ནང་སྲིད་བཀའ་བློན་གྱི་ཕྱོགས་ཕེབས།

ནང་སྲིད་བཀའ་བློན་རྒྱ་རི་སྒྲོལ་མ་གཞུང་འབྲེལ་ཐོག་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་ཏུ། འཚམས་གཟིགས་ལ་ཕེབས་ཀྱི་ཡོད་པ་བཞིན་ཟླ་འདིའི་ཚེས་༢༤ ཉིན་མོན་གྷོ་འདོད་རྒུ་གླིང་བོད་མིའི་གཞིས་སྒར་དུ་འབྱོར་ཡོད་པ་རེད།

དེ་ཡང་ཟླ་འདིའི་ཕྱི་ཚེས་༢༤ ཉིན་གྱི་ཕྱི་དྲོ་ནང་སྲིད་བཀའ་བློན་རྒྱ་རི་སྒྲོལ་མ་དང་། རྒྱ་གར་ལྷོ་ཕྱོགས་མངའ་ཁུལ་གྱི་གྲོས་ཚོགས་འཐུས་མི་སྐུ་ཞབས་V S Paler། གཞན་ཡང་མོན་གྷོ་ས་གནས་ཀྱི་རྒྱ་གར་ཉེན་རྟོག་པའི་དཔོན་རིགས་ཁག་གཅིག་དང་མཉམ་དུ་འཚོག་འདུ་ཞིག་གདན་ས་ཆེན་པོ་དགའ་ལྡན་བླ་སྤྱིའི་འདུ་ཁང་ནང་འཚོགས་ཡོད་པ་དང་། སྐབས་དེར་སྐུ་ཞབས་V S Patel མཆོག་ནས་ཉེ་བའི་ཆར་རྒྱ་གར་ལྷོ་ཕྱོགས་ཀར་ཎ་ཌ་ཀ་མངའ་སྡེའི་ནང་དཀྲོག་གཏམ་མང་པོ་ཞིག་ཁྱབ་བརྡལ་དུ་སོང་སྟེ་མི་མང་ལ་སེམས་འཚབ་བྱེད་དགོས་བྱུང་ཡོད་པ་རེད།  དེ་ལ་ཁྱེད་རང་ཚོས་སེམས་ཁུར་བྱེད་དགོས་པ་མ་རེད།  རྒྱ་གར་དབུས་དང་མངའ་སྡེའི་གཞུང་གི་སྐོར་སྲུང་ཉེན་རྟོག་པའི་ངོས་ནས་ཕྱོགས་གང་སར་ལྟ་སྲུང་ནན་མོ་བྱེད་བཞིན་ཡོད་ལ།  སྤྱིར་བཏང་དཀྲོག་གཏམ་གྱི་གནས་ཚུལ་དེ་མངའ་སྡེ་མང་པོའི་ནང་བྱུང་ཡོད་ན་ཡང་། ང་ཚོ་འདིར་སྲུང་སྐྱོབ་ཀྱིས་ཐོག་ནས་ཁྱེད་ཚོས་སེམས་འཚབ་བྱེད་དགོས་པ་མ་རེད་ཅེས་གསུངས་སོང་།

ནང་་སྲིད་བཀའ་བློན་གྱིས་ཀྱང་ང་ཚོའི་ངོས་ནས་རྒྱ་གར་གཞུང་མང་གཉིས་ལ་ཡིད་ཆེས་ཡོད་པ་བཞིན།  ཉེ་བའི་ཆར་བྱུང་བའི་གནས་ཚུལ་འདི་དག་གི་ཐད་ནས་བོད་མི་ཚོའི་བདེ་འཇགས་ལ་ལྟ་སྲུང་གནང་དང་གནང་མུས་ཡོད་པ་བཀའ་དྲན་ཆེ་ཞུ།  མ་འོངས་པར་ཕྱོགས་ཡོངས་ནས་དེ་ལྟར་གནང་སྐྱོང་ཡོང་བའི་འབོད་སྐུལ་ཞུ་བཞིན་ཡོད་ཅེས་སོགས་གསུངས་སོང་།

