རྒྱ་ནག་གི་“སྟག་རྒན”་ཞིག་འདས་གྲོངས་སུ་གྱུར།

ལྐོག་ཟ་རུལ་སུངས་ཀྱི་གནད་དོན་ལ་བརྟེན་ནས་ཁྲིམས་བཤེར་བྱ་གཏན་ཁེལ་བའི་རྒྱ་ནག་དབུས་དམག་དོན་རྒྱུན་ལས་ལྷན་ཚོགས་ཀྱི་འགོ་གཙོ་གཞོན་པ་ཟུར་པ་ཞུའུ་ཚེ་ཧུག་རེས་གཟའ་ཉི་མའི་ཉིན་པེ་ཅིང་དུ་འདས་གྲོངས་སུ་གྱུར་ཡོད་འདུག

རྒྱ་ནག་གཞུང་འབྲེལ་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ཟླ་༣ པའི་ཚེས་༡༥ ཉིན་ཞུའུ་ཚེ་ཧུག་ལྒང་བུག་འབྲས་སྐྲན་གྱི་ན་ཚའི་རྐྱེན་པས་སྨན་བཅོས་དོན་ཕན་མ་སོང་བར་པེ་ཅིང་གི་སྨན་ཁང་དུ་འདས་གྲོངས་སུ་གྱུར་ཡོད་འདུག ཞུའུ་ཚེ་ཧུག་ལ་ལོ་སྔོན་མའི་ཕྱི་ཟླ་༡༠ པའི་ཚེས་༢༧ ཉིན་དམག་དོན་ཞིབ་དཔྱོད་ཁང་གིས་ལྐོག་ཟ་རུལ་སུངས་དང་འབྲེལ་བའི་དོགས་ཉེས་འོག དམར་ཤོག་ཚོགས་མི་ནས་ཕྱིར་ཕུད་ཀྱིས་ཁྲིམས་ཞིབ་ཚན་པར་རྩིས་སྤྲོད་བྱས་ཡོད་ཀྱང་། ཞུའུ་ཚེ་ཧུག་ཁྲིམས་བཤེར་མ་བྱས་སྔོན་འདས་གྲོངས་སུ་གྱུར་པར་བརྟེན། <<རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ནག་ཉེས་ཞུ་གཏུགས་ཁྲིམས་ཡིག་>> དོན་ཚན་བཅོ་ལྔ་པའི་དགོངས་དོན་གཞིར་བཟུང་། རྒྱ་ནག་དམག་དོན་ཞིབ་དཔྱོད་ཁང་གིས་ཞུའུ་ཚེ་ཧུག་ལ་ཁྲིམས་བཤེར་མི་བྱ་བའི་ཐག་གཅོད་བྱས་པ་དང་། ལྐོག་རྔན་དང་འབྲེལ་བའི་ཁྲིམས་འགལ་གྱི་ཡོང་འབབ་ཁྲིམས་ལྟར་ཐག་གཅོད་བྱ་རྒྱུ་ཡིན་པ་རེད།

ཞུའུ་ཚེ་ཧུག་ནི་ཞི་ཅིན་ཕིང་གིས་ལྐོག་ཟ་རུལ་སུངས་ལ་རྒོལ་རྡུང་གཏོང་བའི་ཚ་རླབས་ཁྲོད་གོ་གནས་ལས་ལྷུང་པའི་སྟག་རྒན་ནང་གི་གཅིག་ཡིན་པ་མ་ཟད། ཞུའུ་ཚེ་ཧུག་དང་ཕྱི་ལོ་༢༠༡༢ ལོའི་ལོ་འགོར་གནས་དབྱུང་བཏང་བའི་བཅིངས་གྲོལ་དམག་སྤྱི་ཁྱབ་འཐབ་ཇུས་སློབ་སྟོན་ཁང་གི་བློན་ཆེན་གཞོན་པ་གུ་ཅུན་ཧྲན་གཉིས་ནི། ད་ལྟའི་བར་ཡོངས་གྲགས་ཐོག་ཞིབ་བཤེར་བྱས་པའི་རྒྱ་ནག་དམག་ཕྱོགས་ཀྱི་སྟག་རྒན་ཆེ་ཤོས་གཉིས་ཡིན་ཞིང་། གནད་དོན་དབྱེ་ཞིབ་པ་འགས་ངོས་འཛིན་བྱས་པ་ལྟར་ན། མི་རིང་བར་དེ་ལས་ཀྱང་“ཆེས་ཆེ་བའི་སྟག་རྒན་”ཞིག་གནས་དབྱུང་གཏོང་སྲིད་པ་རེད།།