འབར་མའི་སྤྱི་འཐུས་ཟུར་པ་ཞིག་དྷ་སར་ཕེབས་པ།
ཟླ་འདིའི་ཕྱི་ཚེས་༡༧ ཉིན་འབར་མའི་མང་གཙོ་ཚོགས་པའི་གྲོས་ཚོགས་འཐུས་མི་ཟུར་པ་ཞིག་བཞུགས་སྒར་དུ་ཕེབས་ཡོད་པ་དང། དེའི་དགོང་མོ་བཞུགས་སྒར་གངས་སྐྱིད་སྤྱི་ཐབ་ཚོགས་ཁང་དུ་སྤྱི་འཐུས་རྣམ་པ་དང། ཕྱི་དྲིལ་དྲུང་ཆེ་རྣམ་པ། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་དང་ལས་བྱེད་སོགས་གཞུང་གི་ལས་བྱེད་ཁག་ཅིག་ལ་གསུང་བཤད་ཅིག་ཀྱང་གནང་ཡོད་པ་རེད།
དེ་ཡང་གོང་ཚེས་ཉིན་འབར་མའི་མང་གཙོ་དོན་གཉེར་ཅན་སྙན་གྲགས་ཅན་ལྕམ་ཨང་སན་སུ་ཀི་ཡིས་སྣེ་ཁྲིད་པའི་འབར་མའི་མང་གཙོ་ཚོགས་པའི་གྲོས་ཚོགས་འཐུས་མི་ཟུར་པ་མཁས་དབང་ཏིན་ཊི་ སིཝེ་(Dr. Tint Swe)བཞུགས་སྒར་དུ་ཕེབས་ཡོད་པ་དང། ཁོང་ནི་འབར་མའི་མང་གཙོ་ཚོགས་པའི་འོས་མི་བྱས་ནས་འབར་མའི་གྲོས་ཚོགས་འཐུས་མི་རུ་འདེམ་ཐོན་བྱུང་ཡོད་ཀྱང། འབར་མའི་དྲག་པོའི་གཞུང་གིས་གནོན་ཤུགས་འོག་ནས་རྒྱ་གར་ལ་སྐྱབས་བཅོལ་དུ་ཕེབས་དགོས་བྱུང་ནས་ལོ་༢༠ ཙམ་འགྲོ་བཞིན་ཡོད་འདུག ཁོང་ནི་དུས་རྒྱུན་བོད་དོན་ལ་རྒྱབ་སྐྱོར་བྱེད་མཁན་ཞིག་ཡིན་པ་དང། བོད་མི་མང་སྤྱི་འཐུས་ལྷན་ཚོགས་སྐབས་བཅོ་ལྔ་པའི་གྲོས་ཚོགས་ཚོགས་དུས་བཞི་པ་ཚོགས་བཞིན་པའི་སྐབས་ཕྱི་ཚེས་༡༧ ཉིན་གྱི་ཕྱི་དྲོ་གྲོས་ཚོགས་ནང་སླེབས་པ་དང། སྤྱི་འཐུས་རྣམས་ཀྱིས་དགའ་བསུ་ཞུས་ཡོད་པ་རེད།
དེའི་དགོང་མོ་ཆུ་ཚོད་༥།༣༠ ཙམ་གྱི་ཐོག་གངས་སྐྱིད་ལས་བྱེད་གསོལ་ཐབ་ཀྱི་ཡང་སྟེང་ཚོགས་ཁང་དུ་བོད་མི་མང་སྤྱི་འཐུས་རྣམ་པ་དང། ཕྱི་དྲིལ་དྲུང་ཆེ་རྣམ་པ་གཉིས། སྲིད་བྱུས་ཉམས་ཞིབ་ཁང་གི་དབུ་འཛིན་དང་ལས་བྱེད་རྣམ་པ་དང། དེ་བཞིན་དོ་སྣང་ཅན་གྱི་ལས་བྱེད་པ་དང་གསར་འགོད་པ་སོགས་ལ་གསུང་བཤད་ཅིག་གནང་ཡོད་པ་དང། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པ་