འཇིགས་བྲལ་ཞེས་པའི་གློག་བརྙན་ལ་གཟེངས་རྟགས།

རྒྱ་རིགས་ཐེབས་རྩ་ཁང་ཞིག་གིས་དམིགས་བསལ་གཟེངས་རྟགས་དེ་ཐེངས་འདིར་བོད་མིའི་རང་དབང་འཐབ་རྩོད་པ་ཅིག་ལ་ཕུལ་བ་དེ་ནི་བོད་མིའི་རང་དབང་འཐབ་རྩོད་ལ་རྒྱབ་སྐྱོར་དང་། རྒྱ་གཞུང་གིས་བོད་ཐོག་བཟུང་བའི་སྲིད་ཇུས་ལ་ངོ་རྒོལ་མཚོན་ཆེད་དུ་ཡིན་འདུག

དེ་ཡང་ཟླ་འདིའི་ཕྱི་ཚེས་༢ ཉིན་དབུས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག ཐེག་ཆེན་ཆོས་གླིང་གཙུག་ལག་ཁང་གི་ཉེ་འཁྲིས་སུ་ཡོད་པའི་བོད་ཀྱི་འགྲེམ་སྟོན་ཁང་དུ། ཨོ་སུ་ཊོ་ལི་ཡར་རྟེན་གཞི་བྱས་པའི་རྒྱ་རིགས་ཐེབས་རྩ་ཁང་ “ཆི་ཅི་རིག་གནས་ཐེབས་རྩ་ཁང་”གིས། ཐེངས་ལྔ་པའི་༢༠༡༢ ལོའི་<<རྒྱ་ནག་ཡར་ཐོན་སྐུལ་འདེད་དམིགས་བསལ་གཟེངས་རྟགས>>དེ་<<འཇིགས་བྲལ>>ཞེས་པའི་གློག་བརྙན་བཟོ་སྐྲུན་པ། ད་ལྟ་རྒྱ་གཞུང་གི་བཙོན་འོག་ཏུ་ཡོད་པའི་དོན་འགྲུབ་དབང་ཆེན་ལ་འབུལ་རྒྱུའི་མཛད་སྒོ་སྟབས་བདེ་ཞིག་འཚོགས་ཡོད་པ་དང་། མཛད་སྒོའི་སྟེང་ཐེབས་རྩ་ཁང་དེའི་ཚོགས་མི་རྒྱ་རིགས་བུད་མེད་ཆི་ཅ་ཊིན་གྱིས། ཐེབས་རྩ་ཁང་དེའི་ལོ་རྒྱུས་ངོ་སྤྲོད་དང་འབྲེལ་དོན་འགྲུབ་དབང་ཆེན་ལ་གཟེངས་རྟགས་དེ་ཕུལ་དགོས་པའི་རྒྱུ་མཚན་ངོ་སྤྲོད་གནང་རྗེས། རང་ལོ་ ༡༡ ཡིན་པའི་དོན་འགྲུབ་དབང་ཆེན་གྱི་བུ་མོ་ཆུང་ཤོས་ལྷ་མོ་སྒྲོལ་མས། རྒྱའི་བཙོན་འོག་ཏུ་ཡོད་པའི་ཕ་དོན་འགྲུབ་དབང་ཆེན་གྱི་ཚབ་བྱས་ཏེ་གཟེངས་རྟགས་དེ་བཞེས་ཡོད་པ་རེད།

ཐེབས་རྩ་ཁང་དེས་དམིགས་བསལ་གཟེངས་རྟགས་དེ་བོད་མིའི་རང་དབང་འཐབ་རྩོད་པ་ཅིག་ལ་ཕུལ་བ་དེ་ནི་བོད་མིའི་རང་དབང་འཐབ་རྩོད་ལ་རྒྱབ་སྐྱོར་དང་། རྒྱ་གཞུང་གིས་བོད་ཐོག་བཟུང་བའི་སྲིད་ཇུས་ལ་ངོ་རྒོལ་མཚོན་ཆེད་དུ་ཡིན་འདུག་ལ། རྩ་བས་གཟེངས་རྟགས་དེ་མང་ཚོགས་ཀྱི་དཀའ་ངལ་བརྗོད་མཁན་གྱི་རྩོམ་པ་པོ་དང་དངོས་བྱུང་གློག་བརྙན་བཟོ་སྐྲུན་པ་ཚད་ལྡན་ཚོར་སྤྲོད་ཀྱི་ཡོད་འདུག