ཤེས་ཡོན་སྲིད་ཇུས་ནང་གསལ་དགེ་འོས་ཀྱི་འོས་ཆོས་རྩ་འཛིན་དགོས།

སྦེང་ལོར་བོད་ཁྱིམ་གྱི་དགེ་འོས་སྦྱོང་བརྡར་ལ་མཐོ་སློབ་རང་ནས་ལག་ཁྱེར་གསར་བཟོ་གནང་འདུག་པས། ཤེས་རིག་ལས་ཁུངས་ཀྱི་ངོས་འཛིན་ལག་ཁྱེར་ཕྱིར་བསྡུ་ཕྱིན་པ་ཞིག་ལས་འདི་ནས་ཕྱིར་འཐེན་ཞུས་པ་ཞིག་མ་ཡིན་”ཞེས་ཤེས་རིག་བཀའ་བློན་གྱིས་གསུངས་སོང་།

དེ་ཡང་ཟླ་འདིའི་ཕྱི་ཚེས་༡༩ ཉིན་གྱི་སྔ་དྲོ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་༤ པའི་ཉིན་ལྔ་པའི་སྟེང་། ཕྱི་ལོ་༢༠༠༨ དང་། ༢༠༡༠ གཉིས་སོ་སོའི་ནང་དྷ་ས་བོད་ཕྲུག་ཁྱིམ་སྡེ་ནས་མི་གྲངས་༣༥ ཙམ་ལ་སྔོན་འགྲོའི་དགེ་རྒན་འོས་སྦྱོང་སྤྲད་དེ་འོས་སྦྱོང་ཐོན་མཚམས། དགེ་འོས་ལག་ཁྱེར་སྟེང་ཤེས་རིག་ལས་ཁུངས་ཀྱི་ངོས་འཛིན་ཡོད་པའི་མཚན་རྟགས་མ་བཀོད་པའི་རྒྱུ་མཚན་ཅི་ཡིན་གྱི་ཐད་ལ། སྤྱི་འཐུས་འཇིགས་མེད་འབྱུང་གནས་ཀྱིས་སྐར་རྟགས་ཅན་གྱི་དྲི་བ་བཏང་བའི་ལན་དུ།

བཀའ་བློན་ཁྲི་པ་དང་ཤེས་རིག་བཀའ་བློན་གཅིག་ལྕོགས་བཀའ་ཁྲི་བློ་བཟང་སེང་གེས།

༡ ། “དྷ་ས་བོད་ཁྱིམ་ནས་སྔོན་འགྲོའི་དགེ་རྒན་འོས་སྦྱོང་སྤྲད་དེ་འོས་སྦྱོང་ཐོན་མཚམས། དགེ་འོས་ལག་ཁྱེར་སྟེང་ཤེས་རིག་ལས་ཁུངས་ཀྱི་ངོས་འཛིན་ཡོད་པའི་མཚན་རྟགས་མ་བཀོད་པའི་སྐོར་གླེང་སློང་ཡོང་གི་ཡོད་པའི་ཐད། དེ་སྔོན་ཕྱི་ལོ་༡༩༩༨ ལོར་དྷ་ས་བོད་ཁྱིམ་ནས་དྷ་སྟེང་བོད་ཁྱིམ་དུ་གཞི་རིམ་འོག་མའི་དགེ་འོས་ཁང་འཛུགས་རྒྱུར་ཤེས་རིག་ནས་ངོས་འཛིན་ཡོང་བ་ཞེས་སྔ་རྗེས་སྙན་སེང་ཞུས་དོན་ལྟར། སྤྱི་འགྲོའི་འགྲོ་སྟངས་བཞིན། བསླབ་གཞི་རྩ་འཛིན་དང་། དགེ་རྒན་འོས་ཆོས། འཛིན་ཁང་མཐུན་རྐྱེན་སོགས་ལ་ཞིབ་འཇུག་གནང་སྟེ་གནས་སྐབས་ཀྱི་ངོ་བོར་ངོས་བཞེས་གནང་བ་དང་འབྲེལ། ལག་ཁྱེར་ཡང་ཤེས་རིག་ལས་ཁུངས་ཀྱི་མཚན་བྱང་ཐོག་ཤེས་རིག་དང་། བོད་ཁྱིམ་གཉིས་ཀས་མཚན་རྟགས་བཀོད་རྒྱུ་བཅས་ཐུན་མོང་གིས་གཏན་འབེབས་ཐོག ཕྱི་ལོ་༢༠༠༨ ཟླ་ ༡༢ ཚེས་ ༡༢ བར་རྩ་འཛིན་ལག་བསྟར་གནང་ཡོད། དེ་བར་གྱི་དགེ་འོས་སློབ་ཐོན་རྣམས་ཀྱང་བོད་སློབ་འཛིན་ཚོགས་དང་འདི་གའི་ཁྱབ་ཁོངས་སློབ་གྲྭ་གཞན་གྱི་ནང་སློབ་དགེར་བསྐོ་བཞག་གནང་རྒྱུར་དཀའ་ངལ་བྱུང་མེད།

