མོན་གྷོ་ཌི་རུ་ས་འཐུས་ཚོགས་འདུ།
ཟླ་འདིའི་ཚེས་༩ ནས་ཚེས་༡༡ བར་ཉིན་གསུམ་རིང་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་ས་གནས་འཐུས་མི་སྐབས་བརྒྱད་པའི་གྲོས་ཚོགས་ཚོགས་དུས་ཐེངས་དང་པོ་མོན་གྷོ་ས་འཐུས་ཚོགས་ཁང་གསར་བའི་ནང་འཚོགས་ཡོད་པ་དང་།
དེ་ཡང་ཉིན་འདིའི་ཞོགས་པ་ཆུ་ཚོད་༩་༣༠་ཐོག་ཐོག་མར་ས་འཐུས་རྣམས་ཀྱི་གཙོས་ཚོགས་བཅར་བ་ཡོངས་ཀྱིས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་བསྒྲོན་འབུལ་དང་བོད་རྒྱལ་ཁབ་ཆེན་པོའི་རྒྱལ་གླུ་བླངས་གྲུབ་པ་དང་། ཆབ་གཅིག་བོད་བསྟན་སྲིད་མི་རིགས་རིག་གཞུང་དང་བཅས་པའི་ཆེད་དུ་སྐུ་ལུས་ཞུགས་འབུལ་གནང་མཁན་རྒྱལ་གཅེས་དཔའ་བོ་དཔའ་མོ་ཚོའི་ཆེད་དུ་མྱ་ངན་ངག་བཅད་སྐར་མ་གཅིག་རིང་གནང་རྗེས། ས་གནས་འཐུས་མིའི་ཚོགས་གཙོ་གུ་རུ་རྒྱལ་མཚན་མཆོག་གིས་ཚོགས་འདུ་དབུ་འཛུགས་གསལ་བསྒྲགས་ཀྱི་གཏམ་བཤད་གནང་དོན།
༧སྤྱིར་ནོར་༧གོང་ས་སྐྱབས་མགོན་མཆོག་གིས་བོད་མི་རྣམས་ལ། ཡང་དག་པའི་མང་གཙོའི་ལམ་བཟང་གསོལ་རས་བསྩལ་བར་སྙིང་ནས་བཀའ་དྲིན་རྗེས་དྲན་ཞུས་རྒྱུ་ཡིན། ང་རང་ཚོ་རང་དབང་ལུང་པར་སོ་སོའི་རང་སྣང་གང་དྲན་བྱས་ནས་སྡོད་དབང་ཡོད་པ་རེད་ལ། གནས་སྟངས་དེ་སྐྱིད་པོ་ཞེ་དྲག་རེད། ཡིན་ན་ཡང་བོད་ནང་གི་གཞིས་བཞུགས་བོད་མི་རྣམས་ལ་རང་དབང་གཏན་ནས་མེད་པར་རྒྱ་དམར་གྱི་བཙན་དབང་གི་འོག་ལ་མནར་གཅོད་དྲག་པོ་མྱངས་དང་མྱོང་བཞིན་པའི་གནས་སྟངས་ཇེ་ཞན་ཇེ་སྡུག་འགྲོ་བཞིན་ཡོད་པ་ང་རང་ཚོ་ཚང་མའི་མཁྱེན་གསལ་རེད།
