སྤེལ་ལྗམ་དུ་བདེན་པའི་མེ་ལྕེ་སྐོར་བསྐྱོད་ཉིན་གཉིས་བ།

ཁ་སང་ཚེས་༡༨ ཉིན་སྤེལ་ལྗམ་གྱི་གྲོང་ཁྱེར་ཆེ་ཤོས་གཉིས་པ་དང་བོད་མི་འདུས་སྡོད་མང་ཤོས་ཡིན་པའི་གྲོང་ཁྱེར་ཨན་ཀྲོབ་ནང་དུ་བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་ཁྲིད་པའི་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་སྤེལ་ཡོད་འདུག་ལ།

  ཉིན་དེའི་ཆུ་ཚོད་༤ པའི་སྟེང་བོད་མི་དང་བོད་དོན་རྒྱབ་སྐྱོར་བ་༢༠༠ ཙམ་Bolivarplaats ཡི་ཐང་ཆེན་སྟེང་འདུ་འཛོམས་བྱུང་མཚམས་ཚང་མ་གོམ་བགྲོད་ཀྱིས་Groenplaatཡི་ཐང་ཆེན་བར་ཏུ་ཆུ་ཚོད་གཅིག་རིང་སྐད་འབོད་གནང་སྟེ་བསྐྱོད་ཡོད་པ་དང་། ལམ་བར་ཏུ་བོད་ནང་གི་ཛ་དྲག་གནས་སྟངས་གསལ་བའི་དྲིལ་བསྒྲགས་ཡིག་ཆ་མང་པོ་བཀྲམས་པར་མི་མང་གིས་དོ་སྣང་ཤུགས་ཆེར་གནང་ཡོད་འདུག

Groenplaatཡི་ཐང་ཆེན་དུ་འབྱོར་རྗེས་བོད་རང་དབང་ཆེད་རང་སྲོག་བློས་བཏང་བའི་དཔའ་བོ་དཔའ་མོ་ཚོ་ལ་མྱ་ངན་ངག་བཅད་སྐར་མ་གཅིག་རིང་ཞུས་པ་དང་།  དེའི་རྗེས་ས་གནས་གཞོན་ནུ་ཚོགས་གཙོ་བློ་བཟང་བསྟན་པ་དང་།  བོད་རིགས་ཚོགས་པའི་ཚོགས་གཙོ་ཐུབ་བསྟན་འཕེལ་རྒྱས། བོད་ཀྱི་གྲོགས་པོ་ཚོགས་པའི་ཚོགས་གཙོ་ Inge Hermans། སྦར་སིལ་སྐུ་ཚབ་དོན་གཅོད་དངོས་གྲུབ་རྡོ་རྗེ། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་བཅས་ཀྱིས་ལས་འགུལ་དང་འབྲེལ་བའི་གཏམ་བཤད་གནང་བ་དང་། མཐར་མི་མང་གིས་བདེན་ཚིག་སྨོན་ལམ་སྐྱོར་བ་དང་བོད་རིགས་ཚོགས་པའི་ཚོགས་གཞོན་གཡང་འཛོམས་ནས་ཐུགས་རྗེ་ཆེ་གཏམ་བཤད་གནང་སྟེ། ཉིན་དེའི་ལས་འགུལ་མཇུག་བསྒྲིལ་ཡོད་འདུག

གནས་ཚུལ་མཁོ་གཏོང་བ་ས་དཀར་བཀྲ་ཤིས།