གྲྭ་ཚང་ཁག་གི་སློབ་ཚན་ནང་ཚན་རིག་འཇོག་རྒྱུ་གཏན་འབེབས།
ཟླ་འདིའི་ཚེས་༢༣ ནས་ཉིན་བཞིའི་རིང་རྒྱལ་སྤྱིའི་དགེ་ལྡན་ལྷན་ཚོགས་ཀྱིས་ལོ་འཁོར་ཚོགས་ཆེན་དེ་འབྲས་སྤུངས་སུ་འཚོགས་པ་དང་། དགེ་ལྡན་ལུགས་བཟང་རྒྱུག་སྤྲོད་ཆེན་མོའི་ནང་ཚན་རིག་འཇོག་རྒྱུར་གཏན་འབེབས་བྱས་ཡོད་པ་རེད།
ཚོགས་མགོན་དུ་དགའ་ལྡན་ཁྲི་རིན་པོ་ཆེ་དང་ཤར་བྱང་ཆོས་རྗེ་རྣམ་གཉིས། དེ་བཞིན་གདན་ས་ཁག་གི་ མཁན་རིན་པོ་ཆེ་རྣམ་པ་དང་བོད་གཞུང་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར། ཨ་རིའི་ཨེ་མོ་རིའི་མཐོ་སློབ་ཀྱིས་སློབ་དཔོན་དགེ་བཤེས་བློ་བཟང་བསྟན་འཛིན་སོགས་གདན་ས་གྲྭ་ཚང་ཁག་གི་གནད་ཡོད་མི་སྣ་བརྒྱ་མ་ཟིན་ཙམ་ཚོགས་ཞུགས་གནང་ཡོད་པ་རེད།
དེ་ཡང་ཚོགས་འདུའི་བརྗོད་གཞི་གཙོ་བོ་གདན་ས་གྲྭ་ཚང་སོ་སོའི་ལོ་རེའི་སློབ་ཚན་ཁུངས་སུ་ཚན་རིག་འཇོག་རྒྱུ་དང་། དགེ་ལྡན་ལུགས་བཟང་ཆེས་མཐོའི་རྒྱུགས་སྤྲོད་ནང་ཚན་རིག་འཇོག་རྒྱུའི་འཆར་འགོད་བཅས་ཀྱི་སྐོར་ལ་བགྲོ་གླེང་གྲོས་བསྡུར་བྱས་ཡོད་པ་རེད། ཚོགས་འདུ་དབུ་འཛུགས་སྐབས་དགའ་ལྡན་ཁྲི་རིན་པོ་ཆེ་མཆོག་གི་གསུང་བཤད་གནང་དོན། འཛམ་གླིང་སྟེང་སངས་རྒྱས་ཀྱིས་བསྟན་པ་ཉག་ཕྲ་བའི་སྐབས་འདིར། རྒྱལ་དབང་སྐུ་ཕྲེང་རིམ་བྱོན་དང་ལྷག་པར་དུ་༧གོང་ས་སྐུ་ཕྲེང་༡༤ པ་ཆེན་པོ་མཆོག་གིས་ཐུགས་རྗེ་བཀའ་དྲིན་ལ་བརྟེན་ནས། ནང་པའི་ཆོས་ཀྱི་བསྟན་པ་རིན་པོ་ཆེ་དར་སྤེལ་བྱེད་ཐུབ་པའི་གྲུབ་འབྲས་གཙོ་བོ་འགྲོ་བ་སྤྱི་ལ་ཕན་འབྲས་ཆེན་པོ་ཐོབ་ཡོད་པ་དང་། བྱེ་བྲག་ཉག་ཕྲ་བའི་བོད་བསྟན་སྲིད་ལ་ཕན་འབྲས་བླ་མེད་ཐོབ་ཡོད་སྐོར་དང་། དེ་བཞིན་དེང་དུས་འཛམ་གླིང་ཐོག་ཚན་རིག་དང་དཔུང་པ་མཉམ་གཤིབ་བམ་འགྲན་སྡུར་བྱས་ནས་འགྲོ་ཐུབ་པ་ནི་བོད་ཀྱིས་ནང་བསྟན་ཆོས་ལུགས་འདི་མ་མ་གཏོགས་མེད་པ་སུས་ཀྱང་བརྗོད་བཞིན་ཡོད་པ་རེད་ལ། དེ་ལྟར་མུ་མཐུད་ནས་འགྲོ་ཐུབ་པར་ང་རང་ཚོ་ཚང་མའི་འབད་རྩོན་བྱེད་དགོས་པ་རེད་ཅེས་སོགས་གསུངས་སོང་།
ཐེངས་འདིའི་དགེ་ལྡན་ཆོས་ཁྲིམས་འཛིན་སྐྱོང་ལྷན་ཚོགས་ཀྱིས་གྲོས་གཞི་ཁག་གི་གཙོ་བོ་ཚན་རིག་དེ་གདན་ས་གྲྭ་ཚང་ཁག་གི་སློབ་ཚན་ནང་འཇོག་ཐུབ་པ་དང་། ལྷག་དོན་དགེ་ལྡན་ལུགས་བཟང་རྒྱུག་སྤྲོད་ཆེན་མོའི་ནང་འཇོག་རྒྱུར་གཏན་འབེབས་བྱེད་ཐུབ་པ་བྱུང་ཡོད་པ་རེད་ལ། གཞན་ཡང་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་སྤྱི་དང་བྱེ་བྲག་ཐུགས་ཀྱི་བཞེད་དོན་གཙོ་བོ་དག་ལག་ལེན་བསྟར་ཐབས་བྱེད་རྒྱུ་དང་། ལྷག་པར་དུ་རིས་མེད་ཆོས་ལུགས་ཁག་ལ་མཐུན་ལམ་འཛིན་ཕྱོགས་དང་། བོད་དོན་བདེན་མཐའ་སེལ་ཐབས་ལ་དགེ་འདུན་པ་ཚོའི་ངོས་ནས་ཐབས་ལམ་གང་ཡོད། འཛམ་གླིང་འགྲོ་བ་སྦྱི་ལ་ཞི་བདེའི་ས་བོན་འདེབས་ཕྱོགས་བཅས་སུ་བགྲོ་གླེང་གོ་བསྡུར་ལྷུག་པོ་གནང་ཡོད་འདུག།
མོན་གྷོ་གསར་འགོད་པས།
