ནེའུ་ཛེ་ལེནཊེར་བདེན་པའི་མེ་ལྕེ་སྐོར་སྐྱོད།

ཟླ་འདིའི་ཚེས་༨ དགོང་དྲོ་ཆུ་ཚོད་ ༦་༣༠ ཐོག་བོད་ཀྱི་བདེན་པའི་མེ་ལྕེ་དེ་ ནེའུ་ཛེ་ལེནཊའི་གྲོང་ཁྱེར་ཆཱེན་མོ་ཨོག་ལེནཊ་ཡི་གནམ་ཐང་དུ་འབྱོར་བ་དང་། སྐབས་དེར་ཕེབས་བསུར་ཆེད་དུ་བོད་ཆས་ལེགས་པར་མནབས་པའི་འདི་ཁུལ་བོད་རིགས་ཚོགས་པའི་ཚོགས་གཙོ་བགྲེས་གཞོན་དང་ཚོགས་མི། བོད་ཀྱི་གྲོགས་པོ་ཚོགས་པའི་འཐུས་མི། རྒྱ་བོད་མཐུན་ཚོགས་ཀྱི་ཚོགས་གཙོ་ཕེབས་བསུར་བཅར་དེ། དེ་མཛད་སྒོ་སྟབས་བདེ་ཞིག་འཚོགས་ཡོད་པ་རེད།

སང་ཉིན་སྤྱི་ཚེས་ ༩ རེས་གཟའ་མིག་དམར་གྱི་སྔ་དྲོའི་ ཆུ་ཚོད་ ༡༡། ༤༥ ཐོག་འདི་ཁུལ་བོད་མི་ཡོངས་དང་བོད་དོན་རྒྱབ་སྐྱོར་བ་ཚོ་མཉམ་དུ་མི་ཚོགས་ཆེ་བའི་གྲོང་ཁྱེར་ཨ་མའི་Aotea Square  མདུན་ཐང་ནས་འགོ་བཙུགས་ཏེ་ཁྲོམ་གཞུང་དཀྱིལ་ནས་བདེན་པའི་མེ་ལྕེ་སྐོར་སྐྱོད་བྱ་རྒྱུ་དང་། དེ་སྐབས་གཙོ་བོ་བོད་རིགས་ཚོགས་གཙོ་ཐུབ་བསྟན་ལགས་དང་གནད་ཡོད་མི་སྣ་རེ་ཟུང་གིས་གཏམ་བཤད་གནང་རྒྱུ་དང་ཆབས་ཅིག་ཡིག་བྱང་གི་སྟེང་དེ་སྔ་ ༡༩༥༩་དང་ ༡༩༦༡ དང་༡༩༦༥ བཅས་སོ་སོར་མཉམ་འབྲེལ་རྒྱལ་ཚོགས་ཀྱིས་བོད་ཐོག་བཞག་པའི་གྲོས་ཆོད་ཁག་ལག་བསྟར་དོན་འཁྱོལ་ཡོང་བ་དང་ད་ལྟའི་བོད་ནང་གི་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་ཡོང་བར་བསྐུལ་བའི་འབོད་ཚིག་འཁོད་པ་ལག་ཏུ་འཕྱར་ནས་ཞི་བའི་ཁྲོམ་སྐོར་དང་ལས་འགུལ་ལ་རྒྱབ་སྐྱོེར་མཚན་རྟགས་བསྡུ་ལེན་སོགས་བྱ་འཆར་དང་། དེ་ནས་གནངས་ཉིན་ཕྱི་ཚེས་ ༡༠ རེས་གཟའ་ལྷག་པའི་སྔ་དྲོ་ཆུ་ཚོད་ ༡༠།༣༠ ཐོག་འདི་གའི་གྲོང་ཁྱེར་ཁྱབ་ཁོངས་སུ་ཡོད་པའི་ལོ་རྒྱུས་རང་བཞིན་ལྡན་པའི་རི་མཐོ་ཤོས་ One Tree Hill  ཞེས་པའི་སྟེང་དུ་བོད་མི་རྣམས་མཉམ་འཛོམས་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་འཕྲལ་དུ་ཞི་བ་དང་བོད་ལྗོངས་བདེན་མཐའ་མགྱོགས་མྱུར་གསལ་ཞིང་༧གོང་ས་མཆོག་སྐུ་ཚེ་ཡུན་དུ་བརྟན་ཅིང་ཐུགས་བཞེད་ཐ་དག་བདེ་བླག་ཏུ་འགྲུབ་པ་དང་། ལྷག་དོན་ད་བར་གངས་ལྗོངས་ཀྱི་རང་དབང་དང་༧སྐྱབས་མགོན་ཡིད་བཞིན་ནོར་བུ་མཆོག་བོད་དུ་མྱུར་ཕེབས་ཡོང་ཆེད་རང་ལུས་མཆོད་མེར་བསྒྲོན་ནས་འཇིག་རྟེན་ཕྱི་མའི་ལམ་དུ་གཤེགས་ཟིན་པའི་དཔའ་བོ་དཔའ་མོ་དེ་དག་ཇི་སྲིད་འཚང་མ་རྒྱས་བར་དུ་འཕགས་མཆོག་སྤྱན་རས་གཟིགས་ཀྱིས་རྗེས་སུ་བཟུང་ཞིང་ཐུགས་ཀྱི་སྲས་སུ་འགྱུར་བའི་སྨོན་ལམ་བསང་གསོལ་སོགས་བྱ་རྒྱ་དང་དེ་ཉིན་དགོང་མོ ར་བོད་མི་ཚང་མ་ཡེ་ཤེས་ལགས་ཀྱི་ཁྱིམ་དུ་མཉམ་མཛོམས་ཀྱིས་དགོངས་ཟས་མཉམ་སྤྱོད་བྱ་འཆར་དང་། མཐར་སྤྱི་ཚེས་ ༡༡ རེས་གཟའ་ཕུར་བུ་ཉིན་ཆུ་ཚོད་ ༤།༣༠ ཐོག་འདི་ཁུལ་བོད་རིགས་ཚོགས་པའི་ཚོགས་གཞོན་དགའ་ལྡན་ལགས་ཀྱིས་བདེན་པའི་མེ་ལྕེ་དེ་བཞིན་ས་གནས་ཧྥོང་གྷ་རིར་བསྣམ་ཕེབས་ཏེ་དེ་གའི་བོད་རིགས་སྤྱི་མཐུན་ཚོགས་པར་རྩིས་སྤྲོད་གནང་རྒྱུ་དང་།  དེ་རྗེས་བདེན་པའི་མེ་ལྕེ་དེ་བཞིན་གླིང་ཕྲན་ལྷོ་མའི་ས་ཁུལ་ཁེ་རེ་སི་ཆར་ཆི་Christchurchདང་ནེལ་སོན།Nelsonཌ་ནེ་ཌན་Dunedinབཅས་སུ་ས་གནས་བོད་རིགས་ཚོགས་པས་གཙོ་འགན་བཞེས་ཏེ་སྐོར་སྐྱོད་ཟིན་རྗེས་སླར་ཡང་ཨོ་སེ་ཊར་ལིཡའི་ནུབ་ཕྱོགས་ཀྱི་མཚོ་ཁུལ་གྲོང་ཁྱེར་པེར་ཌར་Perth བོད་རིགས་ཚོགས་པར་བརྒྱུད་སྤྲོད་གནང་འཆར་ཡོད་པ་རེད།

གནས་ཚུལ་མཁོ་གཏོང་བ་ས་གནས་ནས་རིན་ཆེན་དོན།