མོན་གྷོར་གཞོན་ལྷན་དུས་དྲན།

ཟླ་འདིའི་ཚེས་༧ ཉིན་གྱི་ཞོགས་པ་ཆུ་ཚོད་༩ ༣༠ ཕྱེད་ཐོག་རྒྱ་གར་ལྷོ་ཕྱོགས་མོན་གྷོ་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་དབུས་གཞོན་ལྷན་དབུ་བརྙེས་ནས་མི་ལོ་ཧྲིལ་པོ་༤༣ འཁོར་བའི་དུས་དྲན་སྲུང་བརྩིའི་མཛད་སྒོ་ཞིག་མོན་གྷོ་ས་གནས་གཞོན་ལྷན་ཚོགས་ཁང་དུ་འཚོགས་ཡོད་པ་རེད།

དུས་དྲན་མཛོད་སྒོའི་ཐོག་སྐུ་མགྲོན་གཙོ་བོ་ས་འཐུས་ཚོགས་གཞོན་དགེ་བཤེས་རྣམ་རྒྱལ་རྒྱལ་མཚན་དང་ས་གནས་གཞིས་འགོ་བསོད་ནམས་བསྟན་འཛིན་གཉིས་ཀྱི་གཙོས་མོན་གྷོ་ས་གནས་གཞིས་མཉམ་གཉིས་ཀྱི་ལས་སྣེ་བ་ཡོངས་དང་།  དེ་བཞིན་གཞིས་གྲོང་དང་གྲྭ་ཚང་ཁག་གི་སྤྱི་མི་ཕྱག་མཛོད་རྣམ་པ་དང་མོན་གྷོ་ས་གནས་གཞོན་ནུའི་ཚོགས་མི་ཡོངས་བཅས་ཕེབས་ཡོད་པ་རེད། དེ་ཡང་ཐོག་མར་སྐུ་མགྲོན་རྣམ་གྱིས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་རྗེས་བོད་རྒྱལ་ཁབ་ཆེན་པོའི་རྒྱལ་གླུ་དང་བོད་བསྟན་སྲིད་ཀྱི་ཆེད་དུ་རྩ་ཆེའི་ཚེ་སྲོག་བློས་བཏང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་རྒྱལ་ཞེན་དང་སྙིང་སྟོབས་ལ་ཡི་རངས་རྗེས་དྲན་དང་མྱ་ངན་གུས་འདུད་མཚོན་ཆེད་དུ་ངག་བཅད་སྐར་མ་གཉིས་རིང་གནང་བ་སོགས་སྔོན་འགྲོའི་ལས་རིམ་གྲུབ་རྗེས།

ས་གནས་གཞོན་ནུའི་ཚོགས་གཙོ་པདྨ་ཚེ་རིང་ལགས་ཀྱིས་བོད་ཀྱི་གཞོན་ནུ་ལྷན་ཚོགས་ངོ་སྤྲོད་དང་སྦྲགས་དབུས་བོད་ཀྱི་གཞོན་ནུ་ལྷན་ཚོགས་ཀྱིས་གསུང་འཕྲིན་སྒྲོགས་སྦྱངས་དང་འབྲེལ་ཉེ་ཆར་༧གོང་ས་སྐྱབས་མགོན་ཆེན་པོ་ཐུགས་ཕམ་བྱུང་ཡོད་པར་ལྷག་དགོངས་དྭངས་གསལ་ཡོང་བའི་ཞུ་སྙན་ཉིན་གཅིག་གཉིས་ལས་མ་འགྱངས་བར་ཕུལ་ཡོད་པ་དང་།   དེ་རྗེས་ཉེ་བའི་ཆར་ཡང་བོད་ཀྱི་སྲིད་སྐྱོང་བ་མཁས་དབང་བློ་བཟང་སེངྒེ་དང་གྲོས་ཚོགས་ཚོགས་གཙོ་སྤེན་པ་ཚེ་རིང་གཉིས་བརྒྱུད་ནས་བོད་ཀྱི་གཞོན་ནུ་ལྷན་ཚོགས་ཀྱིས་དངོས་ནས་ཤེས་བཞིན་ཁྱད་གསོད་རྩ་བ་ཉིད་ནས་བྱེད་མེད་ན་ཡང་མ་ཤེས་རྨོངས་པའི་དབང་གིས་དེ་ལྟར་ཡོང་སྲིད་པའི་ལྷ་དགོངས་དྭངས་གསལ་ཡོང་བའི་སྐྱབས་འཇུག་ཞུས་དོན་བཞིན་༧གོང་ས་མཆོག་གིས་དེ་དེ་བཞིན་དུ་ཞལ་བཞེས་གནང་ཡོད་སྐོར་སོགས་དང་།      དེ་བཞིན་ཉེ་བའི་ཆར་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༤༣ པའི་སྐབས་སུ་བོད་བསྟན་སྲིད་སྤྱི་དང་ལྷག་པར་དུ་༧གོང་ས་མཆོགས་གིས་སྐུ་ཕྱྭ་དེ་ག་ནང་བཞིན་ད་ལྟའི་བོད་ནང་གི་ཛ་དྲག་གི་གནས་སྟངས་བཅས་ཀྱི་ཐོག་དམིགས་བསལ་གྲོས་ཆོད་བཞག་པ་ཁག་མི་མང་ལ་སྙན་སྒྲོན་ཞུས་སོང་།