འོན་ཀྱང་གོང་གསལ་སློབ་གཉེར་ཁང་སྦེང་ལོར་སྤོས་རྗེས་འདི་གར་འདྲི་བསྡུར་སྙན་སེང་གང་ཡང་མེད་པར། དགེ་འོས་ལག་ཁྱེར་ཐོག་སྔར་ཡོད་ཤེས་རིག་ལས་ཁུངས་ཀྱི་མཚན་བྱང་ཕྱིར་བསྡུ་དང་འབྲེལ། མཐོ་སློབ་རང་ནས་ལག་ཁྱེར་གསར་བཟོ་གནང་སྟེ་འགྲེམས་སྤྲོད་གནང་འདུག དེར་བརྟེན། ཤེས་རིག་ལས་ཁུངས་ཀྱི་ངོས་འཛིན་རང་བཞིན་གྱིས་ཕྱིར་བསྡུ་ཕྱིན་པ་ཞིག་ལས་འདི་ནས་ཕྱིར་འཐེན་ཞུས་པ་ཞིག་མ་ཡིན་”ཞེས་དང་།

༢། ཡང་ཁོང་གིས“་སྦེང་ལོར་བོད་ཁྱིམ་གྱི་དགེ་འོས་སྦྱོང་བརྡར་གནང་བ་དེའི་ནང་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་བཙན་བྱོལ་བོད་མིའི་ཤེས་ཡོན་སྲིད་ཇུས་ཀྱི་ནང་དོན་དུ། སྔོན་འགྲོ་དང་གཞི་རིམ་འོག་མའི་དགེ་རྒན་གྱི་འོས་ཆོས་སུ་ཤེས་ཚད་ཉེ་བའི་གཙུག་ལག་རབ་འབྱམས་པ་Bachelor Degree ཐོན་པ་ཞིག་དགོས་པ་ལྟར་བྱུང་མེད་པ་དང་། ཤེས་རིག་ལས་ཁུངས་ནས་གྲོས་ཚོགས་ཀྱིས་གཏན་ལ་ཕབ་པའི་ཤེས་ཡོན་སྲིད་ཇུས་དེ་དག་ལག་བསྟར་བྱ་དགོས་པའི་ཆ་ནས། གཞུང་འབྲེལ་ངོས་འཛིན་དང་རྒྱབ་གཉེར་བཅས་རང་བཞིན་གྱིས་གནང་བདེ་གྱུར་མེད། རྩ་བས་ཤེས་ཡོན་སྲིད་ཇུས་ནང་གསལ་དགེ་འོས་ཀྱི་འོས་ཆོས་རྩ་འཛིན་གནང་དགོས་སྐོར། བོད་ཁྱིམ་སྤྱི་ཁྱབ་འགན་འཛིན་རྣམ་པར་འབྲེལ་བསྡུར་དང་བཀའ་ཁྱབ་སྔ་རྗེས་ཞུ་རྒྱུ་བྱུང་ཡོད་ཅེས་”བརྗོད་སོང་།