སྨིན་གྲོལ་གླིང་དབུ་བརྙེས་ནས་ལོ་༥༠ འཁོར་བ།

སྔ་འགྱུར་གྱི་ཆོས་སྡེ་ཆེན་པོ་འོག་མིན་ཨོ་རྒྱན་སྨིན་གྲོལ་གླིང་བྱེས་ཀྱི་གདན་ས་དབུ་བརྙེས་ནས་མི་ལོ་ཧྲིལ་པོ་༥༠ འཁོར་བའི་མཛད་སྒོ་ཞིག་གདན་ས་དེ་ཉིད་དུ་འཚོགས་སོང་བ་དང། སྐབས་དེར་སྐུ་མགྲོན་གཙོ་བོར་སྔ་འགྱུར་རྙིང་མ་པའི་དབུ་འཛིན་༧སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་ཞབས་སོར་འཁོད་ཡོད་པ་རེད།

དེ་ཡང་རྒྱ་གར་བྱང་ཕྱོགས་ཨུ་ཏར་ཁནྜ་མངའ་སྡེའི་རྒྱལ་ས་དྷེ་ར་དྷུན་གྱི་ཉེ་འགྲམ་ཀ་ལ་མན་ཊོན་དོན་གྲུབ་གླིང་གཞིས་ཆགས་སུ་ཡོད་པའི་སྨིན་གྲོལ་གླིང་བྱེས་ཀྱི་གདན་ས་རུ། ཆོས་སྡེ་དེ་ཉིད་བཙན་བྱོལ་ནང་གསར་འཛུགས་གནང་ནས་མི་ལོ་ཧྲིལ་པོ་༥༠ འཁོར་བའི་རྟེན་འབྲེལ་དགའ་སྟོན་གྱི་མཛད་སྒོ་ཞིག་འཚོགས་སོང་བ་དང། ཕྱི་ལོ་༢༠༡༥ ཟླ་༡ ཚེས་༥ ཉིན་སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་དབུ་བཞུགས་ཐོག་ལྷ་བབ་མཆོད་རྟེན་ཆེན་མོའི་ནང་དུ་བླ་མ་གསང་འདུས་ཀྱི་སྒོ་ནས་ཚོགས་མཆོད་དང། དེའི་དགོང་མོ་ལྷ་བབ་མཆོད་རྟེན་ཆེན་མོའི་སྦྱིན་བདག་ཐའེ་ཝན་གྱི་བླ་མ་ཏིས་ཅིང་པཱ་སི་ཡིས་དབུ་ཁྲིད་ཐོག་སེར་སྐྱ་ཡོངས་ནས་འཛམ་གླིང་ཞི་བདེའི་ཆེད་དུ་མར་མེའི་སྨོན་ལམ་ཞིག་ཞིག་གསུངས་གནང་སོང།

ཕྱི་ལོ་༢༠༡༥ ཟླ་༡ ཚེས་༦ ཉིན་གྱི་སྔ་དྲོ་ཆུ་ཚོད་༩ དང་ཕྱེད་ཀྱི་སྟེང་མཛད་སྒོ་དངོས་གཞི་དབུ་འཛུགས་གནང་སོང་བ་དང། སྐབས་དེར་སྐུ་མགྲོན་གཙོ་བོ་སྔ་འགྱུར་རྙིང་མ་པའི་དབུ་འཛིན་༧སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་དང། དགའ་ལྡན་ཕོ་བྲང་གི་སྐུ་ཚབ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ། སྤྱི་འཐུས་ཚོགས་གཙོ་སྤེན་པ་ཚེ་རིང་དང། ཚོགས་གཞོན་མཁན་པོ་བསོད་ནམས་བསྟན་འཕེལ། ཆོས་རིག་བཀའ་བློན་པདྨ་ཆོས་འབྱོར། ནང་སྲིད་བཀའ་བློན་རྒྱ་རི་སྒྲོལ་མ་སོགས་ཆོས་སྲིད་གཉིས་ཐད་ནས་གནད་ཡོད་མི་སྣ་དང། དགོན་སྡེ་དང་བླ་སྤྲུལ་ཁག་གི་སྐུ་ཚབ་བཅས་སེར་སྐྱ་མི་མང་དང་ཕྱི་རྒྱལ་གྱི་ཡུལ་གྲུ་དུ་མ་ཞིག་ནས་དད་ལྡན་སྦྱིན་བདག་དང་ཞལ་སློབ་བཅས་གང་མང་ཞིག་སྐུ་མགྲོན་དུ་ཕེབས་འདུག