དེ་བཞིན་ཟླ་འདིའི་ཚེས་༢༥  ཉིན་གྱི་སྔ་དྲོ་ཆུ་ཚོད་༩ པའི་ཐོག་མོན་གྷོ་ས་གནས་གཞིས་སྤྱིའི་མི་མང་ཚོགས་ཁང་ཆེན་མོའི་ནང་ནང་སྲིད་བཀའ་བློན་རྒྱ་རི་སྒྲོལ་མ་ཆེད་ཕེབས་ཀྱི་ཚོགས་འདུ་ཞིག་འཚོགས་ཡོད་པ་དང་།   ཚོགས་ཐོག་ཏུ་མོན་གྷོ་ས་གནས་འཐུས་ཚོགས་ཀྱི་ཚོགས་གཙོ་ཚོགས་གཞོན་གཙོས་གཞུང་དང་གཞུང་འབྲེལ་མ་ཡིན་པའི་གནད་ཡོད་མི་སྣ་ཡོངས་དང་། གཞིས་གྲོང་ཁག་དགུའི་མི་མང་བཅས་མཉམ་འཛོམས་གནང་ཡོད་པ་དང་།  གཞན་ཡང་ཀར་ཝར་རྫོང་གི་རྫོང་དཔོན་Lmkanglo Jamir deputy commissioner དང་། ཉེན་རྟོག་པའི་དཔོན་པོ་མཐོ་ཤོས་ Subhash C gudimani གཉིས་ཀྱང་ཚོགས་ཐོག་འདིར་ཆེད་ཕེབས་གནང་སོང་།

དེ་ཡང་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས།  ལྷོ་གཞིས་སྤྱི་ཁྱབ་འབྲེལ་པ་ཀརྨ་སེངྒེ་གེས་རྒྱ་གར་ལྷོ་ཕྱོགས་ཀྱི་གཞིས་ཆགས་ཁག་ལྔའི་ཆུ་གློག་ལམ་གསུམ་གྱི་དཀའ་ངལ་སེལ་རོགས་ཞུས་དོན་བཞིན། གང་རག་པའི་རོགས་དངུལ་དེ་དག་གཞིས་ཆགས་ཁག་གི་ཆུ་གློག་ལམ་སོགས་ཀྱི་ཆེད་འགྲོ་སོང་བཏང་དང་གཏོང་བཞིན་ཡོད་སྐོར་འགྲེལ་བརྗོད་གནང་ཡོད་པ་རེད།

ནང་སྲིད་བཀའ་བློན་རྒྱ་རི་སྒྲོལ་མས་མི་མང་ལ་གསུང་བཤད་གནང་དོན། དེ་རིང་ང་འདིར་ས་གནས་སུ་ཆེད་མངགས་ཀྱི་ཡོང་དོན་དེ། བར་སྐབས་ཤིག་ནས་ཀར་ཎ་ཌ་ཀ་མངའ་སྡེའི་ནང་གནས་སྡོད་བྱེད་མཁན་བྱང་ཤར་ཁུལ་གྱི་མི་དང་འབྲེལ་བའི་ཐོག་ནས། དྲང་བདེན་མིན་པའི་གནས་ཚུལ་ཁ་ཤས་དྲྭ་རྒྱའི་བརྒྱུད་ལམ་ཁག་ལ་བཀྲམ་ཡོད་པར་བརྟེན། ང་རང་ཚོ་མངའ་སྡེ་འདིར་གནས་སྡོད་བྱེད་མཁན་ཚོར་དཀའ་ངལ་ཏོག་ཙམ་འཕྲད་པ་རེད།  དེ་ལ་རང་གཞུང་བཀའ་ཤག་ངོས་ནས་བློ་འཚབ་ཆེན་པོའི་ཐོག་ལྷོ་གཞིས་ཁག་གི་མི་མང་བདེ་འཇགས་ཡོང་ཐབས་དང་། གལ་སྲིད་རྐྱེན་འདྲ་བྱུང་བ་ཡིན་ན་དེའི་སྐབས་སུ་གདོང་ལེན་བྱེད་ཕྱོགས།  གནད་དོན་དེའི་ཆེད་དུ་མངའ་སྡེའི་དཔོན་རིགས་ཚོ་མཇལ་འཕྲད་བཅས་ཀྱི་ཆེད་འདིར་ཆེད་བཅར་བྱས་པ་ཡིན།

