ཟས་བཅད་ངོ་རྒོལ་ལ་རྒྱབ་སྐྱོར་ལས་འགུལ།

ཟླ་འདིའི་ཚེས་༡༣ ཉིན་གྱི་དགོང་མོན་ཆུ་ཚོད་༦་༣༠ ཕྱེད་ཐོག་རྒྱ་གར་ལྷོ་ཕྱོགས་མོན་གྷོ་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ད་ལྟ་རྒྱ་གར་རྒྱལ་ས་ལྡི་ལིར་བོད་ཀྱི་གཞོན་ནུ་ལྷན་ཚོགས་དབུས་རྒྱུན་གསུམ་གྱིས་བོད་བསྟན་སྲིད་སྤྱི་དང་།

བྱེ་བྲག་བོད་ནང་གི་གཞིས་ལུས་རྒྱལ་གཅེས་དཔའ་བོ་ཕོ་མོ་ཡོངས་ལ་གདུང་སེམས་མཉམ་བསྐྱེད་མཚོན་ཆེད་དུ་ཟས་བཅད་ངོ་རྒོལ་གྱི་དགོས་འདུན་གསུམ་དང་འབོད་སྐུལ་གཅིག་བཏོན་ཡོད་པ་དག་འགྲུབ་ཆེད་དུ། མར་མེ་ཁྲོམ་སྐོར་གྱི་ལས་འགུལ་ཞིག་མོན་གྷོ་ཌི་གྲོང་རྡལ་དུ་སྤེལ་སོང་།

སྐབས་དེར་ལས་འགུལ་ནང་མོན་གྷོ་ས་གནས་ཀྱི་གཞོན་ནུའི་ཚོགས་མི་བརྒྱ་ཙམ་མཉམ་ཞུགས་ཐོག་ལག་ཏུ་མར་མེ་དང་བོད་ཀྱི་རྒྱལ་དར་བཟུང་ནས། བྱང་ཆུབ་སེམས་མཆོག་མ་སྐྱོར་བཞིན་མོན་གྷོ་ཌི་རྒྱ་གར་གྲོང་རྡལ་དུ་ཁྲོམ་སྐོར་བྱས་རྗེས། ས་གནས་གཞོན་ལྷན་ཚོགས་གཙོ་པདྨ་ཚེ་རིང་གིས་ཟས་བཅད་ངོ་རྒོལ་བ་གསུམ་གྱི་དགོས་འདུན་ཁག་ངོ་སྤྲོད་དང་འབྲེལ་ད་ལྟའི་བོད་ནང་གི་ཛ་དྲག་གི་གནས་སྟངས་སྐོར་ལ་གཏམ་བཤད་གནང་སོང་། །

མོན་གྷོ་གསར་འགོད་པས།