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་ཁོང་ངོ་སྤྲོད་དང་འབྲེལ། སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་གཙོ་སྐྱོང་གནང་ཡོད་པ་རེད། འབར་མའི་གྲོས་ཚོགས་འཐུས་མི་ཟུར་པ་ཁོང་གིས་འབར་མའི་མི་རིགས་ཤིག་ཡིན་ན་བོད་པའི་སྐོར་དེ་སློབ་གྲྭར་ཡོད་དུས་ནས་འབར་མ་དང་བོད་པ་གཉིས་ཀ་མི་རིགས་ཀྱི་འབྱུང་ཁུངས་དང། མི་རིགས་ཀྱི་ངོ་བོའི་ཐོག་ནས་འབྲེལ་བ་ཡོད་པ་དེ་སློབ་ཚན་གྱི་ནང་དུ་ཡོད་དུས་ཚང་མས་ཤེས་ཀྱི་ཡོད་པ་རེད། ང་ཚོ་ཕན་ཚུན་ལོ་རྒྱུས་སོགས་ཀྱི་ཐོག་ནས་བོད་དང་འབར་མའི་གཉིས་ལ་འབྲེལ་བ་ཡོད་པའི་སྐོར་སོགས་གསུངས་སོང།
དེ་བཞིན་འབར་མའི་མང་གཙོ་ཚོགས་པའི་དབུ་འཛིན་ལྕམ་ཨང་སན་སུ་ཀི་མཆོག་དང། བོད་ཀྱི་དབུ་ཁྲིད་༧གོང་ས་མཆོག་རྣམ་གཉིས་ལོ་འདིའི་ནང་དབྱིན་ཡུལ་གྱི་རྒྱལ་ས་ལོན་ཌོན་དུ་འཇལ་འཕྲད་བྱུང་བ། ཁོང་གཉིས་ཀ་ནོ་སྦེལ་ཞི་བདེའི་གཟེངས་རྟགས་དང། ཨ་རིའི་གྲོས་ཀྱི་གསེར་གྱི་རྟགས་མ་བཞེས་མཁན་གཅིག་པ་ཡིན་པ། མང་གཙོ་དང་འཚེ་མེད་ཞི་བ་དོན་དུ་གཉེར་མཁན་ཡིན་པ་སོགས་ད་ལྟའི་འབྲེལ་བའི་སྐོར། བོད་དང་འབར་མ་གཉིས་ཀྱི་ནང་དུ་དཀའ་ངལ་འཕྲད་བཞིན་པ་དེ་རྒྱ་དམར་གཞུང་དང་འབྲེལ་བ་ཡོད་པའི་གནས་སྟངས་ཀྱང་གཅིག་མཚུངས་ཡིན་པ། འདས་པའི་མི་ལོ་༥༠ ལྷག་ཅིག་གི་རིང་ལ་འབར་མའི་ནང་དུ་མི་གཅིག་དབང་འཛིན་གྱི་ཐོག་ནས་དམག་སྤྱིས་རྒྱབ་ཁབ་འཛིན་སྐྱོང་བྱས་ཡོད་པ་དེ། རྒྱ་དམར་གཞུང་གི་ཐེ་བྱུས་མང་པོ་བྱས་པའི་རྐྱེན་ལ་བརྟེན་ནས་བྱུང་ཡོད་ཚུལ་ཡང་གསུངས་སོང།
ལོ་འདིའི་ཕྱི་ཟླ་༤ པ་ཙམ་ནས་བཟུང་འབར་མའི་ཆབ་སྲིད་ལམ་ལུགས་ལ་བཟང་ཕྱོགས་ཀྱི་འགྱུར་བ་གང་འཚམ་ཞིག་འགྲོ་སྡོད་ཀྱི་ཡོད་པ་རེད། འགྱུར་བ་འགྲོ་སྟངས་དེ་ཡང་མིའི་བསམ་བློ་དང་ཚོར་བ་ལ་བརྟེན་ནས་ཡོང་གི་ཡོད་ཞིག་མཐོང་གི་འདུག