞིས་ཆགས་ཁག་གི་ནང་མངའ་སྡེའི་གཞུང་གིས་ལམ་ཁ་བཟོ་ཆེད་རོགས་དངུལ་གནང་རྒྱུའི་ཁས་ལེན་གནང་བ་ལྟར། ཧུན་སུར་བོད་མིའི་གཞིས་ཆགས་སུའང་དེ་མཚུངས་ལམ་བཟོའི་ཆེད་རོགས་དངུལ་གནང་རོགས་ཞེས་འབོད་སྐུལ་ཞུས་ཡོད་པ་རེད།
ཕྱོགས་མཚུངས་བཀའ་ཁྲིས་ས་ཁང་བདག་དབང་ལག་འཁྱེར་ (Revenue Transfer Certificate) དེ་བཞིན་བོད་མིའི་གཞིས་ཆགས་ལྔ་ལ་ཁྲིམས་མཐུན་གཅིག་མཚུངས་སུ་གནང་རོགས་ཞེས་འབོད་སྐུལ་ཡང་ཞེས་ཡོད་པ་རེད།

གཞན་ ཡང་སྐབས་དེར་བཀའ་ཁྲི་མཆོག་གིས་ཧི་མཱ་ཅལ་མངའ་གཞུང་གིས་ཁུལ་དེར་བོད་མི་གཉིས་ ལ་སྨན་པའི་སློབ་སྦྱོང་ཆེད་མེམ་བྷི་བྷི་ཨེ་སིའི་ (MBBS) ཟུར་བཅད་ཞབས་སྟེགས་གཉིས་ཀྱི་མཐུན་འགྱུར་གནང་བ་ལྟར། ཀར་ན་ཊ་མངའ་སྡེའི་ནང་བཙན་བྱོལ་བོད་མི་བརྒྱ་ཆ་སུམ་ཅུ་ཙམ་གནས་བཞིན་ཡོད་པར་ བརྟེན། བོད་མི་གཉིས་ལ་སྨན་པའི་ཞབས་སྟེགས་ཟུར་བཅད་གནང་རོགས་ཞེས་སྐྱབས་འཇུག་ཞུས་ཡོད། གཞན་ཡང་བཀའ་ཁྲི་མཆོག་གིས་བློན་ཆེན་མཆོག་ལ་གཞིས་ཆགས་ཁག་གི་གློག་གི་མཐུན་ རྐྱེན་ཡར་རྒྱས་གཏོང་ཆེད་འབོད་སྐུལ་ཞུས་པ་ལྟར། བློན་ཆེན་མཆོག་གིས་འཆར་གཞི་མངའ་གཞུང་ལ་འབུལ་དགོས་པའི་བཀའ་གནང་བ་དང་སྦྲགས། འཆར་གཞི་འབྱོར་འཕྲལ་མངའ་གཞུང་གིས་དགོངས་བཞེས་གནང་རྒྱུ་ཡིན་སྐོར་གསུངས་ཡོད། དབུ་ཁྲི་རྣམ་གཉིས་མཇལ་འཕྲད་སྐབས་བཀའ་ཁྲི་མཆོག་གིས་མངའ་སྡེའི་བློན་ཆེན་མཆོག་ ལ་སངས་རྒྱས་སྨན་བླའི་ཞལ་ཐང་ཞིག་ཕྱག་རྟགས་སུ་ཕུལ་ཡོད་པ་བཅས།།