བོད་ནང་གི་བོད་མི་ཚོའི་སོ་སོའི་མི་རིགས་དང་རྒྱལ་ཁབ་ཀྱི་དོན་དུ་གཅིག་རྗེས་གཉིས་མཐུད་ནས་སྐུ་ལུས་མེ་མཆོད་བྱེད་ཀྱི་ཡོད་རེད། ཁོང་རྣམས་ཀྱི་ཞིམ་པ་མེད་པར་རང་གི་གཅེས་པའི་ལུས་སྲོག་བློས་བཏང་ནས་ལས་འགུལ་སྣ་མང་སྤེལ་དང་སྤེལ་བཞིན་པའི་སྙིང་སྟོབས་དང་གཟི་བརྗིད་ལྡན་པའི་དཔའ་བོ་དཔའ་མོ་རྣམས་ཀྱི་བཀའ་དྲིན་དེ་བརྗེད་ཐབས་མེད་པ་ཞིག་རེད། ཁོང་ཚོའི་བཀའ་དྲིན་རྗེས་སུ་དྲན་བཞིན་པའི་ཐོག་ནས་ང་རང་ཚོ་རང་ངོས་ནས་ནུས་པ་གང་ཡོད་ཀྱི་སྒོ་ནས། བོད་བསྟན་པ་ཆབ་སྲིད་ཆེད་དུ་ལྷག་བསམ་རྣམ་པར་དག་པའི་ཐོག་ནས་ཆོད་སེམས་བརྟན་པོ་དང་གཉེན་འཕྲེང་ཅན་གྱི་དུས་ཚོད་འདིར། ང་རང་ཚོའི་ཐོག་ཏུ་བབ་པའི་ལས་འགན་དེ་བོད་གཞིས་བྱེས་གཉིས་ཀྱི་མི་མང་གི་དཀའ་སྡུག་སེལ་ཐུབ་ཐབས་ལ་འབད་རྩོན་བྱེད་རྒྱུ་དེ་ང་ཚོའི་ལས་འགན་ཉག་གཅིག་ཆགས་བསྡད་ཡོད་པ་རེད། དེ་འདྲ་སོང་ཙང་། སོ་སོའི་ངོས་ནས་ག་རེ་བྱེད་ཀྱི་འདུག སྐུ་ལུས་མེར་བསྲེགས་གནང་མཁན་ཚོའི་དམིགས་འདུན་མ་རྗེད་པ་གནང་རོགས་ཅེས་ཞུ་རྒྱུ་ཡིན།
ལྷག་དོན་དུ་བོད་བསྟན་སྲིད་ཆེད་སྐུ་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་ཚོའི་ཞལ་ཆེམས་སམ་དམིགས་འདུན་བཞིན། ང་རང་ཚོ་བཙན་བྱོལ་ནང་ཡོད་པའི་བུ་ཕྲུག་རྣམས་ལ་བོད་ཀྱི་སྐད་ཡིག་གཉིས་ཀྱི་གནས་ཚད་གོང་མཐོར་གཏོང་རྒྱུ་དང་གཞན་ཡང་ཡུལ་སྲོལ་གོམ་གཤིས། དེ་ག་ནང་གཞིན་མཐུན་ལམ་རྡོག་རྩ་གཅིག་སྒྲིལ་སོགས་ལ་སྨན་སླད་དུ་གྲོས་ཆོད་གྲོས་འཆར་དང་ཐུགས་སྣང་གཞེན་བསྐུལ་སོགས་རེ་རེ་བཞིན་ཕེབས་ཡོང་སྐབས་ཕན་ཚུན་ལེགས་སྤེལ་ཉེས་འགོག་གི་དགོངས་འཆར་ལྷུག་པོར་གསུངས་རྒྱུ་མ་ཟད། དྲི་བ་འདྲི་མཁན་དང་དྲིས་ལན་འདེབས་མཁན་གཉིས་ཀྱི་ངོས་ནས་ཀྱང་འཕྲལ་སེལ་ཙམ་མ་ཡིན་པར་འགན་ཁུལ་ཡོད་པའི་སྒོ་ནས་ལན་འདེབས་དང་དོགས་སེལ་ཞིབ་ཚགས་གནང་དགོས་པ་ང་རང་ཚོ་ཚང་མའི་ཕྲག་ཏུ་བབ་པའི་འགན་ཁུར་ཉག་གཅིག་རེད་དྲན་གྱི་ཡོད་ཅེས་དང་།