སྤྱིར་བཏང་རྒྱ་གར་དབུས་ས་གཉིས་སུ་བཀའ་བློན་ཁྲི་པ་དང་ལྷོ་གཞིས་ལས་ཁང་དེ་བཞིན་གཞིས་ཆགས་ཁག་གི་འགོ་འཛིན་རྣམས་ཀྱིས། དཀྲོག་གཏམ་རིགས་ཀྱི་གནས་ཚུལ་དང་འདྲ་པར་དེ་དག་དུས་ཐོག་ལ་གསལ་བཤད་བྱེད་ཐུབ་པ་བྱུང་ཡོད།  ལྷག་དོན་མེ་སོར་ས་ཁུལ་ནས་བོད་པའི་སློབ་ཕྲུག་བསྟན་འཛིན་དར་རྒྱས་ལ་གྲི་རྒྱབ་པའི་མཚོན་རྙོག་གླེང་ཕྲན་ཚག་བྱུང་ཡོད་པ་རེད་དེ་ད་ལྟའི་ཆར་ཁོང་ལ་སྲོག་སྐྱོན་མི་འདུག་ཅེས་བརྗོད་སོང་ལ།

ཡང་ཁོང་གིས་རྒྱ་གར་མི་མང་བོད་མི་ཚོར་བཀའ་དྲིན་ཆེན་པོ་ཡིན་སྐོར་དང། བོད་མི་ཚོས་ས་གནས་རྒྱ་གར་མི་མང་ལ་འཆམ་མཐུན་བྱེད་དགོས་སྐོར་བརྗོད་དོན། མ་གཞི་ནས་༧གོང་ས་མཆོག་གི་བཀའ་དྲིན་ལ་བརྟེན་ནས།  འདས་པའི་ལོ་༥༠ ལྷག་གི་རིང་ལ་རྒྱ་གར་གཞུང་མང་གཉིས་ང་རང་ཚོར་བཀའ་དྲིན་ཞེ་དྲག་ཆེན་པོ་རེད་ལ།   ཡིན་ནའང་དུས་རྒྱུན་བོད་མི་སོ་སོའི་ངོས་ནས་འགྲོ་སྟངས་འདུག་སྟངས་ཡག་པོ་བྱེད་དགོས་པ་ཞིག་དང་།  ལྷག་པར་དུ་ས་གནས་སོ་སོ་ནས་རྒྱ་གར་ཡུལ་མི་དང་མཐུན་ལམ་ཡག་པོ་འཛིན་དགོས་པ་ཧ་ཅང་གལ་ཆེན་རེད་ཅེས་བརྗོད་སོང་།

མཐར་ཁོང་གིས་ལོ་སྔོན་མའི་ནང་༧གོང་ས་མཆོག་བགྲེས་ཡོལ་ལ་ཕེབས་ཕྱོགས་དང་། བཅའ་ཁྲིམས་བསྐྱར་བཅོས་ཀྱི་ཐད་ནས་མི་མང་ལ་གསུང་བཤད་གནང་སོང་། དེའི་རྗེས་མི་མང་དང་དྲི་བ་དྲིས་ལན་གནང་སྟེ་ཚོགས་འདུ་གྲོལ་ཡོད་པ་རེད། ཕྱི་ཚེས་༢༧ ཉིན་ནང་སྲིད་བཀའ་བློན་མཆོག་ཀར་ཎ་ཌ་ཀ་མངའ་སྡེའི་སྤྱི་ཁྱབ་བློན་ཆེན་གཞོན་པ་དང་མཉམ་དུ་འཚོག་འདུ་ཞིག་རྒྱ་གར་རྒྱལ་ས་ཝང་ག་ལོར་དུ་འཚོག་གི་ཡིན་སྐོར་ཡང་གསུངས་སོང་།

མོན་གྷོ་གསར་འགོད་པས།