༧གོང་མ་རིན་པོ་ཆེའི་འཁྲུངས་སྐར་སྲུང་བརྩི།
ཟླ་འདིའི་ཚེས་༡༧ ཉིན་༧ས་སྐྱ་གོང་མ་བདག་ཁྲི་རིན་པོ་ཆེ་དགུང་གྲངས་༦༨ ལ་ཕེབས་པའི་སྐུའི་འཁྲུངས་སྐར་རྒྱ་གར་ལྷོ་ཕྱོགས་མོན་གྷོ་ས་གནས་ས་དགོན་བརྩེ་ཆེན་མདོ་སྔགས་ཆོས་གླིང་དུ་སྲུང་བརྩི་ཞུས་ཡོད་པ་རེད།
མཛད་སྒོའི་ཐོག་སྐུ་མགྲོན་གཙོ་བོ་ས་གནས་འགོ་འཛིན་བསོད་ནམས་བསྟན་འཛིན་དང་ས་འཐུས་ཚོགས་གཙོ་གུ་རུ་རྒྱལ་མཚན་གཙོས་གཞུང་དང་གཞུང་འབྲེལ་མ་ཡིན་པའི་ལས་ཀྱི་སྣེ་མོ་བ་རྣམ་པ་དང་། གྲྭ་ཚང་ཁག་དང་གཞིས་གྲོང་ཁག་གི་སྤྱི་མི་དང་ཕྱག་མཛོད་རྣམ་པ། དེ་བཞིན་མི་མང་བཅས་མཉམ་འཛོམས་བྱས་ཡོད་པ་དང་། དེ་ཡང་ཐོག་མར་བདག་ཁྲི་རྡོ་རྗེ་འཆང་ཆེན་པོའི་སྐུ་པར་མཐོང་གྲོལ་རིན་པོ་ཆེ་དུང་རྒྱ་སྤོས་སྣེས་མདུན་བསུས་ཏེ་བཞུགས་ཁྲི་རིན་པོ་ཆེའི་ཐོག་གདན་ཞུས་ཐོག མཎྜལ་རྟེན་གསུམ་དང་མཇལ་དར་འདེགས་འབུལ་དང་ཞབས་བརྟན་གསོལ་འདེབས་གསོག་སྒྲུབ་ཞུས་སོང་། དེ་རྗེས་མོན་གྷོ་ས་དགོན་བརྩེ་ཆེན་མདོན་སྔགས་ཆོས་གླིང་གི་བཤད་གྲྭའི་སློབ་མ་རྣམས་དང་སློབ་གྲྭའི་སློབ་ཕྲུག་རྣམས་ཀྱིས་དབྱིན་བོད་སྐད་ཡིག་གི་སློབ་ཚན་སོགས་ཀྱི་རྒྱུགས་འབྲས་ཨར་རིམ་རྩེ་སོན་ཀྱི་སློབ་མ་རྣམས་ལ། ས་འཐུས་ཚོགས་གཙོ་གུ་རུ་རྒྱལ་མཚན་དང་ས་གནས་འགོ་འཛིན་བསོད་ནམས་བསྟན་འཛིན་རྣམ་གཉིས་ཀྱིས་གཟེངས་སྟོད་བྱ་དགའ་གསོལ་རས་གནང་དེ་མཛད་སྒོ་གྲོལ་ཡོད་པ་རེད།
ས་གནས་ནས་ཐུབ་རྒྱན་གྱིས་གནས་ཚུལ་འགྲེལ་བརྗོད་གནང་བ་ལྟར་ན། དེ་བཞིན་ཉིན་དེར་ལྡི་ར་ལྡི་ར་ཛ་སྤུར་གྱི་དཔལ་ས་སྐྱ་ཆོས་སྒར་དུ་སྔ་དྲོ་ཚོུད་༥དང་ ཕྱེད་ཐོག་མགོན་པོ་གང་ཉིད་ཕོ་བྲང་ནས་རྔ་རོལ་སིལ་གྱིས་གདན་དྲངས་ཏེ་བཞུགས་ཁྲི་རིན་པོ་ཆེར་འཁོད་འཚམས་སུ་༸སྐྱབས་མཆོག་འཁོན་གདུང་སྐུ་བགྲེས་རིན་པོ་ཆེ་མཆོག་དང་ངོར་ཐར་རྩེ་མཁན་པོ་ཁང་གསར་ཞབས་དྲུང་རིན་པོ་ཆེ་སོགས་དབུས་པས་འདུས་མང་ ཡོངས་ནས་བླ་མ་འཆི་མེད་ཚེ་ལྷ་རྣམ་གསུམ་གྱི་ཆོ་གར་གསུང་གནང་ཡོད་པ་རེད།
དེའི་རྗེས་འཁོན་གདུང་སྐུ་བགྲེས་རིན་པོ་ཆེ་མཆོག་སྐུ་བཞེངས་ཐོག་མཎྜལ་སྐུ་ གསུམ་ཐུགས་རྟེན་སོགས་འབུལ་གྲུབ་རྗེས་རིམ་བཞིན་བླ་བྲང་དང་འབྲེལ་ཡོད་དགོན་སྡེ་ཁག་གཞན་ཡང་སྤུ་རུ་ཝ་ལ་ས་སྐྱ་གཞིས་ཆགས་དང་ས་གནས་གཞོན་ལྷན་དང། བུད་མེད་ཚོགས་པ་སོགས་ཀྱི་གཙོས་པའི་ཚོགས་གཞིས་ཁག་གིས་རིམ་བཞིན་མཎྜལ་སྐུ་གསུང་ཐུགས་རྟེན་ཕུལ་ཡོད་པ་རེད། དེ་ནས་གསུང་ཆོག་གྲུབ་མཚམས་སྔ་དྲོ་ཚོུད་བདུན་པའི་ཐོག་མ་སུ་རིར་ཆིབས་ཞལ་བསྒྱུར་གནང་སོང་། གོང་ཚེས་ཉིན་འཛམ་གླིང་ཤར་ནུབ་ཡུལ་གྲུལ་གང་སར་མགོན་པོ་གང་ ཉིད་ཀྱི་ཞལ་སློབ་དང་དད་ལྡན་མི་མང་རྣམས་ཀྱིས་སྐུའི་འཁྲུངས་སྐར་སྲུང་བརྩི་ཞུ་གནང་བ་མ་ཟད་དེའི་ཉིན་སྐུ་ཁམས་དང་མཐུན་པའི་སྐུ་རླུང་དར་འཛུགས་དང་ཤིང་སྡོང་གསར་འཛུགས་གཞན་ཡང་བྱ་དང་བྱེའུ་ཉ་གཙོས་པའི་སེམས་ཅན་ཚེ་བསླུའི་ལས་འགུལ་སོགས་རྣམ་དཀར་གྱི་ལས་འགུལ་རྒྱ་ཆེ་སྤེལ་བཞིན་ཡོད་འདུག །
མོན་གྷོ་གསར་འགོད་པས།
།