མུ་མཐུད་ནས་གསུང་དོན། ས་འཐུས་ ཚོགས་འདུ་འདི་ཁྲིམས་དང་བསྒྲིག་གཞིའི་ཐོག་ནས་གནད་འགག་ཆེས་ཤོས་ཞིག་ཆགས་བསྡད་ཡོད་པ་སོང་ཙང་། དེ་ཁ་ཡོད་ལག་ཡོད་དང་ནུས་པ་ཐོན་པ་ཞིག་ཡོང་རྒྱུའི་ཐོག་ལ་ང་རང་ཚོ་ས་འཐུས་ཚང་མ་དང་། དེ་ག་ནང་གཞིན་ས་གནས་འགོ་འཛིན་བཅས་ཀྱི་བགྲོ་གླེང་གནང་ཕྱོགས་སོགས་ཀྱི་ཐད་ཕྱར་གྲུ་མཉམ་འདེགས་གནང་རྒྱུ་དེ་གལ་ཆེན་པོ་གཅིག་དང་ང་ཚོའི་བཀའ་མོར་གང་གནང་བ་དེ་སྟོང་བཤད་ཙམ་མ་ཡིན་པར་ནུས་པ་ཐོན་པ་ཞིག་ཡོང་རྒྱུར་འབད་རྩོན་གནང་རོགས་ཅེས་གསུངས་སོང་།
དེ་ཡང་སྐབས་བརྒྱུད་པའི་ས་གནས་འཐུས་ཚོགས་ཚོགས་དུས་དང་པོ་ཉིན་གསུམ་གྱི་ལས་རིམ་ནང་ལ་སྐར་རྟགས་ཅན་གྱི་དྲི་བ་རྣམ་གྲངས་༢༤ དང་དེ་ལས་འཕྲོས་པའི་འཕྲོས་དོན་དྲི་བ་༡༠༥ ཙམ་ཕེབས་ཡོད་པ་དང་། ཐུགས་སྣང་གཞེན་སྐུལ་གྱི་གྲོས་འཆར་གྲངས་༣༡ དང་གཞུང་འབྲེལ་མྱ་ངན་རྗེས་དྲན་གྲོས་ཆོད་གྲོས་འཆར་གྲངས་༣ དང་ཐུགས་རྗེ་ཆེ་ཞུའི་གྲོས་འཆར་༢ བཅས་བྱུང་ཡོད་པ་རེད།
ཉིན་གསུམ་པའི་ཚོགས་དུས་ཐ་མར་ས་འཐུས་ཚོགས་གཙོ་མཆོག་གིས་མཇུག་བསྡོམས་གཏམ་བཤད་གནང་དོན།
མོན་གྷོ་ས་གནས་འཐུས་མིའི་ཚོགས་འདུ་སྐབས་བརྒྱད་པའི་ཚོགས་དུས་དང་པོ་དེ་ཁྲིམས་དང་སྒྲིག་གཞི་མཐུན་པའི་སྒོ་ནས་གྲོས་ཚོགས་འཐུས་མི་ཚོའི་ཆ་ཤས་ལེན་སྟངས་དང་ས་གནས་འགོ་འཛིན་མཆོག་གིས་ལན་གནང་ཕྱོགས་བཅས་ཧ་ཅང་ཡག་པོ་བྱུང་སོང་དྲན་གྱི་ཡོད། ས་གནས་འགོ་འཛིན་གྱི་ངོ་ནས་ལས་དོན་ཐོག་ལ་འགན་ཁུར་ཡོད་པའི་ལན་འདེབས་གནང་སོང་། ཡིན་ནའང་གང་བཞག་པའི་གྲོས་ཆོད་གྲོས་འཆར་དེ་དག་ཡིག་སྣོད་ནང་བཞག་བསྡད་པ་ཡིན་ན་ཕན་ཐོག་གང་ཡང་མེད་པ་སོང་ཙང་། འབྱུང་འགྱུར་ཟླ་བ་དྲུག་གི་ནང་ལོགས་སུ་མི་མང་གིས་ཕེབས་