དགུ་པའི་ཉེར་བདུན་ཉིན་མི་རབས་གསར་པའི་ལས་འགུལ་འགོ་བཙུགས་པ་རེད།

དེ་རིང་༡༩༨༧ ཕྱི་ཟླ་༩ ཚེས་༢༧ ཉིན་ལྷ་སར་བོད་མིས་རྒྱ་ནག་ལ་ངོ་རྒོལ་ཡར་ལངས་བྱས་ཏེ། ལོ་༢༥ འཁོར་བའི་དུས་དྲན་དེ་དགུ་བཅུ་གསུམ་ལས་འགུལ་ཚོགས་པའི་སྲུང་བརྩི་བྱས་ཡོད་པ་རེད།

དེ་ཡང་ཟླ་འདིའིི་ཚེས་༢༧ ཉིན་གྱི་ཞོགས་པ་དགུ་བཅུ་ལས་འགུལ་ཚོགས་པས་དྷ་ས་ལྷ་རྒྱལ་རིར་བསང་གསོལ་བཏང་བ་དང་། ཉིན་དེར་ཚོགས་པའི་དྲ་རྒྱ་སྒོ་འབྱེད་བྱས་ཡོད་པ་རེད། དགོང་མོ་མི་མང་གི་མར་མེའི་ཁྲོམ་སྐོར་ཞིག་གོ་སྒྲིག་བྱས་འདུག་ལ། ལས་འགུལ་དེའི་སྐོར་དགུ་བཅུ་གསུམ་ཚོགས་པའི་ཚོགས་གཞོན་ཀླུ་མཁར་བྱམས་ཀྱིས་འགྲེལ་བརྗོད་གནང་དོན། “༡༩༨༧ ལོའི་ཟླ་༩ ཚེས་༢༧ ཉིན་ལྷ་ས་ནས་འབྲས་སྤུངས་ཀྱི་གྲྭ་པ་ཉི་ཤུ་ཙམ་གྱིས་སྣེ་ཁྲིད་དེ། ལས་འགུལ་ཆེན་པོ་བྱུང་བ་རེད། དེ་ང་ཚོའི་རྒྱལ་ས་ལྷར་སར་མི་རབས་གསར་པའི་ལས་འགུལ་མགོ་བཙུགས་པ་རེད་ཟེར་གྱི་ཡོད་པ་རེད། དེའི་སྐབས་ཀྱི་འབོད་ཚིག་རྒྱ་མི་བོད་ནས་ཕར་ལོག་དགོས་པ་དང། བོད་རང་བཙན་ཡིན་པའི་སྐོར་རེད། དེ་རིང་གི་ལས་འགུལ་གྱི་རྣམ་པ་ཆུང་ཆུང་ཞིག་རེད་མོད། དགུ་པའི་ཉེར་བདུན་གྱི་ལས་འགུལ་འདི་དོན་སྙིང་ཆེན་པོ་ཡིན་པ་ཤེས་དགོས་པ་རེད། ལས་འགུལ་འདིའི་ནང་ཞུགས་མཁན་རྒྱལ་གཅེས་དཔའ་བོ་དཔའ་མོ་དེ་ཚོར་རྒྱ་ནག་གཞུང་གིས་མནར་གཅོད་བཏང་བ་ནས། བཙོན་འོག་ཏུ་ག་ཚོད་སོང་ཡོད་པ་རེད། དེ་ཚོ་ཤེས་དགོས་པ་གལ་ཆེན་པོ་འདུག་”ཅེས་གསུངས་སོང་།

༡༩༨༧ འདི་གའི་གསར་འགོད་པས་ལོ་དང་ད་ལྟའི་ལས་འགུལ་བསྡུར་ན་ནུས་ཤུགས་ལ་ཁྱད་པར་ཡོད་མེད་སྐོར་ཀླུ་མཁར་བྱམས་ལ་བཅར་འདྲི་ཞུས་པར། ཁོང་གིས། “བོད་ནང་ལ་མཚོན་ན་ལས་འགུལ་ཤུགས་ཇེ་ཆེར་སོང་འདུག་ཟེར་གྱི་ཡོད་པ་རེད།  ༡༩༨༧ དང་༡༩༨༨ ལོའི་སྐབས་ལས་འགུལ་དེ་ལྷ་ས་གཅིག་པུ་ལྟ་བུ་རེད། དེ་རྗེས་ལས་འགུལ་མང་པོ་བྱུང་བ་རེད། ༢༠༠༨ ལོ་ནས་བོད་ཆོལ་ཁ་གསུམ་ནས་ལས་འགུལ་ཤུགས་ཆེན་བྱུང་བ་རེད། ད་ལྟ་བོད་ཕྱི་ནང་གཉིས་ནས་རང་ལུས་མེར་སྲེག་གཏོང་རྒྱུའི་ལས་འགུལ་སླེབས་ཚར་པ་རེད། དེར་བརྟེན་ལས་འགུལ་གྱི་རྩ་བའི་ངར་ཤུགས་མར་ཆག་མི་འདུག་མོད། ལས་འགུལ་འདི་འདྲའི་འགྲོ་སོང་བཏང་། ཚེ་སྲོག་མང་པོ་བཏང་བ་ལ་ལྟོས་ན་གྲུབ་འབྲས་ཆེན་པོ་ཐོབ་མི་འདུག ཡིན་ཡང་མང་ཚོགས་ཀྱི་ངོས་ནས་བློས་གཏོང་མར་ཆག་གི་མི་འདུག་”ཅེས་གསུངས་སོང་།