ཨོ་སུ་ཁྲི་ལི་ཡར་བདེན་པའི་མེ་ལྕེ་སྐོར་བསྐྱོད།

འཛམ་གླིང་ས་ཁྱོན་གང་སར་སྐོར་བསྐྱོད་བྱེད་བཞིན་པའི་བོད་མིའི་རང་དབང་བདེན་པའི་མེ་ལྕེ་དེ་འདི་ཟླའི་ཚེས་༥ཉིན་གྱི་ཞོགས་པའི་ཆུ་ཚོད་༡༡།༣༠ ཐོག ཨོ་སི་ཁྲི་ལི་ཡའི་གྲོང་ཁྱེར་ཆེ་ཤོས་སི་ཌི་ནེས་རུ་སླེབས་ཡོད་པ་རེད།

ཆུ་ཚོད་༡༡།༣༠ ཐོག་ཨོ་གླིང་རྒྱལ་ས་ཁེན་བྷི་ར་རུ་སྐོར་བསྐྱོད་ལེགས་པར་གྲུབ་སྟེ། ཡུལ་དེའི་བོད་རིགས་མཐུན་ཚོགས་ཀྱི་ཚོགས་གཙོ་བསྟན་འཛིན་ལྷ་མོས། སི་ཌི་ནེས་བོད་རིགས་མཐུན་ཚོགས་ཀྱི་ཚོགས་གཙོ་མྱི་རྒན་ལ་རྩིས་སྤྲོད་དང་སྦྲགས། བདེན་པའི་མེ་ལྕེ་སྐོར་བསྐོད་དང་འབྲེལ་བའི་མཛད་སྒོ་ཞིག་འཚོགས་ཡོད་པ་རེད།

དེ་ཡང་ཐོག་མར་ལས་འགུལ་ལ་མཉམ་ཞུགས་པ་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་། རྒྱལ་གཅེས་དཔའ་བོའི་རྗེས་དྲན་མྱ་ངན་ངག་བཅད་སྐར་གཅིག་བྱས་རྗེས། ས་གནས་འདིའི་བོད་བརྒྱུད་ནང་པའི་ཆོས་ཚོགས་ཁག་གི་དགེ་འདུན་པ་ཁག་ཅིག་གིས་དཔའ་བོ་དཔའ་མོའི་ཚོར་བསྔོ་སྨོན་གསུངས་སོང་། དེ་རྗེས་སི་ཌེ་ནེས་བོད་རིགས་མཐུན་ཚོགས་གཙོ་མྱི་རྒན་གྱིས་ལས་འགུལ་དང་འབྲེལ་བའི་གསུང་བཤད་གནང་དོན། བོད་མི་མང་སྤྱི་འཐུས་ལྷན་ཚོགས་ནས་གོ་སྒྲིག་བཀོད་ཁྱབ་འོག བདེན་པའི་མེ་ལྕེ་སྐོར་བསྐྱོད་དེ་རྒྱལ་ཁབ་༣༠ ལྷག་ནང་ སྐོར་བསྐྱོད་བྱེད་བཞིན་ཡོད་སྐོར་དང་། བོད་ཕྱི་ནང་གཉིས་ཀྱི་རང་ལུས་མེ་མཆོད་གནང་བའི་བོད་ཀྱི་རྒྱལ་གཅེས་དཔའ་བོ་དཔའ་མོ་ཡོངས་ལ་བདེན་པའི་རྒྱབ་ལངས་མཚོན་པའི་ལས་འགུལ་འདི་ལ་ང་ཚོ་ཚང་མ་མཉམ་ཞུགས་གནང་གི་ཡོད་སྐོར་དང་ལས་འགུལ་འདི་བརྒྱུད་ནས་ས་ཡིག་མིང་རྟགས་བསྡུ་རུབ་དགོས་སྐོར་ངོ་སྤྲོད་བྱས་པ་དང་། བོད་མིའི་བདེན་མཐའ་གསལ་ཐབས་ཆེད་དུ་འཛམ་གླིང་རྒྱལ་སྤྱའི་ཐོག་ལ་ཧ་གོ་དོན་གསལ་ཡོང་ཐབས་ཆེད་ང་ཚོས་ངོས་ནས་གསལ་པོ་བཟོ་ཐུབ་དགོས་ཀྱི་ཡོད་སྔོན་མ་ང་རང་ཡིན་ནའང་ཞོར་ནས་འགྲོ་ཡི་ཡོད་རེད་དེ་ད་དངོས་གནས་ང་ཚོ་ཚང་མས་བསམ་བློ་གཏོང་དགོས་སྐོར་སོགས་གསུངས་སོང་།

