བཀའ་ཁྲིས་རྒྱ་གར་ལྷོ་ཕྱོགས་མོན་གྷོ་རུ་གཟིགས་སྐོར།

ཟླ་འདིའི་ཚེས་༢ ནས་ཉིན་གཉིས་ཀྱི་རིང་བཀའ་བློན་ཁྲི་པ་མཁས་དབང་བློ་བཟང་སེངྒེ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་གཞུང་འབྲེལ་འཚམས་འདྲི་གཟིགས་སྐོར་དུ་ཆེད་ཕེབས་ཏེ། ཉིན་གཉིས་རིང་འཚམས་གཟིགས་གནང་ཡོད་པ་རེད།

དེ་ཡང་ཕྱི་ཚེས་༢ ཉིན་གྱི་ཞོགས་པ་ཆུ་ཚོད་༨ ༣༠་ཕྱེད་ཐོག་འདི་ག་ས་གནས་གཞི་ལས་ཁང་གི་འགོ་འཛིན་བསོད་ནམ་བསྟན་འཛིན་དང་ཕྱོགས་བཞུགས་སྤྱི་འཐུས་ཨ་དཀྲུག་ཚེ་བརྟན་གཉིས་ཀྱི་གཙོས་གཞུང་དང་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་དང་གདན་ས་ཆེན་པོ་དགའ་འབྲས་གཉིས་ཀྱི་གཙོས་གྲྭ་ཚང་ཁག་བཅས་རྒྱ་གར་རྒྱལ་ས་ཧུབ་ལི་གྲོང་ཁྱེར་གྱི་མེ་འཁོར་འབབ་ཚུགས་བར་དུ་བཀའ་ཁྲི་མཆོག་ཕེབས་བསུ་སྣེ་ལེན་དུ་བཅར་དེ་ཉིན་འདིའི་སྔ་དྲོ་ཆུ་ཚོད་༡༠ པ་ཙམ་ལ་བཀའ་བློན་ཁྲི་བ་མཁས་དབང་བློ་བཟང་སེངྒེ་མཆོག་མོན་གྷོ་གཞིས་ཆགས་སུ་དངོས་སུ་ཕེབས་ཡོད་པ་རེད།

སྐབས་དེར་ས་གནས་ཀྱིས་སེར་སྐྱ་མི་མང་སྟོང་ཕྲག་ཁ་ཤས་ཀྱིས་ལག་ཏུ་ཁ་བཏགས་དང་མེ་ཏོག་བཟུང་སྟེ་ལམ་ཁ་གཡས་གཡོན་དུ་རུ་སྒྲིག་བཞིན། བཀའ་ཁྲི་མཆོག་གཞུང་འབྲེལ་ཐོག་ཐེངས་དང་པོར་ས་གནས་སུ་འབྱོར་བར་མི་མང་གི་ཧ་ཅང་གི་འགའ་བསུ་ཆེན་པོ་བྱས་ནས་ཕེབས་བསུ་སྣེ་ལེན་ཟབ་རྒྱུས་བྱས་ཐོག་དགའ་ལྡན་བྱང་རྩེའི་འདུ་ཁང་ཡང་ཐོག་སྐུ་མགྲོན་ཁང་དུ་གདན་འདྲེན་ཞུས་ཡོད་པ་རེད།

བཀའ་ཁྲིས་མོན་གྷོ་ས་གནས་གཏན་ཉིན་སློབ་གྲྭའི་ནང་ཕེབས་ནས། ཁོང་གི་སློབ་སྦྱོང་གི་བརྒྱུད་རིམ་ནང་དཀའ་ངལ་གང་འཕྲད་དང་དེ་དག་ལ་གདོང་ལེན་གང་འདྲ་བྱས་མིན་སྐོར་དང་། སློབ་མ་ཚོས་སྐབས་རེར་རྒྱུག་མ་འཕྲོད་པ་དེ་འདྲ་ཡོང་སྲིད་ཀྱང་སེམས་ཤུགས་མ་ཆག་པར་སླར་ཡང་སློབ་སྦྱོང་ལ་འབད་རྩོན་དང་ཧུར་ཐག་བྱེད་དགོས་སྐོར་གྱི་གཏམ་བཤད་གནང་།

