བོད་ཀྱི་ཐེབས་རྩས་རྒྱ་རི་རིན་པོ་ཆེར་གཟེངས་རྟགས་ཕུལ་བ།
ཟླ་འདིའི་ཚེས་༢ ཉིན་ཨ་རིའི་གྲོང་ཁྱེར་ནེའུ་ཡོག་གི་གྲགས་ཅན་གསོལ་མགྲོན་ཁང་ཞིག་ཏུ་བོད་ཀྱི་ཐེབས་རྩ་གསར་འཛུགས་བྱས་ནས་ལོ་༣༡ འཁོར་བའི་དགའ་སྟོན་གྱི་མཛད་སྒོ་དང་སྟབས་བསྟུན། ༧གོང་ས་མཆོག་གི་དམིགས་བསལ་སྐུ་ཚབ་ཟུར་པ་དང་བཀའ་ཟུར་རྒྱ་རི་རིན་པོ་ཆེ་མཆོག་ལ་ཆེ་བསྟོད་ཀྱི་གཟེངས་རྟགས་ཤིག་འབུལ་ལམ་ཞུས་ཡོད་པ་རེད།
དེ་ཡང་ཨ་རིའི་བོད་ཀྱི་ཐེབས་རྩ་ཁང་ནས་གནས་ཚུལ་བཏང་འབྱོར་བྱུང་བ་ལྟར་ན། ཨ་རི་བོད་ཀྱི་ཐེབས་རྩ་ནས། ད་བར་བཙན་བྱོལ་གཞུང་དམངས་གཉིས་དང༌། བོད་བཅས་པར་བུ་ཕྲུག་གི་ཤེས་ཡོན་དང༌། མང་ཚོགས་ཀྱི་འཕྲོད་བསྟེན། རིག་གཞུང་གཅེས་སྐྱོང༌། གཞན་ཡང་རྒས་གསོ་ཁང་དང་། ཆུ་གློག ལས་ཤག སྤྱི་ཁང་གསར་རྒྱག 
ཞིང་ལས་སོགས་ལས་གཞི་མང་པོའི་ཐོག་མཐུན་འགྱུར་ཞབས་འདེགས་ཞུས་ནས་ལོ་ངོ་༣༡ འཁོར་བའི་དགའ་སྟོན་ཆེད་ཕྱི་ལོ་༢༠༡༢ ཟླ་༡༠ ཚེས་༢ ཉིན་གྲོང་ཁྱེར་ནིའུ་ཡོག་གི་གྲགས་ཅན་གསོལ་མགྲོན་ཁང་(Le Cirque)ཞེས་པའི་ནང་ཆེས་སྙན་གྲགས་ཅན་གྱི་མ་བྱན་ཆེན་མོ་(Master Chef Eric Ripert)དང༌། ཁོང་གི་ཕྱག་རོགས་ལྔ་བཅས་ཁྱོན་སྐད་གྲགས་ཅན་གྱི་མ་བྱན་ཆེན་མོ་དྲུག་ཐུན་མོང་ནས་ཟས་བཅུད་ཕུན་སུམ་ཚོགས་པའི་ལག་རྩལ་མཉམ་འདོན་གྱིས་འདེགས་འབུལ་ཞུས་པའི་མཛད་སྒོའི་ཐོག་ཨ་རི་གཞུང་གི་བོད་དོན་འབྲེལ་མཐུད་སྐུ་ཚབ་ཟུར་པ་(Ambassador Paula Dobriansky) པའུ་ལ་དྷོབྷི་རིཡིན་སིཀི་མཆོག་དང༌། རང་གཞུང་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་ལགས། མང་གཙོ་ཚོགས་པའི་གཙོ་འཛིན་གྲོས་ཚོགས་འོག་མའི་འགོ་ཁྲིད་(Congresswoman Nancy Pilosi) ལྕམ་སྐུ་ནེན་སི་པི་ལོསི་མཆོག གྲོས་ཚོགས་འོག་མའི་འཐུས་མི་ལྕམ་སྐུ་(Congresswoman Nita Lowey) ནིཏ་ལོ་ཝི་མཆོག གྲགས་ཅན་གློག་བརྙན་འཁྲབ་སྟོན་པ་སྐུ་ཞབས་(Richard Gere) རིཅྰཌ་གྷེ་ཡར་གཏན་ཞལ་གཙོས་བོད་དོན་ལ་ཐུགས་སྣང་ཅན་གྱི་གནད་ཡོད་མི་སྣ་ཚོགས་པའི་དབུས་སུ། ༧གོང་ས་མཆོག་གི་དམིགས་བསལ་སྐུ་ཟུར་པ་བཀའ་ཟུར་རྒྱ་རི་རིན་པོ་ཆེ་མཆོག་གི་མཛད་རྗེས་ལ་གཟེངས་བསྟོད་ཀྱི་བྱ་དགའ་ཞིག་ཀྱང་ཕུལ་ཞིང༌།