དེ་རྗེས་ས་འཐུས་ཚོགས་གཞོན་དགེ་བཤེས་རྣམ་རྒྱལ་རྒྱལ་མཚན་ལགས་ཀྱིས་དུས་དྲན་དང་འབྲེལ་བའི་གསུང་བཤད་གནང་དོན།   བོད་ནང་གིས་ཛ་དྲག་གནས་སྟངས་སྐོར་ལ་གསུང་དོན།  མ་གཞི་དེ་རང་འདིར་ཕེབས་ཡོད་པ་ཚང་མ་མི་རྒན་པ་རྐྱང་རྐྱང་ཡིད་དུས་ད་ལྟའི་བོད་ནང་གི་ཛ་དྲགས་གནས་སྟངས་གསལ་བོ་ཆགས་ཡོད་རེད་དྲན་གྱི་འདུག   བསྡོམས་བརྒྱབ་ནས་ཞུས་པ་ཡིན་ན།   མི་རིགས་གང་ཞིག་གིས་ངོ་བོ་མཚོན་བྱེད་སོ་སོའི་སྐད་ཡིག་རེད།  དེའི་ཐོག་ནས་ཛ་དྲགས་ཆགས་བཞིན་ཡོད་པ་རེད།  དེ་བཞིན་མི་འབོར་དང་དཔལ་འབྱོར།   གཞན་ཡང་ཁོར་ཡུག་དང་ནང་ཆོས་ཀྱི་མཚོན་པའི་རིག་གཞུང་བདག་སྲུང་བྱེད་ཐུབ་ཀྱི་མེད་པ་མ་ཟད།  བོད་མི་རིགས་འདི་ཡང་ཆགས་འཇིག་གི་ཉེན་ཁ་པའི་དཀའ་ངལ་ལམ་ཛ་དྲག་གི་གནས་སྟངས་ཆགས་བཞིན་ཡོད་པ་མིག་མཐོང་ལག་ཟིན་ཡོད་ཙང་བོད་ནང་རང་ལུས་མེར་བསྲེགས་གཏོང་དགོས་པའི་རྒྱུ་མཚན་དེ་ཆགས་ཀྱི་ཡོད་པ་རེད།

གཞན་ཡང་དེ་རིང་འདིར་རང་བཙན་རྩོད་ལེན་པ་ཚོར་དོགས་དཔྱོད་ཀྱི་ཚིག་ཁ་ཤས་ཞུས་ན་དྲན་སོང་།  ང་རང་ཚོ་རྩ་དོན་འཐབ་རྩོད་བྱེད་ཀྱི་ཡོད་རེད།  གཞོན་ནུ་ལ་མཚོན་ན་བོད་རང་བཙན་གཙང་མ་རྩོད་ཀྱི་ཡོད་རེད།  དེ་ལོ་རྒྱུས་ལ་ཁུངས་གཏུག་དགོས་པ་རེད།   ལོ་རྒྱུས་ལ་ཁུངས་གཏུག་དགོས་ན་སྡེ་ཚན་གསུམ་ཡོད་རེད་དྲན་སོང་།  ལྔ་བཅུ་ང་དགུའི་ཡ་སྔོན་གྱི་དགའ་ལྡན་ཕོ་བྲང་སྐབས་ཀྱི་གནས་བབ་གཅིག་དང་།   དེ་ནས་ཡར་སོང་བ་ཡིན་ན་འགྲོ་མགོན་ཆོས་རྒྱལ་འཕགས་པའི་སྐབས་ཀྱི་གནས་སྟངས་གཅིག་རེད།  དེ་ནས་ཆོས་རྒྱལ་མེས་དབོན་རྣམ་གསུམ་སྐབས་བཅས་ཀྱི་གནས་སྟངས་གང་ཡང་རུང་བ་ཞིག་ལ་གཞི་བཅོལ་དགོས་ཀྱི་ཡོད་པ་རེད།   ལྷག་པར་དུ་ཉིས་སྟོང་བཅུ་གསུམ་ལོར་རྒྱལ་དབང་སྐུ་ཕྲེང་གཅུ་གསུམ་པའི་རང་བཙན་གསལ་བསྒྲགས་ཀྱི་དུས་དྲན་སྲུང་བརྩི་བྱེད་ཀྱི་ཡོད་པ་རེད།  དེའི་སྐབས་ལ་གཞི་བཅོར་གྱི་ཡོད་པ་རེད་དམ།   ས་མཚམས་དང་ས་ཁྲ་གང་ཞིག་ལ་ཁུངས་གཏུག་ནས་རྩོད་ལེན་དགོས་པ་ཞིག་རེད།  དེ་ལ་ས་མཚམས་དང་མཐའ་མཚམས་འདི་དང་དེ་ཞེས་བརྗོད་ཀྱི་ཡོད་པ་ཞིག་ངེས་པར་དུ་དགོས་པ་རེད་དྲན་གྱི་འདུག།  དབུ་མའི་ལམ་ཆ་མ་ཚོན་པ་ཡིན་ན་བོད་མི་ཡོངས་གཅིག་ཏུ་སྒྲིལ་བའི་རང་སྲིད་རང་སྐྱོང་དགོས་ལབ་ཀྱི་ཡོད་པ་རེད། ཁ་གསལ་བོ་ཆགས་ཚར་བ་རེད།   རང་བཙན་བཙན་རྩོད་ལེན་པ་ཚོ་ལ་ཡང་དེ་ལྟར་ས་མཚམས་འདི་འདྲ་ཞིག་གིས་ཐོག་རྩོད་ལེན་བྱེད་ཀྱི་ཡོད་ཟེར་ནས་སྐྱང་ཐིག་ཞིག་ཏན་ཏན་དགོས་པ་རེད།   དེ་མེད་ན་ཏག་ཏག་བསྡད་ཡོད་པ་མ་རེད་ཅེས་སོགས་གསུངས་སོང་།

རྒྱ་གར་ལྷོ་ཕྱོགས་ནས་མོན་གྷོ་གསར་འགོད་པས།