མཛད་སྒོའི་ཐོག་མ་སྤྲུལ་སྐུ་གྲགས་པ་རྒྱལ་མཚན་གྱིས་སྐུ་མགྲོན་ཡོངས་ལ་བོད་སྐད་དང། ཨ་ནེ་འཇིགས་མེད་ཆོས་སྒྲོན་གྱིས་དབྱིན་སྐད། ཨ་ནེ་ཆོས་དབྱིངས་ཆོས་སྒྲོན་གྱིས་རྒྱ་སྐད་བཅས་ཀྱི་ཐོག་རིམ་བཞིན་ཕེབས་བསུའི་གསུང་བཤད་གནང་རྗེས། མཛད་སྒོའི་རྟེན་འབྲེལ་ཆེད་དུ་Shirimati Veena Aggarwal གྱིས་སྣེ་ཁྲིད་ནས་གར་མཁན་ཁག་ཅིག་གིས་རྒྱ་གར་གྱི་གནའ་བོའི་རིག་གཞུང་གར་འཆམ་Bharatnatiyam གྱི་སྒོ་ནས་བླ་མ་མཆོད་པ་ཞིག་གཟིགས་འབུལ་ཞུས། འཛམ་གླིང་ཞི་བདེ་དང། མཆམ་མཐུན་ཡོང་ཆེད་ Shiri Bhatt Ji ཡིས་རྒྱ་གར་གྱི་གནའ་བོའི་རིག་གནས་གླིང་བུ་ཞིག་སྙན་སྒྲོན་ཞུས་རྗེས། སྨིན་གྲོལ་གླིང་གི་མཆོག་སྤྲུལ་རྣམ་གསུམ་གྱིས་ཆོས་རྒྱལ་གཏེར་བདག་གླིང་པའི་རྗེས་འཛིན་གསོལ་འདེབས་གསུངས་པ་དང། སྦིར་སུ་ཇ་བོད་ཁྱིམ་གྱི་སློབ་མ་ཁག་ཅིག་གིས་བཀྲ་ཤིས་ཞོལ་པ་གཟིགས་འབུལ་ཞུས་སོང།

དེའི་རྗེས་སུ་དགའ་ལྡན་ཕོ་བྲང་གི་སྐུ་ཚབ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེས་༧གོང་ས་༧སྐྱབས་མགོན་ཆེན་པོ་མཆོག་གི་གསུང་འཕྲིན་སྒྲོགས་སྦྱང་གནང་བ་དང། ༧སྐྱབས་རྗེ་མཁོ་ཁྱིམ་རིན་པོ་རིན་པོ་ཆེ་མཆོག་གིས་འཕགས་ཡུལ་ཨོ་རྒྱན་སྨིན་གྲོལ་གླིང་གསར་འཛུགས་བྱས་ནས་བགྲང་བྱ་ལྔ་བཅུ་འཁོར་བའི་མཛད་སྒོའི་ངོ་སྤྲོད་གསུང་བཤད་དང། ༧སྐྱབས་རྗེ་སྨིན་གླིང་ཁྲི་ཆེན་གྱི་སྲས་མོ་རྗེ་བཙུན་མཁའ་འགྲོ་རིན་པོ་ཆེ་མཆོག་གིས་དབྱིན་སྐད་ཐོག་མཛད་སྒོའི་ངོ་སྤྲོད་གསུང་བཤད་གནང། ཨ་ནེ་ཆོས་དབྱིངས་ཆོས་སྒྲོན་ལགས་ཀྱིས་རྒྱ་སྐད་ཐོག་མཛད་སྒོའི་ངོ་སྤྲོད་གསུང་བཤད་གནང་སོང། དེའི་རྗེས་སུ་རྒྱ་གར་ཨུ་ཏར་ཁནྜ་མངའ་སྡེའི་བློན་ཆེན་Shiri Dineshi Agarwal དང། ༧སྐྱབས་རྗེ་སྨིན་གླིང་མཁན་ཆེན་རིན་པོ་ཆེ།  མཆོག་གླིང་གདུང་སྲས་སྤྲུལ་སྐུ་ཨོ་རྒྱན་སྟོབས་རྒྱལ་རིན་པོ་ཆེ། སྤྱི་འཐུས་ཚོགས་གཞོན་རྙིང་མའི་སྤྱི་འཐུས་མཁན་པོ་བསོད་ནམས་བསྟན་འཕེལ། ནང་སྲིད་བཀའ་བློན་རྒྱ་རི་སྒྲོལ་མ། ཆོས་རིག་བཀའ་བློན་པདྨ་ཆོས་འབྱོར། སྤྱི་འཐུས་ཚོགས་གཙོ་སྤེན་པ་ཚེ་རིང་བཅས་ཀྱིས་རིམ་བཞིན་གསུང་བཤད་གནང་ཞིང། མཐའ་མ་སྐུ་མགྲོན་གཙོ་བོ་སྔ་འགྱུར་རྙིང་མ་པའི་དབུ་འཛིན་སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གིས་བཀའ་སློབ་བཀའ་དྲིན་བསྩལ་གྲུབ་རྗེས། སྨིན་གྲོལ་གླིང་གི་ཞབས་ཞུ་བ་ལས་བྱེད་རྙིང་གྲས་རྣམས་དང། འབྲེལ་ཡོད་གཞན་ཁག་ཅིག་བཅས་ལ་རིམ་པ་བཞིན་ཐུགས་རྗེ་ལེགས་འབུལ་གྱི་ཕྱག་རྟགས་གནང་རྗེས་སྤྲུལ་སྐུ་གྲགས་པ་རྒྱལ་མཚན་གྱིས་ཐུགས་རྗེ་ཆེ་ཞུའི་གསུང་བཤད་གྲུབ་ནས་མཛད་སྒོ་དངོས་གཞི་གྲོལ་སོང།