མཛད་སྒོའི་ཐོག་སྐུ་ཞབས་རི་ཅྰཌ་གྷེ་ཡར་དང༌། གྲོས་ཚོགས་ཀྱི་དབུ་ཁྲིད་ལྩམ་སྐུ་ནེན་སི་པོ་ལོ་སི། བོད་ཀྱི་ཐེབས་རྩའི་ཚོགས་གཙོ་མི་ཀི་ལེམ་ལི་(Mickey Lemle) བཅས་ནས་རྒྱ་རི་རིན་པོ་ཆེའི་མཛད་རྗེས་ལ་བསྔགས་བརྗོད་ཀྱི་གསུང་བཤད་རིམ་པ་གནང་རྗེས། ཐེབས་རྩའི་འགན་འཛིན་ཚོགས་མི་རྣམས་སྡིངས་ཆར་ཕེབས་ཏེ་བཀའ་ཟུར་མཆོག་ལ་གཟེངས་རྟགས་འབུལ་བཞེས་སྐབས། སྐུ་མགྲོན་རྣམས་ཀྱིས་སྐུ་བཞེངས་གནང་སྟེ་དགའ་བསུ་ཞུས་བསྟུན་རིན་པོ་ཆེ་མཆོག་ནས་གསུང་བཤད་ཟབ་རྒྱས་གནང༌བ་བཅས་མཛད་སྒོ་ཐོག་མཐའ་བར་གསུམ་གཟི་བརྗིད་ལྡན་པ་བྱུང༌འདུག
བོད་ཀྱི་ཐེབས་རྩའི་གཙོ་འཛིན་རིན་ཆེན་དར་ལོ་ལགས་ནས་མཛད་སྒོ་དེ་དང་འབྲེལ་བའི་བཀའ་ཟུར་རྒྱ་རི་རིན་པོ་ཆེའི་མཛད་རྗེས་སྐོར་ངོ་སྤྲོད་གནང་དོན། ཐེངས་འདིའི་གཟེངས་རྟགས་བཀའ་ཟུར་རྒྱ་རི་རིན་པོ་ཆེ་མཆོག་ལ་འབུལ་དགོས་པའི་རྒྱུ་མཚན་ནི། ཁོང་གིས་ད་ཕན་ལོ་ངོ་བཅུ་ཕྲག་བཞིའི་རིང་གོང་ས་སྐྱབས་མགོན་ཆེན་པོའི་དབུ་འོག་དཔུང་འདེགས་ཀྱིས་བོད་དང་བོད་མིའི་ཆེད་དུ་ཞབས་འདེགས་རླབས་ཆེན་ཞུས་ཡོད་པ་དེ་ཡང༌། ཐོག་མར་ཤེས་བྱ་དུས་དེབ་ཀྱི་རྩོམ་སྒྲིག་འགན་འཛིན་དང༌། ༡༩༧༠ ལོར་བོད་ཀྱི་གཞོན་ནུ་ལྷན་ཚོགས་ཐེངས་དང་པོའི་ཚོགས་སྐོང་འགན་འཛིན་ཚོགས་མི་དང༌རྗེས་སུ་དབུས་གཞོན་ནུའི་རྒྱུན་ལས་ཀྱི་ཚོགས་གཙོའི་འགན་འཁུར་གནང༌། དེ་ནས་བོད་མི་མང་སྤྱི་འཐུས་ཚོགས་གཙོའི་ཐུགས་འགན་བཞེས་པ་མ་ཟད། བཀའ་ཤག་ནང་བཞུགས་ནས་ཤེས་རིག་དང༌། ཆོས་དོན། འཕྲོད་བསྟེན། ཕྱི་དྲིལ་བཅས་ལྷན་ཁང་ཆེ་ཁག་བཞིའི་བཀའ་བློན་གྱི་ཐུགས་འགན་སྔ་རྗེས་རིམ་པར་བཞེས། ལྷག་པར་དུའང༌ཕྱི་དྲིལ་བཀའ་བློན་གནང་པའི་སྐབས་བོད་དོན་རྒྱལ་སྤྱིའི་སྡིངས་ཆར་སླེབས་ཐབས་སུ་ཉི་ཧོང་དང༌། ཨ་རི། ཡུ་རོབ་བཅས་པའི་རྒྱལ་ཁབ་མང་པོར་ཕེབས་ཏེ། རྒྱལ་ཁབ་སོ་སོའི་དབུ་ཁྲིད་ཆེ་ཁག་དང་ལྷག་པར་གྲོས་ཚོགས་འཐུས་མི་རྣམས་ལ་འབྲེལ་ལམ་གསར་གཏོད་རྒྱ་ཆེར་མཛད།