ཉིན་རྒྱབ་བཀའ་ཁྲི་མཆོག་གིས་མོན་གྷོ་ས་གནས་སྲོལ་རྒྱུན་སོ་ནམ་ཞིང་སལ་འདེབས་བཞིན་པའི་གཞིས་གྲོང་ཁག་ཅིག་ལ་གཟིགས་སྐོར་གྱི་ལས་རིམ་གྲུབ་པ་དང་། ཆུ་ཚོད་༣ པ་ནས་༤པ་ཕྱེད་བར་མོན་གྷོ་ས་གནས་གཞིས་སྤྱིའི་ཚོགས་ཁང་དུ་ས་གནས་གཞིས་ལུས་ཁང་དང་མཉམ་འབྲེལ། ས་གནས་འཐུས་ཚོགས་བཅས་ཀྱི་གཙོས་མོན་གྷོ་ས་གནས་ཀྱི་གནད་ཡོད་མི་སྣ་ཡོངས་དང་ལྷན་དུ་བཞུགས་མོལ་ཚོགས་འདུ་ཞིག་འཚོགས་སོང་ལ།  སྐབས་དེར་བཀའ་ཁྲི་མཆོག་གིས་བཀའ་སློབ་ལམ་སྟོན་གྱི་གསུང་བཤད་ཐུང་ཙམ་གནང་རྗེས་གཙོ་བོ་སྤྱི་ཡོངས་དང་ས་གནས་ཀྱི་དཀའ་ངལ་བཅས་ཀྱི་སྐོར་ལ་དྲི་བ་དྲིས་ལན་གནང་སོང་།

ཕྱི་དྲོ་གདན་ས་ཆེན་པོ་འབྲས་སྤུངས་སྒོ་མང་གྲྭ་ཚང་དང་འབྲས་སྤུངས་བློ་གསལ་གླིང་གྲྭ་ཚང་གཉིས་ཀྱིས་ཕེབས་བསུ་དང་སྦྲགས་མཆོད་མཇལ་གནང་རྗེས།   འབྲས་སྤུངས་བླ་སྤྱིའི་འདུ་ཁང་ནང་དགེ་འདུན་འདུས་མང་ཡོངས་ལ་བཀའ་སློབ་གསུང་བཤད་གནང་ཡོད་པ་རེད། བཀའ་ཤག་སྐབས་བཅུ་བཞི་པའི་བཀའ་བློན་ཁྲི་བའི་ལས་ཁུར་བླངས་ནས་ལོ་གཅིག་མ་ཟིན་ཙམ་གྱི་རིང་ལ་འཛམ་གླིང་རྒྱལ་སྤྱིའི་ཐོག་བོད་དོན་དྲིལ་བསྒྲགས་དང་རྒྱབ་སྐྱོར་རག་ཐབས། ལྷག་པར་དུ་ད་ལྟའི་བོད་ནང་གི་ཛ་དྲག་གནས་སྟངས་དང་བོད་རྒྱལ་ཁབ་དང་མི་རིགས། ང་རང་ཚོ་ཚང་མའི་རང་དབང་དང་འདྲ་མཉམ་གྱི་ཐོབ་ཐང་གི་ཆེད་དུ་སོ་སོའི་རྩ་ཆེ་ཚེ་སྲོག་བློས་གཏོང་གིས་རང་ལུས་མེ་ལ་སྦར་ནས་རླབས་ཆེན་གྱི་ལས་འགུལ་སྤེལ་དང་སྤེལ་མུས་ཡོད་པ་དེ་ཚོ་ཆུད་ཟོས་སུ་མི་འགྲོ་བའི་ཆེད་དུ་ལས་ཀ་ཧུར་ཐག་བྱས་པ་ཡིན།  རྒྱ་ནག་གི་ནག་ཉེས་དེ་ཚོ་ཚང་མ་ང་ཚོས་མགོར་གཡོག་གི་ཡོད་པ་རེད། ཡིན་ནའང་ད་ལྟའི་ཆར་ཨ་རི་གཙོས་རྒྱལ་ཁབ་ཁག་གཅིག་གིས་ད་ལྟའི་བོད་ནང་གི་ཛ་དྲག་གི་གནས་སྟངས་དེ་རྒྱ་ནག་གི་བོད་ཐོག་མཁྲེགས་འཛིན་གྱི་སྲིད་ཇུས་ལས་བྱུང་བ་ཡིན་པ་ཞིག་ལ་ངོས་འཛིན་བྱེད་ཀྱི་ཡོད་པ་རེད་ཅེས་སོགས་གསུངས་སོང་།

