བོད་གཞུང་མང་གཉིས་ནས་བརྟན་བཞུགས་བསྟར་འབུལ།
དེ་རིང་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པའི་བླ་ཆེན་དབུ་ཁྲིད་རྣམ་པ་དབུ་བཞུགས་ཐོག བོད་གཞུང་མང་གཉིས་ནས་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་རྣམ་གྲྭ་མཁན་རིན་པོ་ཆེ་དབུ་བཞུགས་ཐོག་རྣམ་གྲྭ་ཕན་བདེ་ལེགས་བཤད་གླིང་ཆོག་གྲྭ གནས་ཆུང་དང་བསྟན་མའི་སྐུ་རྟེན་རྣམ་གཉིས། བླ་སྤྲུལ་དང་བསྙེན་མཚམས་པ་ཁག་གཅིག་བཅས་ཀྱིས་སྐུའི་ཚེ་སྒྲུབ་སྔོན་དུ་བཏང་སྟེ། ཟླ་འདིའི་ཚེས་༢༨ ཉིན་གྱི་ཞོགས་པ་རྡོ་རྗེ་སློབ་དཔོན་༧ས་སྐྱ་བདག་ཁྲི་རིན་པོ་ཆེ་མཆོག་དབུ་བཞུགས་ཀྱིས་ཆོག་གྲྭ་འདུས་ཚོགས་ནས་སྐུའི་ཚེ་སྒྲུབ་གསུང་ཆོག་གནང་གྲུབ་མཚམས་ཆུ་ཚོད་ ༨།༣༠ ཐོག་རྣམ་གྲྭའི་དགེ་འདུན་པས་སེང་སྦྲེངས་བསྟར་སྒྲིག་ཞུས་ཐོག་ཆེས་མཐོའི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་། སྲིད་སྐྱོང་བློ་བཟང་སེང་གེ་བཅས་ཀྱིས་སྤོས་སྣེས་སྔོན་བསུས་ཏེ། ༧གོང་ས་༧སྐྱབས་མགོན་ཆེན་པོ་ཕོ་བྲང་གཟིམ་ཆུང་ནས་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་གདན་ཞུས་ཀྱིས་བཞུགས་ཁྲི་རིན་པོ་ཆེར་ཞབས་སོར་འཁོད་མཚམས་ས་སྐྱ་བདག་ཁྲི་རིན་པོ་ཆེ་མཆོག་དང། སྟག་ལུང་རྩེ་སྤྲུལ་རིན་པོ་ཆེ། སྨན་རི་ཁྲི་འཛིན་རིན་པོ་ཆེ། རྒྱལ་བ་ཀརྨ་པ་རིན་པོ་ཆེ། འབྲི་གུང་ཆེ་ཚང་རིན་པོ་ཆེ་མཆོག དགའ་ལྡན་ཁྲི་རིན་པོ་ཆེ་མཆོག མཁན་པོ་འཇིགས་མེད་རྡོ་རྗེ་མཆོག མང་གཙོའི་ཀ་བ་གསུམ་གྱི་མཛད་གཙོ་རྣམ་པས་གཙོས་བོད་མི་མང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་རྣམ་པ། དམིགས་བསལ་ཚོགས་ཆེན་དུ་ཕེབས་པའི་ཚོགས་བཅར་བ་རྣམ་པ། སེར་སྐྱ་མི་མང་རྣམ་པ། དེ་བཞིན་སློབ་ཕྲུག་བཅས་མཉམ་ཞུགས་ཞུས་ཡོད་པ་རེད།
རྡོ་རྗེ་སློབ་དཔོན་ས་སྐྱ་བདག་ཁྲི་རིན་པོ་ཆེས་ཚེ་མདའ་སློབ་དཔོན་ལ་འབུལ་ལམ་ཞུས། དབུ་བཞུགས་སློབ་དཔོན་མཆོག་གིས་གསོལ་འདེབས་མཎྜལ་ལྗགས་བཤད་སྐབས་སྲིད་སྐྱོང་བློ་བཟང་སེང་གེ་དང་། སྤྱི་འཐུས་ཚོགས་གཙོ་སྤེན་པ་ཚེ་རིང་རྣམ་གཉིས་ཀྱིས་མཎྜལ་ཚོམ་བུ་ཟུར་འདེགས་ཞུསས་ཡོད་པ་རེད། དེ་ནས་གཏང་རག་མཎྜལ་ཆོས་རིག་བཀའ་བློན་པདྨ་ཆོས་འབྱོར་གྱིས་འདེགས་འབུལ་དང་། མཇུག་ཏུ་བདེན་ཚིག་སྨོན་ལམ་བཅས་གསུངས་ཏེ་བརྟན་བཞུགས་མཛད་སྒོ་དངོས་གཞི་ལེགས་པར་ གྲུབ་ནས་༧གོང་ས་མཆོག་ཕོ་བྲང་དུ་ཆིབས་བསྒྱུར་གནང་ཡོད་པ་རེད།།