ཕྱི་ལོ་༡༩༨༧ ལོར་གོང་ས་མཆོག་ནས་ཨ་རིའི་གྲོས་ཚོགས་ནང་ཞི་བདེ་སྔོན་འགྲོའི་གྲོས་འཆར་དོན་ཚན་ལྔ་དང༌། ༡༩༨༨ ལོར་ཡུ་རོབ་གྲོས་ཚོགས་ནང་རྒྱ་བོད་ཞི་མོལ་གྱི་གཞི་རྩ་ལམ་དབུ་མའི་སྒྲོམ་གཞི་གསལ་བསྒྲགས་བསྐྱངས་པའི་དུས་སྐབས། དེ་བཞིན་༡༩༨༩ ལོར་༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་སྐབས་ཕྱི་དྲིལ་ལྷན་ཁང་གི་མཛད་འགན་གྱི་ངོ་བོའི་ཐོག་ནས་ཆིབས་ཞབས་སུ་བཅར་ཏེ་དབུ་འོག་དཔུང་འདེགས་ཀྱི་ཞབས་འདེགས་འཐུས་གཙང་ཞུས།
ལྷག་པར་ཨ་རི་གཙོ་གྱུར་ཡུ་རོབ་ཀྱི་རྒྱལ་ཁབ་མང་པོའི་གྲོས་ཚོགས་ནང་བོད་དོན་གྲོས་ཆོད་འབྱུང་ཐབས་སུ་འབད་བརྩོན་སྔ་རྗེས་རིམ་པ་གནང་པའི་དོན་འབྲས་ལ་བརྟེན་ནས་བོད་ཀྱི་རྩ་དོན་ལ་དྲིལ་བསྒྲགས་ཤུགས་ཆེ་དང་ཕན་རླབས་ཆེན་པོ་བྱུང༌། རྒྱལ་ཁབ་མང་པོའི་ནང་བོད་དོན་རྒྱབ་སྐྱོར་ཚོགས་པ་གསར་འཛུགས་ལམ་སྟོན་ཐོག བཞུགས་སྒར་དྷ་རམ་ས་ལར་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དང་པོ་སྐོང་ཚོགས་གནང།
ཕྱི་ལོ་༡༩༠ ནས་བཟུང་རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འཛིན་གྱི་འགན་འཁུར་བཞེས། དུས་དེ་ནས་བཟུང་ཨ་རིའི་སྲིད་འཛིན་བྷུ་ཤི་རྒན་པ་དང། དེ་རྗེས་སྲིད་འཛིན་བྷིལ་ཁི་ལིན་ཊོན། བྷུ་ཤི་ཆུང་བ་བཅས་པར་ཕོ་བྲང་དཀར་པོའི་ནང་གོང་ས་སྐྱབས་མགོན་ཆེན་པོ་མཆོག་དང་མཇལ་འཕྲད་སྔ་རྗེས་ཀྱི་གོ་སྒྲིག་མཛད། ཨ་རིའི་གྲོས་ཚོགས་ནས་བོད་མི་ཆིག་སྟོང་ཐམ་པ་ཨ་རིར་ཡོང་ཆོག་པའི་དམིགས་བསལ་གྲོས་ཆོད་བཞག་པ་གཞིར་བཟུང་སྐབས་དེར་འགན་འཁུར་རྐང་ལེན་བྱེད་པོ་སྐུ་ཞབས་Ed Bednar དང་ཕྲན་སྐབས་དེའི་སྐུ་ཚབ་དོན་གཅོད་གཉིས་ལ་སློབ་སྟོན་དང་འཕྱར་གྲུ་མཉམ་འདེགས་ཀྱིས་ལས་དོན་གྲུབ་འབྲས་མིག་མཐོང་ལག་ཟིན་བྱུང་ཞིང། ཕྱི་ལོ་༢༠༠༠ ལོར་རྒྱལ་ས་ཝ་ཤིང་ཊོན་གྱི་ National Mall ཐང་ཆེན་དུ་ Tibetan Folk Life Festival ཞེས་པའི་དམངས་ཁྲོད་ཀྱི་དུས་སྟོན་གོ་སྒྲིག་སྐབས་འགན་འཁུར་མཉམ་ལེན་མཛད། ༢༠༠༧ ལོར་ཨ་རིའི་གྲོས་ཚོགས་ནས་གོང་ས་མཆོག་ལ་གསེར་གྱི་གཟེངས་རྟགས་འབུལ་བཞེས་གནང་པའི་སྐབས་སྲིད་འཛིན་བྷུ་ཤི་གཙོས་པས་གཞུང་གི་དབུ་ཁྲིད་ཡོངས་ནས་གུས་བསྟོད་ཀྱི་མཛད་སྒོ་གཟབ་གཟེངས་འབྱུང་ཐབས་སུ་ཨ་རིའི་གྲོས་ཚོགས་མི་སྣའི་ལྷན་དུ་ཐུགས་འགན་ཆེ་བཞེས་མཛད། རྒྱུན་དུ་ཨ་རིའི་གྲོས་ཚོགས་དང་ཕྱི་སྲིད་ལས་ཁུངས་སོགས་སུ་འབྲེལ་མཐུད་སྔ་རྗེས་གནང་པའི་གྲུབ་འབྲས་ལ་བརྟེན་ནས། བོད་ཀྱི་རྩ་དོན་ལ་སྨན་པའི་གྲོས་ཆོད་སྤྱི་དང་། ལྷག་པར་བཙན་བྱོལ་བོད་མིའི་བདེ་དོན་དང་ཤེས་ཡོན་གྱི་ཐོག་ལ་རོགས་རམ་རྒྱ་ཆེ་ཐོབ་དང་ཐོབ་བཞིན་པ་སྨོས་མེད་ཐོག དམིགས་བསལ་སྐུ་ཚབ་ཀྱི་མཚན་ཐོག་ནས་རྒྱ་བོད་ཞི་མོལ་གྱི་འགན་འཁུར་རྐང་བཞེས་གནང་པ་བཅས་གཟེངས་སུ་ཐོན་པའི་མཛད་རྗེས་ལ་རྗེས་སུ་ཡི་རངས་ཞུ་བཞིན་པའི་ཐོག་ནས་བསྔགས་བརྗོད་ཞུ་གི་ཡོད།
གསོལ་སྟོན་དེའི་དེའི་སྐབས་གསོལ་ལྕོག་ཆེ་བ་རེར་ཞལ་འདེབས་ཨ་སྒོར་སྟོང་ཕྲག ༢༥ དང༌། དེ་འོག་རྣམས་ལ། ཨ་སྒོར་༡༥༠༠༠ ཞབས་སྟེགས་རེ་ལ་ཨ་སྒོར་༡༠༠༠ རེར་གཏན་འབེབས་བྱས་པ་ལྟར་གསོལ་མགྲོན་ཁང་གི་ཞབས་སྟེགས་ཡོངས་རྫོགས་ཚོང་བྲིན་ཐུབ་པ་བྱུང་ཡོད་པ་མ་ཟད། མཛད་སྒོའི་ཐོག་ཨ་རི་བ་རོལ་དབྱངས་མཁས་པ་གྲགས་ཅན་Stanlay Jordon དང༌། བོད་ཀྱི་ཟློས་གར་ཟུར་པ་པ་སངས་སྒྲོལ་མ་ལགས་དང། སློབ་བུ་བསྟན་འཛིན་གོ་ཆ། ཟློས་དགེ་ཟུར་པ་ཚེ་རིང་ཕུན་ཚོགས་ལགས་བཅས་ནས་བོད་ཀྱི་ཐུན་མོང་མ་ཡིན་པའི་གླུ་གཞས་གཟིགས་འབུལ་ཞུས་པའི་ཐོག པར་པ་དང༌། རི་མོ་བ་མཁས་པ། གཞན་ཡང་རང་མི་ལྷ་བྲིས་པ་སོགས་སྒྱུ་རྩལ་མཁས་པའི་མི་སྣ་ཁག་གཅིག་གིས་ཀྱང་རང་རང་གི་ཐུན་མོང་མ་ཡིན་པའི་རིན་ཐང་ཅན་གྱི་དངོས་རྫས་མང་པོ་ཞལ་འདེབས་གནང་སོན་བྱུང་བ་རྣམས་བོད་ཀྱི་ཐེབས་རྩ་ཁང་གི་ལས་དོན་ལ་རྒྱབ་སྐྱོར་ཆེད་གོང་ཚད་འགྲན་བསྡུར་གྱིས་ཚོང་འགྲེམས་ཞུས། གསོལ་སྟོན་འདི་ཐོག་ནས་བོད་ཀྱི་ཐེབས་རྩའི་ཆེད་ཨ་སྒོར་འབུམ་གཉིས་(༢༠༠༠༠༠)ཙམ་འདུ་འགོད་ཐུབ་པ་བྱུང་ཞིང་། དེ་རིང་གི་གོ་སྐབས་འདི་བཟུང་ནས་བཀའ་ཟུར་རྒྱ་རི་རིན་པོ་ཆེས་གཙོས་པའི་སྐུ་མགྲོན་དང༌། མཐུན་འགྱུར་རོགས་རམ་གནང་མཁན་ཡོངས་ལ་ཐུགས་རྗེ་ཆེ་ཞེས་ཞུ་རྒྱུ་ཡིན་ཞེས་གསུངས་ཡོད་པ་རེད།།
