འཛམ་གླིང་གི་སྙིང་ནད་སྔོན་འགོག་ཉིན་མོ་སྲུང་བརྩི།
ཕྱི་ཟླ་༠༩ ཚེས་༢༩ ཉིན་གྱི་སྔ་དྲོ་ཆུ་ཚོད་༡༠ པའི་ཐོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་ས་གནས་འཕྲོད་བསྟེན་སྨན་ཁང་གི་གོ་སྒྲིག་འོག འཛམ་གླིང་སྙིང་ནད་བཅོས་ཐབས་སམ་སྔོན་འགོག་གི་ཉིན་མོ་ཞེས་པ་སྲུང་བརྩི་བྱས་ཡོད་པ་རེད།
ཚོགས་ཐོག་ཏུ་ས་གནས་འགོ་འཛིན་བསོད་ནམ་བསྟན་འཛིན་དང་ས་གནས་འཕྲོད་བསྟེན་འགན་འཛིན་སྤེན་པ་བླ་བྲང་གཉིས་གཙོས། མོན་གྷོ་ས་གནས་གཞིས་གྲོང་ཁག་དང་གྲྭ་ཚང་ཁག་གི་སྤྱི་མི་ཕྱག་མཛོད་རྣམ་པ། 
དེ་བཞིན་གཞིས་གྲོང་ཁག་དགུའི་མི་མང་བཅས་མཉམ་འཛོམས་བྱས་ཡོད་པ་རེད། ཐོག་མར་ས་གནས་འཕྲོད་བསྟེན་སྨན་ཁང་གི་འགན་འཛིན་སྤེན་པ་བླ་བྲང་གིས་ཉིན་འདིའི་དུས་དྲན་སྲུང་བརྩི་དང་འབྲེལ་བའི་སྐོར་ལ་གཏམ་བཤད་གནང་སྐབས། ཕྱི་ཟླ་༠༩ པའི་ཚེས་༢༨ ཉིན་འཛམ་གླིང་ཁྱིའི་ནད་དམ་མཆེ་དུག་སྨྱོ་ནད་སྔོན་འགོག་གི་ལས་གཞི་དང་འབྲེལ་བའི་དུས་དྲན་སྲུང་བརྩི་བྱེད་ཀྱི་ཡོད་པ་རེད། དེ་བཞིན་ཕྱི་ཟླ་༩ པའི་ཚེས་༢༩ ཉིན་འཛམ་གླིང་སྙིང་ནད་ཉོན་མོ་སྲུང་བརྩི་བྱེད་ཀྱི་ཡོད་བ་བཞིན་དེ་རིང་འདི་ག་འཕྲོད་བསྟེན་སྨན་ཁང་གིས་ངོས་ནས་སྟབས་གཅིག་དོན་གཉིས་བྱས་ནས་དུས་དྲན་ཁག་གཉིས་མཉམ་དུ་དུས་ཚོད་ཆུད་གཟོས་མི་འགྲོ་བའི་ཆེད་དུས་གཅིག་ལ་གོ་སྒྲིག་བྱས་པ་ཡིན་ཞེས་སོགས་ན་ཚ་སྔོན་འགོག་དང་འབྲེལ་བའི་སྐོར་གསུངས་སོང་།
དེ་རྗེས་འཕྲོད་བསྟེན་སྨན་པ་བསྟན་འཛིན་ནོར་བཟང་གིས་ནད་གཞི་དེ་གཉིས་སྔོན་འགོག་དང་འཕྲོད་བསྟེན་ཇི་ལྟར་བྱེད་དགོས་མིན་སྐོར་གྱི་གློག་བརྙན་གཟིགས་འབུལ་དང་སྦྲགས་ལམ་སྟོན་གནང་དོན། སྤྱིར་བཏང་སྙིང་གི་ན་ཚ་ལ་མཚོན་ན།
ནད་རྟགས་རིགས་འདྲ་མིན་ཡོད་པ་རེད། ཕལ་ཆེ་བའི་སོ་སོར་ན་ཚ་དེ་འདྲ་ཞིག་ཡོད་མེད་ཀྱང་ཤེས་ཀྱི་ཡོད་པ་མ་རེད། གློ་བུར་དུ་རྒྱུ་རྐྱེན་འདི་ཡིན་འདི་མིན་གྱི་སྐད་ཆ་ཙམ་ཡང་བཤད་ཁོམ་མེད་པར། འདས་གྲོངས་སུ་འགྲོ་ཡི་ཡོད་པ་དེ་ཚོའི་རིགས་ཕལ་ཆེ་བ་སྙིང་གི་ན་ཚ་ཡོད་པ་རེད། ཁ་ཤས་ཀྱི་སྙིང་ལ་ན་ཟུག་ཆེན་པོ་བརྒྱབ་ནས་འདས་གྲོངས་འགྲོ་ཡི་ཡོད་པ་དེ་འདྲ་ཡང་ཡོད་རེད། གང་ལྟར་སྙིང་གི་ན་ཚ་ནི་ཧ་ཅང་ཉེན་ཁ་ཆེན་པོ་རེད་ཅེས་དང་། མིའི་གཟུགས་ཁམས་འཕྲུལ་ཆས་ནང་བཞིན་ཡིན་སྐོར་དང་། དུས་རྒྱུན་ཤིང་ཏོག་གི་རིགས་གང་མང་བཟའ་བཏུང་བྱེད་དགོས་པ་དང་། ལྷག་པར་དུ་སྙིང་གི་ན་ཚ་ལ་ཟ་མ་སྣུམ་ཆེན་གྱིི་རིགས་རྩ་བ་ཉིད་ནས་བཟའ་མི་རུང་བའི་ཡིད་གཟབ་གནང་དགོས་གལ་ཆེན་པོ་རེད་ཅེས་སོགས་གསུངས་སོང་།
ཡང་ཁོང་གིས་ཁྱིའི་སོ་བརྒྱབ་ནས་ན་བ་ཡིན་ན་ཧ་ཅང་ཉེན་ཁ་ཆེན་པོ་རེད། ཁྱིའི་བདག་པོ་ཚོའི་ངེས་པར་དུ་ཁྱི་ལ་སྔོན་འགོག་གི་ཁབ་རྒྱབ་དགོས་པ་རེད། དེང་སང་ང་ཚོ་ས་གནས་མོན་གྷོར་གཅིག་པུར་ཆ་བཞག་པ་ཡིན་ན་ལོ་གཅིག་གཉིས་ནང་ ཁྱིས་སོ་རྒྱབ་བཞག་པ་དེ་འདྲ་མང་པོ་ཡོང་གི་འདུག ཡིན་ནའང་སྟབས་ལེགས་པ་ཞིག་ལ། ནད་པ་དེ་དག་མྱུར་མོལ་སྨན་ཁང་དུ་སྐྱེར་ཐུབ་པར་བརྟེན། ད་ལྟའི་བར་འདས་གྲོངས་སོང་བ་དེ་འདྲ་གཅིག་ཀྱང་བྱུང་ཡོད་པ་མ་རེད་ཅེས་སོགས་གསུངས་སོང་།
མོན་གྷོ་གསར་འགོད་པས།