འབར་མའི་གཙོ་འཛིན་དམག་སྤྱི་དང་པོ་གྲོངས་ནས་ཕུང་པོ་མེར་སྲེག་གཏོང་བའི་སྐབས་སུ་མི་བཅུ་ཙམ་ལས་བཅར་མཁན་བྱུང་མེད་པའི་གནས་སྟངས་ཤིག་བྱུང་བ་རེད། གཙོ་འཛིན་གཉིས་པ་དེ་ཡང་ཁྲག་ཤེད་ལ་བརྟེན་ནས་ གྲོངས་པ་རེད། ད་ལྟ་གསུམ་པ་དེ་དང་ཁོང་ཚོའི་བུ་ཕྲུག་རྣམས་ལ་དཔལ་འབྱོར་ཡོད་ཀྱང། ཕྱི་རྒྱལ་ལ་འགྲིལ་བཞུད་སོགས་ཀྱི་ཐོག་ལ་དཀའ་ངལ་ཆེན་པོ་ཡོད་པ། དེ་བཞིན་ནུབ་ཕྱོགས་ཡར་ཐོན་ཅན་གྱི་རྒྱལ་ཁབ་མང་པོ་ཞིག་གིས་འབར་མའི་ཆབ་སྲིད་ཀྱི་དམ་དྲག་སྲིད་བྱུས་ལ་བརྟེན་ནས་ཚོང་འབྲེལ་དང། གནས་སྐོར་སོགས་ཀྱི་འབྲེལ་ལམ་བཀག་སྡོམ་བྱས་ཡོད་པ། མི་མང་གི་མཐོང་ཕྱོགས་ངན་པ་ཡོད་པ་སོགས་ལ་བརྟེན་ནས་དམག་སྤྱི་དེ་ཚོའི་བུ་ཕྲུག་གིས་འགྱུར་བ་བཏང་བ་ཞིག་ཆགས་བསྡད་ཡོད་པ་རེད་བསམ་པ་དེ་ང་རང་གི་མཐོང་ཚུལ་ཡིན་ཞེས་གསུངས་སོང།
ཁོང་ཉིད་འདས་པའི་ལོ་༢༠ ལྷག་གི་རིང་རྒྱ་གར་ནང་སྐྱབས་བཅོལ་དུ་བསྡད་ཡོད་པ་དང། ༡༩༩༠ ནང་འབར་མའི་འོས་བསྡུ་ཆེན་མོའི་ནང་གྲོས་ཚོགས་ཀྱི་འཐུས་མིར་སླེབས་ཀྱང། དྲག་པོའི་གཞུང་གིས་འོས་ཤོག་གི་གྲུབ་འབྲས་རྩིས་མེད་བཏང་བ་སོགས་ཉེན་ཁ་མང་པོ་ཡོད་པས་ཁོང་ཚོ་མང་པོ་ཞིག་རྒྱ་གར་ལ་བཙན་བྱོལ་དུ་ཡོང་ཞིང། རྒྱ་གར་དུ་འབར་མའི་བཙན་བྱོལ་གཞུང་ཞིག་བཙུགས་ནས་བསྡད་ཡོད་པ། དུས་ཡུན་དེའི་ནང། རྒྱ་གར་གཞུང་གི་གནད་ཡོད་དང། ལས་འགུལ་སོགས་ཀྱི་སྐབས་སུ་བོད་པ་དང་བོད་གཞུང་གི་མཛད་གཙོ་མང་པོ་ཞིག་དང་མཇལ་འཕྲད་བྱུང་བ་བརྒྱུད། ཕན་ཚུན་འབྲེལ་ལམ་བཟང་པོ་ཡོད་པ་དང། གཅིག་གིས་གཅིག་ལ་ཤ་ཚ་དང་སེམས་ཁུར་ཡོད་བསྡད་པ་དེ་གསལ་པོ་ཞེ་དྲག་རེད། ག་དུས་ཡིན་ཡང་དེ་བརྗེད་མི་རུང་བ་ཞིག་ཆགས་བསྡད་ཡོད་པ་རེད་ཅེས་སོགས་ཁོང་གིས་སྐར་མ་བཅོ་ལྔ་ཙམ་གྱི་རིང་དབྱིན་སྐད་ཐོག་གསུང་བཤད་ཅིག་གནང་བའི་རྗེས་སུ་ཚོགས་ཞུགས་པ་རྣམས་ཀྱིས་དྲི་བ་མང་པོ་དྲིས་པ་དང། ཁོང་གིས་དྲི་བ་རེ་རེ་བཞིན་ལན་འདེབས་གནང་ཡོད་པ་རེད།།
