ལྷག་པ་ཚེ་རིང་གིས་སྤྱི་དངུལ་ལྐོག་ཟ་བྱས་པའི་གསལ་བསྒྲགས།

ཟླ་འདིའི་ཚེས་༥ཉིན་བོད་མིའི་སྒྲིག་འཛུགས་ཀྱི་དྲ་རྒྱར་གནས་ཚུལ་བཀོད་པ་ལྟར་ན། སྦེལ་ཀོབ་འཚོ་བྱེད་སྨན་ཁང་གི་འགན་འཛིན་ཟུར་པ་ལྷག་པ་ཚེ་རིང་ནས་སྤྱི་དངུལ་ཧིན་སྒོར་ ༣༠༤༨༣༠ སུམ་འབུམ་ཁྲི་མེད་བཞི་སྟོང་བརྒྱད་བརྒྱ་སུམ་ཅུ་ཐམ་པ་ལྐོག་ཟ་བྱས་པའི་གསལ་བསྒྲགས་སྤེལ་འདུག

དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྦེལ་ཀོབ་འཚོ་བྱེད་ཁང་གསར་སྨནཁང་གི་འགན་འཛིན་ཟུར་པ་ལྷག་པ་ཚེ་རིང་ལ་ལྐོག་ཟ་རུལ་སུངས་ཀྱི་ཉེས་འཛུགས་བྱུང་པ་ལྟར། བཀའ་ཤག་ནས་ཞིབ་འཇུག་ཚོགས་ཆུང་བཙུགས་ནས་དཔྱད་ཞིབ་བྱས་པ་བརྒྱུད། ཁོས་གློག་ཆས་ཉོ་སྒྲུབ་སོགས་ཀྱི་ཐོག་ནས་སྤྱི་གུན་བཏང་བ་ཁྱོན་བསྡོམས་ཧིན་སྒོར་༣༠༤༨༣༠ སུམ་འབུམ་ཁྲི་མེད་བཞི་སྟོང་བརྒྱད་བརྒྱ་སུམ་ཅུ་ཐམ་པ་བྱས་ཡོད་པ་ར་འཕྲོད་བྱུང་སྟེ། དུས་བཀག་ནང་ཚུད་སྨན་ཁང་ལ་ཕྱིར་སློག་མ་བྱུང་ཚེ་སྤྱི་དངུལ་སྒེར་ཟ་དང་འབྲེལ་བའི་གསལ་བསྒྲགས་བྱ་རྒྱུ་དང༌། བོད་མིའི་སྒྲིག་འཛུགས་ནས་བོད་མི་སྤྱི་འགྲོ་ལྟར་ཕན་གྲོགས་ལྟ་སྐྱོང་བྱ་སྒོ་ཡོངས་རྫོགས་བཀག་བསྐྱིལ་བྱ་རྒྱུའི་བཅད་ཁྲ་ཐག་གཅོད་བྱས་པའི་བརྡ་སྤྲད་ཡོད་ཀྱང། དུས་བཀག་ནང་ཚུད་ལྟ་ཅི་དུས་ཚོད་ཕྱིར་འགྱངས་བྱས་པའི་ནང་ཚུད་དུའང་ཕྱིར་སློག་བྱུང་མེད་སྟབས། འཕྲོད་བསྟེན་ལས་ཁུངས་ནས་དྲན་བསྐུལ་བརྡ་འདེད་རིམ་པ་བྱས་ཀྱང་ད་བར་ཡ་ལན་གཏན་ནས་བྱས་མེད་པར་བརྟེན་བཅད་ཁྲ་ལག་བསྟར་བྱེད་རྒྱུ་ཡིན་འདུག

ལྷག་པ་ཚེ་རིང་གི་གཞུང་འབབ་གསོག་དངུལ་ཇི་ཡོད་བཅད་ཁྲའི་དགོངས་དོན་ལྟར་གཞུང་བཞེས་བྱས་ཟིན་པ་དང། རང་འབབ་གསོག་དངུལ་དང༌། གཞུང་སྒེར་གསོག་དངུལ་གྱི་སྐྱེད་འབབ་བཅས་བསྡོམས་སྒོར་༧༣༡༢༧ བདུན་ཁྲི་སུམ་སྟོང་བརྒྱ་དང་ཉི་ཤུ་རྩ་བདུན་ཡོད་འདུག་པ་གཞུང་བཞེས་ཀྱིས། གོང་གསལ་སྤྱི་གུན་ཕྱིར་སློག་ལ་ཕན་པ་བྱ་རྒྱུ་དང༌། སྤྱི་གུན་ཕྱིར་གསབ་མ་བྱུང་བ་འཕྲོས་ཧིན་སྒོར་༢༣༡༧༠༣ ཉིས་འབུམ་སུམ་ཁྲི་ཆིག་སྟོང་བདུན་བརྒྱ་བཅུ་མེད་གསུམ་ལྷག་ཡོད་པ་དང། དངུལ་འབོར་དེ་ལྷག་པ་ཚེ་རིང་ནས་དུས་བཀག་ནང་ཚུད་ཕྱིར་སློག་བྱ་ཐབས་གཏན་ནས་བྱས་མེད་པ་ནི། བཙན་བྱོལ་བོད་མིའི་བཅའ་ཁྲིམས་དང༌། བོད་མིའི་སྒྲིག་འཛུགས་ཀྱི་སྒྲིག་གཞི་ཁག་ལ་སྣང་ཆུང་བརྩི་མེད་བཏང་བ་རེད་ཞེས་བཀོད་འདུག།

གསར་འགོད་པ་སྐལ་བཟང་དོན་གྲུབ།