དོན་ལྡན་གླིང་མཉམ་འབྲེལ་ལོ་འཁོར་ཚོགས་ཆེན།

ཟླ་འདིའི་ཚེས་ ༩ ཉིན་གྱི་སྔ་དྲོ་ཆུ་ཚོད་ ༩ ཕྱེད་ཐོག་རྒྱ་གར་ལྷོ་ཕྱོགས་ཀརྞ་ཊ་ཀ་མངའ་སྡེའི་མཉམ་འབྲེལ་སྒྲིག་དོན་ལྟར། རྒྱ་གར་ལྷོ་ཕྱོགས་དོན་ལྡན་གླིང་གཞི་རིམ་ཞིང་པའི་མཉམ་འབྲེལ་ལོ་འཁོར་ཚོགས་ཆེན་ཐེངས་ ༣༠ དེ་དོན་ལྡན་གླིང་མི་མང་ཚོགས་ཁང་དུ་འཚོགས་ཡོད་པ་དང་།

ཚོགས་ཆེན་ཐོག་སྐུ་འགྲོན་གཙོ་བོ་ས་གནས་འགོ་འཛིན་ཕུན་ཚོགས་ཚེ་རིང་དང་བོད་རང་དབང་བདེན་པའི་ཚོགས་གཙོ་སོགས་ཕེབས་འདུག་ལ། ས་གནས་མཉམ་འབྲེལ་འགན་འཛིན་ལྷན་ཚོགས་ཀྱི་ཚོགས་མི་རྣམས་དང་མཉམའབྲེལ་འཕྲུལ་རྨོས་སྡེ་ཚན་གྱི་འགན་འཛིན་གྱིས་གཙོས་པའི་མཉམ་འབྲེལ་སྡེ་ཚན་སོ་སོའི་འགན་འཛིན་དང་ཤེར་བདག་མང་ཚོགས་བཅས་འདུ་འཛོམས་བྱུང་འདུག སྐབས་དེར་དོན་ལྡན་གླིང་མཉམ་འབྲེལ་ཚོགས་གཙོ་བློ་བཟང་ཆོས་འབྱོར་ལགས་ནས་ཚོགས་བཅར་བར་ཚོགས་འདུའི་ངོ་སྤྲོད་ཀྱི་གསུངས་བཤད་གནང་བ་དང་།

མཉམ་འབྲེལ་སྡེ་ཚན་ཁག་གི་སྤྱི་ཁྱབ་འགན་འཛིན་ཆོས་དར་ལགས་ཀྱིས་དོན་ལྡན་གླིང་མཉམ་འབྲེལ་ལས་ཁང་གི་ ༢༠༡༡ ནས་ ༢༠༡༢ བར་གྱི་ལོ་འཁོར་འགྲོ་སོང་དང་ཡོངས་འབབས་སོགས་གྱི་གྲུབ་འབྲས་གང་བྱུང་དང་། གཞི་རིམ་ཞིང་པའི་མཉམ་འབྲེལ་གྱི་མ་རྩ་ཁུངས་སྐྱེལ་རྩིས་ཤོག་དང་། ཁེ་གྱོང་རྩིས་ཁྲ། ཚོང་འབྲེལ་རྩིས་ཁྲ (Trading Account)། བསྐོར་རྒྱག་མ་དངུལ་ཇི་ཡོད་སོགས་ཀྱི་རྩིས་ཁྲ་སྒྲོག་སྦྱང་བྱས་སོང་། དེ་ནས་ལོ་གཅིག་གི་ནང་ལས་ཡུན་ཆུ་ཚོད་ ༧༧༠ བརྒལ་བའི་མཉམ་འབྲེལ་འདྲུད་འཁོར་(Tractor) ཁ་ལོ་བ་བྱེད་མཁན་དག་ལ་ལེགས་གསོལ་མཚོན་ཆེད་སྐུ་འགྲོན་གཙོ་བོ་མཆོག་ནས་མཇལ་དར་དང་བསྔགས་བརྗོད་གནང་སོང་།

གཞན་ཡང་སྐུ་མགྲོན་གཙོ་བོ་ས་གནས་འགོ་འཛིན་གྱིས་ཤེར་བདག་མང་ཚོགས་དང་མཉམ་འབྲེལ་དབར་འབྲེལ་ལམ་བྱེད་ཕྱོགས་དང་འབྲེལ་བའི་གསུང་བཤད་གནང་བ་དང་། མཐར་མཉམ་འབྲེལ་སྤྱི་ཁྱབས་འགན་འཛིན་ནས་ཐུགས་རྗེ་ཆེ་གསུངས་བཤད་གནང་ཡོད་པ་རེད། །

གསར་འགྱུར་མཁོ་སྤྲོད་པ་དོན་འགྲུབ་བཀྲ་ཤིས།