བཀའ་བློན་ཁྲི་པ་ཞེས་པའི་ཚིག་དེ་སྲིད་སྐྱོང་ཞེས་པར་གཏན་འབེབས།

དེ་རིང་སྤྱི་འཐུས་གྲོས་ཚོགས་ཀྱིས་ད་ལྟ་ང་ཚོའི་བཅའ་ཁྲིམས་ནང་དུ་བཀོལ་སྤྱོད་བྱེད་བཞིན་པའི་བཀའ་བློན་ཁྲི་པ་ཞེས་པའི་མིང་ཚིག་དེ། སྲིད་སྐྱོང་ཞེས་འབོད་རྒྱུའི་སྤྱི་མོས་ཀྱིས་གཏན་འབེབས་བྱས་ཡོད་པ་རེད།

དེ་ཡང་ཟླ་འདིའི་ཕྱི་ཚེས་༢༠ ཉིན་གྱི་ཕྱི་དྲོར་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་༤ པའི་ཉིན་དྲུག་པའི་སྟེང་། གཞུང་འབྲེལ་བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ཞིག་བདེ་སྲུང་བཀའ་བློན་འབྲོང་ཆུང་དངོས་གྲུབ་ཀྱིས་བཏོན་ཏེ། གྲོས་ཚོགས་སུ་སྤྱི་འཐུས་རྣམ་པས་ཁྲིམས་འཆར་དེའི་ཐོག་བགྲོ་གླེང་བྱས་ཏེ། སྲིད་སྐྱོང་གཏན་འབེབས་བྱས་ན་འགྲིག་མིན་སྣ་ཚོགས་གསུང་མཁན་བྱུང་ཡང་། མཐར་བཀའ་བློན་ཁྲི་པ་ཞེས་པའི་ཚབ་ཏུ་སྲིད་སྐྱོང་ཞེས་གྲོས་ཚོགས་ནང་སྤྱི་མོས་ཀྱིས་ཁྲིམས་འཆཪ་གཏན་འབེབས་བྱས་ཡོད་པ་རེད།།