པའི་བསམ་ཤོག་དེ་ཚོར་སྣང་མེད་དུ་མི་འཇོག་པར་རིམ་པའི་ལག་ལེན་དོན་འཁྱོལ་ཡོང་བར་འབད་རྩོན་གནང་གལ་ཆེ་བ་དང་། དེ་ག་ནང་བཞིན་དེ་རིང་གི་ཚོགས་འདུ་འདིའི་ནང་གྲོས་ཆོད་གྲོས་འཆར་ཤོ་སྤག་རྒྱན་རྩེད་ཀྱི་མཚོན་པའི་གལ་གནད་ཆེ་བའི་སྐར་རྟགས་ཅན་གྱི་དྲི་བ་ཁག་གཅིག་རིང་མིན་༧གོང་ས་མཆོག་ས་གནས་སུ་ཆིབས་བསྒྱུར་གནང་གི་ཡོད་པ་རེད། དེ་ཚུན་ཆད་དུ་གཙང་བཟོ་བྱེད་ཐུབ་པའི་རེ་བ་བྱེད་ཀྱི་ཡོད། སྤྱིར་བཏང་གི་གྲོས་ཆོད་གྲོས་འཆར་གཞན་ཁག་ལག་ལེན་ཐེབ་མིན་ལ་མ་ལྟོས་པར་གང་ཐུབ་ཅི་ནུས་ཀྱི་ཕྱག་ལས་གནང་དགོས་པ་ཞིག་རེད་ལ། དེ་ལྟར་ངེས་པར་དུ་ཕྱག་ལས་གནང་སྐྱོང་ཡོང་བའི་འབོད་སྐུལ་ཞུ་ཡི་ཡོད་ཅེས་དང་།
གཞན་ཡང་དམིགས་བསལ་དྲི་བ་ཨང་དྲུག་པ་དང་དགུ་པ། དེ་བཞིན་བཅུ་པ་སོགས་ཀྱི་གནད་དོན་ཐོག་ས་གནས་འཐུས་མི་ཡོངས་དང་ས་གནས་འགོ་འཛིན་བཅས་ཀྱི་བགྲོ་གླེང་གོ་བསྡུར་ལྷུག་པོ་བྱུང་བར་བརྟེན། འདིའི་དཀའ་ངལ་དེ་ཕལ་ཆེར་སེལ་ཐུབ་པའི་རེ་བ་དང་ཡིད་ཆེས་བརྒྱ་ཆ་བརྒྱ་ཐམ་པ་བྱེད་ཀྱི་ཡོད། དེ་འདྲ་སོང་ཙང་དེ་རིང་གི་ལས་རིམ་ཡོངས་སུ་རྫོགས་པ་ག་ལ་གང་མཚམས་ཡག་པོ་བྱུང་སོང་དྲན་གྱི་ཡོད། དེ་ནི་རྣམ་པ་ཚོ་ཆ་ཤེས་ལེན་མཁན་འཐུས་མི་ཚོ་རེད། དེ་ག་ནང་བཞིན་ས་གནས་འགོ་འཛིན་གྱི་ལན་འདེབས་གནང་ཕྱོགས་དང་ལྷག་པར་ལོ་འཁོར་ལས་བསྡོམས་སོགས་སྔར་དང་མི་འདྲ་བར་ཤིན་ཏུ་ནས་ཐུགས་སྣང་ཆེན་པོའི་སྒོ་ནས་གནང་བ་སོགས་ཀྱི་ཐད་ལ་བློ་ཁ་ཚིམས་པ་བྱུང་སོང་། དེ་ལ་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན་ཅེས་སོགས་གསུངས་སོང་།
མོན་གྷོ་ས་འཐུས་སྐབས་བརྒྱད་པའི་ཚོགས་དུས་དང་པོ་དེ་ཉིད་རྒྱལ་ཁའི་ངང་མཇུག་དྲིལ་ཡོད་པ་རེད།
མོན་གྷོ་གསར་འགོད་པས།