ཡང་ཕྱི་ཚེས་༣ གསུམ་ཉིན་གྱི་ཞོགས་པ་ཆུ་ཚོད་༩ པའི་ཐོག་བཀའ་བློན་ཁྲི་པ་མོན་གྷོ་འདོད་རྒུ་གླིང་ས་གནས་གཞིས་སྤྱིའི་མི་མང་ཚོགས་ཁང་ཆེན་མོའི་ནང་ཕེབས་ནས།   ས་གནས་གཞིས་གྲོང་ཁག་དགུའི་སེར་སྐྱང་མི་མང་ལ་བཀའ་ཤག་གསར་པའི་ལྟ་གྲུབ་གསུམ་གྱི་ཐོག་ལ་འདས་པའི་ལོ་གཅིག་མ་ཟིན་ཙམ་གྱི་རིང་ལ། རྒྱལ་སྤྱི་དང་རྒྱ་གར་སོགས་ཁྱོན་ཡོངས་ཀྱི་ཆ་ནས་ཕྱི་འབྲེལ་དང་དྲིལ་བསྒྲགས། འཛིན་སྐྱོང་བཅས་སྔོན་བཞིན་གནས་ཐུབ་ཡོད་ཅེས་བརྗོད་ན་མ་འགྲིག་པ་མེད།   དེ་ཚོ་གཞུང་མང་གཉིས་ཀྱི་རྡོག་རྩ་ཆིག་སྒྲིལ་དང་ཕྱར་གྲུ་མཉམ་འདེགས་བྱས་པའི་གྲུབ་འབྲས་ལ་བརྟེན་ནས་བྱུང་བ་ཞིག་ལ་ངོས་འཛིན་བྱེད་ཀྱི་ཡོད། ད་དུང་ང་ཚོའི་ངོས་ནས་སྤྱི་ཡོངས་དང་། ལྷག་པར་དུ་སློབ་ཡོན་སྤྲོད་ཕྱོགས་སོགས་གང་ཅིའི་ཐད་ནས་གང་ཐུབ་ཅི་ནུས་ཀྱི་ལྟ་རྟོག་རོགས་འདེགས་ག་རེ་དགོས་པ་སྔར་ལས་ལྷག་བྱེད་འཆར་ཡོད་ཅེས་བཀའ་ཤག་གི་ལས་དོན་བྱེད་ཕྱོགས་སྐོར་ལ་གསུང་བཤད་གནང་ཡོད་པ་རེད།

ཁོང་གིས་མུ་མཐུད་གསུང་དོན། བོད་མིའི་གཞན་རྟེན་གྱིས་བསམ་བློ་དེ་ཧ་ཅང་ཤུགས་ཆེན་པོ་རེད།   དཔེར་ན་སློབ་ཡོན་གཅིག་པུ་ལ་ཆ་མཚོན་ན། གཞུང་ངོས་ནས་ཡིག་ཚད་བརྒྱ་ཆ་༧༥ ཡན་ཆོད་ལོན་པའི་སློབ་ཕྲུག་ཚོར་སློབ་ཡོན་སྤྲད་རྐྱང་བྱེད་ཀྱི་ཡོད་རེད། དངུལ་ལྷག་པ་ཡིན་ན་རྒྱ་ཆ་དེ་ལས་ཉུང་བ་ཚོར་ཡང་སློབ་ཡོན་སྤྲོད་ཀྱི་ཡོད་པ་རེད། ཕ་མ་དང་དགེ་རྒན་བཅས་ཀྱིས་འགན་ཁུར་ནས་སློབ་སྦྱོང་གི་ཐོག་ལ་ཤུགས་རྒྱག་དགོས་པ་རེད་ཅེས་གཞན་རྟེན་གྱི་བསམ་བློ་ཡོད་ན་མི་འགྲིག་སྐོར་གསུངས་སོང་།