དེ་བཞིན་རྒྱ་ནག་མང་གཙོ་ཚོགས་པའི་ཚོགས་གཙོ་རྒྱ་རིགས་ཆཱེན་ཆཱེན་སྐུ་མགྲོན་གི་ངོ་བོར་ཕེབས་འདུག་ལ། གོང་གི་གཏམ་བཤད་ཀྱི་སྙིང་དོན་གཙོ་བོ་ནི། འདིར་བཞུགས་སྤུན་ཟླ་ཡོངས་ལ་འཚམས་འདྲི་ཡོད། བོད་དོན་ཆེད་རང་སྲོག་ཤོར་མཁན་ཚོར་བསྔགས་བརྗོད་དང་འབྲེལ། ལས་འགུལ་ཆེན་པོ་འདིས་འགྲོ་བའི་ཐོབ་ཐང་མེད་མའི་གྲང་ཉུང་མི་རིགས་ཡོངས་ལ་ཕན་ནུས་ལྡན་པའི་ལུས་འགུལ་རླབས་ཆེན་ཞིག་རེད། རྒྱ་ནག་དམར་གཞུང་གིས་བོད་གཙོས་པའི་སྤུན་ཟླའི་མི་རིགས་མང་པོ་ཞིག་ལ་ཐུབ་ཚོད་དང་དྲག་གནོན་སོགས་ཚད་ལས་བརྒལ་བ་མང་པོ་ཞིག་བྱེད་བཞིན་པ་དག་འདི་དག་འཛམ་གླིང་མི་མང་དང་རྒྱལ་སྤྱའི་ནང་གསལ་རྟོགས་ཡོངས་ཐབས་ལ་ཁེ་ཕན་ཡོད་རེད། རང་དབང་ཟེར་བ་འདི་མི་རེ་རེ་བཞིན་འགན་འཁྲི་ཡོད་རེད་ལ་དེ་འདྲ་བའི་རང་དབང་དེ་དུས་རྟག་ཏུ་རང་ཉིད་ཀྱི་ངོས་ནས་རྩོད་ལེན་བྱེད་དགོས་རེད། ང་ཚོ་ཚང་མས་ནུས་ཤུགས་མཉམ་དུ་བསྒྲིལ་ནས་རང་དབང་བདེན་པའི་མཐའ་གསལ་ཐབས་ལ་ངེས་པར་དུ་འབད་དགོས་ཀྱི་རེད་ཅེས་སོགས་རྒྱ་ནག་ནང་གི་སྲིད་བྱུས་འཁྲེགས་འཛིན་འདི་འགྲོ་བ་མིའི་རིགས་ལ་འོས་འཚམས་མིན་སྐོར་སོགས་ངོ་སྤྲོད་གནང་སོང་།

དེ་བཞིན་ ATC ཨོ་སུ་ཁྲི་ལི་ཡ་བོད་དོན་རྒྱབ་སྐྱོར་ཚོགས་པའི་རྒྱུན་ལས་ཚེ་རིང་སྐྱིད་འཛོམས་ཀྱིས་གཏམ་བཤད་སྐབས། ཐེངས་འདིའི་མེ་ལྕེ་སྐོར་བསྐྱོད་ལས་འགུལ་གྱི་གལ་ཆེའི་སྐོར་དང་། དེ་རིང་ནི་བོད་མའི་ལྷག་དཀར་ཉིན་མོ་ཡིན་པས་དུས་རྒྱུན་བོད་ཀྱི་ཡུལ་གོམས་གཤིས་ལུགས་དང་འབྲེལ་བའི་ལས་འགུལ་མང་པོ་སྤེལ་གྱི་ཡོད་སྐོར། བོད་ནང་རྒྱ་ནག་གིས་རང་དབང་ཕྲོགས་ཡོད་སྐོར་སོགས་ངོ་སྤྲོད་བྱས་སོང་།

དེ་བཞིན་སི་ཌི་ནེས་ས་གནས་བོད་ཀྱི་གཞོན་ལྷན་ཚོགས་གཙོ་མི་ཉག་བརྩོན་འགྲུས་འོད་ཟེར་གྱིས་མེ་ལྕེ་སྐོར་བསྐྱོད་ཀྱི་ལས་འགུལ་དང་འབྲེལ་བའི་གཏམ་བཤད་བྱས་ཡོད་པ་རེད།

དེ་བཞིན་གསར་འགོད་པས་ཨོ་གླིང་རྒྱལ་ས་ཁེན་བྷི་རའི་བོད་རིགས་ཚོགས་པའི་ཚོགས་གཙོ་བསྟན་འཛིན་ལྷ་མོ་ལ། ས་གནས་དེར་བདེན་པའི་མེ་ལྕེ་སྐོར་ལ་བཅར་འདྲི་བྱས་སྐབས། ཁོང་གིས། རྒྱལ་ས་ནས་སྐོར་བསྐྱོད་ལེགས་པོ་བྱུང་སོང་ལ། མི་མང་གིས་དོ་སྣང་དང་རྒྱབ་སྐྱོར་ཡག་པོ་འདུག བོད་ཕྱི་ནང་གཉིས་ནས་རང་ལུས་མེར་བསྲེགས་གནང་མཁན་ལྔ་བཅུ་བརྒལ་ཟིན་པས། ད་རེད་དེ་དག་གི་དགོས་འདུད་དང་རེ་བ་སོགས་གང་ཡོད་གསལ་ཁ་འདོན་བཞིན་ཡོད་རེད། ཨོ་གླིང་རྒྱལ་ས་ཁེན་བྷི་རའི་ནང་ལ་སྐོར་བསྐྱོད་བྱས་ནས་དེ་རིང་འདིར་སི་ཌི་ནེས་བོད་རིགས་ཚོགས་པའི་ཚོགས་གཙོ་མྱི་རྒན་ལ་བརྩིས་སྤྲོད་ཟིན་པ་ཡིན་ཞེས་འགྲེལ་བརྗོད་བྱས་སོང་།

གསར་འགོད་པ་སེར་ཤུལ་དཀོན་མཆོག་གིས་ཨོ་སི་ཁྲི་ལི་ཡའི་སི་ཌི་ནེས་གྲོང་ཁྱེར་ནས།