ཀོ་ལེ་གྷལ་ནས་སྔོ་སྨོན་མཆོད་འབུལ་བྱས།

ཟླ་འདིའི་ཚེས་ ༡ ཉིན་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་ས་གནས་གཞོན་ལྷན་དང་བུད་མེད་ལྷན་ཚོགས་གཉིས་ཀྱི་གོ་སྒྲིག་འོག བོད་ནང་ནས་བོད་བསྟན་སྲིད་རང་དབང་ཆེད་རང་ལུས་མེར་སྲེག་གཏོང་མཁན་དག་ལ་གདུང་སེམས་མཉམ་བསྐྱེད་དང་བསྔོ་སྨོན་མཆོད་འབུལ་ཞིག་བྱས་སོང་།

དེ་ཡང་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་བླངས་པ་དང་། མྱ་ངན་གུས་འདུད་ཀྱི་ངག་བཅད་སྐར་མ་གཅིག་ལ་བྱས་ནས།  ཚད་མེད་ཡོན་ཏན་གྱེར་འདོན་བྱས་རྗེས་བོད་ནང་ནས་ད་ལྟ་བར་དུ་བོད་བསྟན་སྲིད་ཆེད་རང་ལུས་མེར་བསྲེག་གཏོང་མཁན་ ༥༡ བྱུང་བའི་རྒྱལ་གཅེས་དཔའ་བོ་དཔའ་མོ་དེ་དག་ངོ་སྤྲོད་དང་འབྲེལ། ཁོང་རྣམས་ཀྱི་ཆེད་དུ་བསྔོ་བ་སྨོན་ལམ་དང་། མ་ཎི་གསོག་བསྒྲུབ། མར་མེ་བརྒྱ་ཚར་གྱི་མཆོད་འབུལ་བྱས་སོང་། ཚོགས་འདུ་དེའི་ཐོག་མི་མང་ ༢༠༠ ལྷག་འདུ་འཛོམས་བྱུང་འདུག །

ཀོ་ལེ་གྷལ་ནས་དོན་འགྲུབ་བཀྲ་ཤིས་ཀྱིས།