དོན་ལྡན་གླིང་གི་འཁོར་ལམ་ཉམས་གསོ།

ཟླ་འདིའི་ཚེས་ ༢༤ ཉིན་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་ཀྱི་འཁོར་ལམ་ཉམས་གསོ་བྱེད་འགོ་ཚུགས་ཡོད་པ་རེད།

དེ་ཡང་འདས་པའི་ལོ་མང་རིང་ཀོ་ལེ་གྷལ་དོན་ལྡན་གླིང་གཞིས་ཆགས་སུ་འཁོར་ལམ་ཉམས་ཆག་ཕྱིན་ནས་དཀའ་ངལ་ཧ་ཅང་ཆེན་པོ་འཕྲད་ཡོད་པ་དང་། ས་གནས་ནས་ས་གནས་འགོ་འཛིན་དང་མཉམ་འབྲེལ་ཚོགས་གཙོ་སོགས་འབྲེལ་ཡོད་མི་སྣ་རྣམས་ཀྱིས་འགན་ཁུར་འོག  གནས་ཡུལ་རྒྱ་གར་གྱི་ཅམ་ར་ཇུ་རྫོང་རིམ་པ་བརྒྱུད་ནས་འབྲེལ་ཡོད་ས་གནས་མངའ་སྡེའི་ལས་ཁུངས་ཁག་ལ་འཁོར་ལམ་ཉམས་གསོའི་བྱ་རྒྱུའི་རེ་སྐུལ་སྔ་རྗེས་བྱས་རྗེས། ཀར་ཎ་ཊ་ཀ་མངའ་སྡེ་གཞུང་ནས་དོན་ལྡན་གླིང་བོད་མི་གཞིས་གྲོང་ཁག་གི་ནང་འཐུང་ཆུ་དང་འཁོར་ལམ་ཉམས་གསོ་བྱེད་པར་རོགས་དངུལ་ཧིན་སྒོར་འབུམ་ ༩༣ ཙམ་གྱི་བཀའ་ཁྲོལ་ཐོབ་ཡོད་འདུག་པ་དང་། དེ་ནས་འཐུང་ཆུ་གསར་སྐྲུན་ཆེད་སྒོར་འབུམ་ ༣༣ དང་འཁོར་ལམ་ཉམས་གསོའི་ཆེད་སྒོར་འབུམ་ ༦༠ གནང་སྟེ། ད་ལྟ་ས་གནས་སུ་འཐུང་ཆུ་གསར་སྐྲུན་བྱེད་ཟིན་གྲབས་ཡོད་པ་དང་། ཁོར་ལམ་ཡང་ཟླ་འདིའི་ཚེས་ ༢༤ ཉིན་དངོས་སུ་ཉམས་གསོ་བྱེད་འགོ་ཚུགས་ཡོད་པ་རེད། འཛུག་སྐྲུན་ལས་གཞི་དེ་དག་མཇུག་སྐྱོང་གནང་རྒྱའི་ལས་འགན་ཆ་ཚང་མངའ་སྡེའི་གཞུང་འབྲེལ་ཚོགས་པ་ Karnataka Rural Infrastructure Development Ltd ཀྱིས་བྱེད་ཀྱི་ཡོད་པ་རེད་འདུག

ཀོ་ལི་གྷལ་དོན་ལྡན་གླིང་ནས་དོན་འགྲུབ་བཀྲ་ཤིས་ཀྱིས།