རྒྱ་གར་གཞུང་མང་གཉིས་ཀས་བོད་པར་རྒྱབ་སྐྱོར་ཡོད།
ཟླ་འདིའི་ཚེས་༡༥ ཉིན་དྷ་ས་གངས་སྐྱིད་སྤྱི་ཐབས་ཚོགས་ཁང་ནང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡ་ཤིས་ཝན་སིང་ཧ་མཆོག་གི་རྒྱ་གར་གཞུང་དང་མི་མང་གཉིས་ཀས་བོད་དོན་ལ་རྒྱབ་སྐྱོར་མཐའ་གཅིག་དུ་ཡོད་ཅེས་གསུངས་སོང་།
དེ་ཡང་བཀའ་བློན་ཁྲི་པ་མཆོག་གི་གཙོས་བཀའ་བློན་རྣམ་པ་དང་། སྤྱི་འཐུས་ཚོགས་གཙོ་སྦྲེལ་པོ་མཆོག་གི་གཙོས་སྤྱི་འཐུས་རྣམ་པ་དང་། ལྷན་ཁང་ཁག་གི་དྲུང་ཆེ་རྣམ་པས་གཙོས་གཞུང་ཞབས་སྲི་ཞུ་བ་རྣམ་པ་བཅས་ལ། རྒྱ་གར་རྒྱ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཡ་ཤིས་ཝན་སིང་ཧ་མཆོག་གིས་བོད་དོན་ལ་གདུང་སེམས་མཉམ་སྐྱེད་ཡོད་པའི་བཀའ་སློབ་གནང་ཡོད་པ་རེད།
ཁོང་གིས་གསུང་དོན། དེང་སྐབས་བོད་ནང་གཉན་འཕྲང་ཅན་གྱི་དུས་སྐབས་འདིར་རྒྱལ་སྤྱིའི་སྤྱི་ཚོགས་ནས་བོད་དོན་ལ་དོ་ཁུར་བྱེད་དགོས་པ་གལ་ཆེན་པོ་ཡིན་པ་དང་། རྒྱ་གར་གཞུང་མང་གཉིས་ཀའི་ངོས་ནས་བོད་དོན་ལ་རྒྱབ་སྐྱོར་མཐའ་གཅིག་ཏུ་ཡོད། རྒྱ་གར་གཞུང་མང་གཉིས་ནས་བོད་དོན་ལ་སྨན་པའི་ལས་དོན་ག་རེ་ཡིན་ཡང་བྱེད་རྒྱུ་ཡིན། ཁྱེད་རང་བོད་པ་ཚོའི་ངོས་ནས་ང་ཚོས་རོགས་པ་གང་དགོས་པ་དེ་ཐེ་ཚོམ་མེད་པར་ང་ཚོར་གསུང་རོགས་གནང་ཞེས་ལམ་སྟོན་བཀའ་སློབ་གནང་སོང་།
ཁོང་གི་བཀའ་སློབ་གནང་ཟིན་རྗེས་བཀའ་བློན་ཁྲི་པ་བློ་བཟང་སེང་གེ་མཆོག་གིས། རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡ་ཤིས་ཝན་སིང་ཧ་མཆོག ཐུགས་ཁུར་ཆེ་བཞེས་ཐོག་དྷ་རམ་ས་ལར་ཕེབས་སྟེ། ང་ཚོར་གདུང་སེམས་མཉམ་སྐྱེད་ཀྱིས་ལམ་སྟོན་བཀའ་སློབ་གནང་བར་ཐུགས་རྗེ་ཆེ་ཞེས་ཞུས་གནང་སོང་།
སྐུ་ཞབས་ཡ་ཤིས་ཝན་སིང་ཧ་མཆོག་ནི་དུས་རྒྱུན་བོད་དོན་ལ་དོ་ཁུར་གནང་མཁན་ཞིག་ཡིན་པ་མ་ཟད། སྐབས་དང་དུས་སུ་ལས་དོན་བྱེད་ཕྱོགས་སྐོར་ལ་ང་ཚོར་ལམ་སྟོན་གསལ་བཤད་གནང་མཁན་ཞིག་ཀྱང་རེད་ཅེས་བཀའ་བློན་ཁྲི་པས་གསུང་སོང་།།