ཐེངས་འདིའི་ཚོགས་འདིར་རྒྱ་གར་ལྷོ་ཕྱོགས་ཁུལ་གྱི་གྲོས་ཚོགས་ཀྱི་འཐུས་མི་སྐུ་ཞབས་V S Patel མཆོག་ཆེད་དུ་ཕེབས་ནས་བཀའ་ཁྲིར་མཇལ་བཅར་ཞུས་ཡོད་པ་མ་ཟད། འབྱུང་འགྱུར་ས་གནས་བོད་མི་ཚོར་དཀའ་ངལ་ག་རེ་འཕྲད་ཀྱང་རོགས་འདེགས་བྱེད་ཀྱི་ཡིན་སྐོར་བརྗོད་ཡོད་པ་རེད།

ཉིན་རྒྱབ་ས་གནས་ཀྱི་སློབ་གྲྭ་ཁག་དང་གྲྭ་ཚང་ཆུང་ཁག   དེ་བཞིན་རྒས་གསོ་ཁང་དང་བཙུན་དགོན། སྨན་ཁང་ཁག གཞན་ཡང་གཞུང་འབྲེལ་ས་གནས་ལས་ཁུངས་ཁག་ལ་ལྟ་སྐོར་དང་འཚམས་གཟིགས་གནང་ཡོད་པ་རེད། སྐབས་དེར་རྒྱ་གར་ལྷོ་ཕྱོགས་ཁུལ་གྱི་འཕགས་བོད་འབྲེལ་མཐུད་ཚོགས་པ་དང་བོད་དོན་རྒྱབ་སྐྱོར་ཚོགས་པ་གཉིས་ཀྱི་ཚོགས་གཙོ་ཚོགས་གཞོན་གཙོས་གནད་ཡོད་མི་སྣ་ཁག་གཅིག་དང་མཇལ་འཕྲད་དང་བོད་དོན་རྒྱབ་སྐྱར་སྔར་ལྷག་གནང་སྐྱོང་ཡོང་བའི་འབོད་སྐུལ་ཡང་ཞུ་ཡོད་པ་རེད།

གཞན་ཡང་ས་གནས་འཐུས་ཚོགས་ཚོགས་ཁང་དུ་བཀའ་ཁྲི་གདན་ཞུས་ཐོག་ས་འཐུས་ཡོངས་ཀྱིས་བཀའ་ཁྲིར་ བོད་གཞིས་བྱེས་གཉིས་ཀྱིས་རེ་བའི་ཆེ་སྟོད་ཅེས་པའི་གཟེངས་རྟགས་ཤིག་ཕུལ་ཡོད་པ་རེད།

ཐེངས་འདིར་བཀའ་ཁྲི་མཆོག་གཞུང་འབྲེལ་འཚམས་གཟིགས་སུ་ཕེབས་དེ་ས་གནས་ཀྱིས་གདན་ས་གཉིས་གཙོས་དགོན་སྡེ་ཁག་དང་གཞི་གྲོང་ཁག སློབ་གྲྭ་ཁག་ལས་ཁུངས་ཁག་སོ་སོ་དང་།   དེ་བཞིན་རྒན་གསོ་ཁང་དང་འཕྲོད་བསྟེན་སྨན་ཁང་སོགས་ཡོངས་སུ་འཚམས་གཟིགས་ལེགས་གྲུབ་གནང་སྟེ་ ཉིན་འདིར་དགོང་དྲོ་ཆུ་ཚོད་༩ པའི་ཐོག་ཧུབ་ལི་གྲོང་ཁྱེར་མེ་འཁོར་འབབ་ཚུགས་བར་མོན་གྷོ་ས་གནས་གནད་ཡོད་མི་སྣ་ཚོས་བཀའ་ཁྲི་ཕེབས་སྐྱེལ་བྱས་ཡོད་པ་རེད།།

མོན་གྷོ་གསར་འགོད་པས།