ཉིན་དེའི་ཕྱི་དྲོ་འཕགས་ཡུལ་ཨོ་རྒྱན་སྨིན་གྲོལ་གླིང་ཕྱག་བཏབ་ནས་བཟུང་ད་བར་ལོ་༥༠ རིང་༧སྐྱབས་རྗེ་མཁོ་ཁྱིམ་རིན་པོ་ཆེ་མཆོག་གིས་སྐུ་ངལ་འཛེམས་མེད་ཀྱི་སྒོ་ནས་འཛིན་སྐྱོང་གནང་བར། བཀའ་དྲིན་རྗེས་དྲན་གྱི་ཆེད། ལྷ་བབ་མཆོད་རྟེན་མོའི་ཚོགས་ཁང་དུ་སྐྱབས་རྗེ་ཁོང་ལ་མཎྜལ་རྟེན་གསུམ་འདེགས་འབུལ་དང་སེར་སྐྱ་མི་མང་ཡོངས་ཀྱིས་མཇལ་དར་སྒྲོན་འབུལ་ཞུས་ནས་ཉིན་དེའི་མཛད་སྒོ་གྲོལ་སོང།

ཕྱི་ལོ་༢༠༡༥ ཟླ་༡ ཚེས་༧ ཉིན་འོག་མིན་ཨོ་རྒྱན་སྨིན་གྲོལ་གླིང་གི་བཤད་གྲྭ་སྔ་འགྱུར་མཐོ་སློབ་མདོ་རྒྱུད་ལེགས་བཤད་གླིང་དབུ་བརྙེས་ནས་ལོ་ངོ་ཧྲིལ་པོ་༢༥ འཁོར་བའི་མཛད་སྒོ་འཚོགས་པ་དང། ཕྱི་ཚེས་༨ ཉིན་༧སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གིས་ཚེ་དབང་བཀའ་དྲིན་བསྩལ་རྒྱུ་དང། དེའི་དགོང་མོ་གདུང་སྲས་འཇིགས་བྲལ་གར་དབང་དོན་འགྲུབ་དབང་རྒྱལ་རིན་པོ་ཆེའི་འཁྲུངས་སྟོན་རྟེན་འབྱུང་དགའ་སྟོན་དུ་དོན་གྲུབ་གླིང་ཡུལ་དགོན་གཉིས་དང། གླིང་ཚང། གཞན་ཡང་ཕྱོགས་མཐའ་ཁག་ནས་ཕེབས་པའི་སྐུ་མགྲོན་རྣམ་པ་ཡོངས་ལ་གསོལ་སྟོན་རྒྱས་པ་ཞིག་འདེགས་འབུལ་ཞུ་རྒྱུ་དང། ཉིན་དེ་དག་གི་དགོང་མོ་རྣམས་སུ་སྐུ་མགྲོན་དང་མི་མང་ཡོངས་ལ་གཞས་སྣ་འཁྲབ་སྟོན་ཡང་མི་ཉུང་བ་ཞིག་གཟིགས་འབུལ་ཞུས་ཡོད་པ་རེད།
སྨིན་གྲོལ་གླིང་བྱེས་ཀྱི་གདན་ས་འདི་ཉིད་ཐོག་མ་དཔལ་ཡུལ་རྫོང་ནང་སྤྲུལ་སྐུ་རིན་པོ་ཆེས་གཙོ་འགན་བཞེས་ཤིང། མཁོ་ཁྱིམ་རིན་པོ་ཆེས་ཕྱག་རོགས་ཞུས་ནས་སྐུ་ངལ་སྣ་ཚོགས་ལ་གདོང་ལེན་གྱིས་གསར་འཛུགས་གནང་བ་དང། ཕྱིས་སུ་སྨིན་གླིང་ཁྲི་ཆེན་རིན་པོ་ཆེ་གདན་ཞུས་དང་འབྲེལ་བཤད་སྒྲུབ་ལས་གསུམ་གྱི་ཐོག་ནས་དགོན་པ་འདི་ཉིད་ཡར་རྒྱས་ཕུན་སུམ་ཚོགས་པ་བྱུང་ཡོད་པ་རེད། རྫོང་ནང་རིན་པོ་ཆེ་སྐུ་གཤེགས་རྗེས་དགོན་པ་འདིའི་འགན་ཁུར་གཙོ་བོ་བཞེས་མཁན་སྐྱབས་རྗེ་མཁོ་ཁྱིམ་རིན་པོ་ཆེ་མཆོག་ཡིན་པ་དང། མཐོང་བ་བརྒྱུད་པའི་ཕྱག་བཞེས་སོགས་བོད་ནང་གི་འོག་མིན་ཨོ་རྒྱན་སྨིན་གྲོལ་གླིང་དང་གཅིག་མཚུངས་བསྐྱར་གསོ་ཐུབ་པ་བྱུང་ཡོད་པ་རེད།།