པ་ཀི་སི་ཐན་ནང་རྒྱ་ནག་གི་ཤུགས་རྐྱེན་ཆེ་རུ་གཏོང་བ།

རྒྱ་ནག་གི་སྲིད་འཛིན་ཞི་ཅིན་ཕིང་གིས་པ་ཀི་སི་ཐན་དུ་རྒྱལ་དོན་འཚམས་གཟིགས་སྐབས། རྒྱལ་ཁབ་གཉིས་བར་ཨ་སྒོར་ཐེར་འབུམ་༤༦ གི་གཞི་རྒྱ་ཆེ་བའི་ལས་འཆར་འཛུགས་རྒྱུ་ཡིན་འདུག

ཟླ་འདིའི་ཕྱི་ཚེས་༢༠ རེས་གཟའ་ཟླ་བའི་ཉིན་རྒྱ་ནག་གི་སྲིད་འཛིན་ཞི་ཅིང་ཕིང་པ་ཀི་སི་ཐན་དུ་ཉིན་གཉིས་རིང་གི་ཕྱོགས་བསྐྱོད་འགོ་འཛུགས་བྱས་ཡོད་པ་དང་། ཐེངས་འདིའི་འཚམས་གཟིགས་སྐབས་རྒྱལ་ཁབ་གཉིས་བར་ཡུལ་བབ་སྲིད་བྱུས་ཀྱི་འབྲེལ་བ་ཙམ་མ་ཡིན་པར། དཔལ་འབྱོར་དང་རྒྱལ་སྲུང་གི་ཐད་གོ་བསྡུར་བྱ་རྒྱུ་ཡིན་འདུག

དེའང་རྒྱ་ནག་དང་པ་ཀི་སི་ཐན་གཉིས་བར་གྱི་ལམ་རྒྱུད་དཔལ་འབྱོར་ (CPEC) ཞེས་པ་པཱ་ཀི་སི་ཐན་ལྷོ་ཕྱོགས་ཀྱི་གྷོ་ཨཱ་ཌར་གྲུ་ཁ་ནས། རྒྱ་ནག་གི་ཤིན་ཅང་ས་ཁུལ་བར་མེ་འཁོར་ལྕགས་ལམ་དང། གཞུང་ལམ། སྣུམ་དང་རླངས་གཟུགས་ཀྱི་འདྲེན་ལམ་བཅས་མང་པོ་ཞིག་གསར་འཛུགས་ཀྱི་ལས་གཞི་ཆེན་པོ་དེའི་ཐོག རྒྱ་ནག་གི་སྲིད་འཛིན་པ་ཀི་སི་ཐན་ནང་ཐེངས་འདིའི་ ཕྱོགས་སྐྱོད་སྐབས་ཨ་སྒོར་འཐེར་འབུམ་༤༦ མ་འཛུགས་བྱ་འཆར་ཡོད་པ་རེད།

མི་ལོ་བཅུ་ཕྲག་ཁ་ཤས་གོང་ནས་རྒྱལ་ཁབ་གཉིས་བར་གཞུང་འབྲེལ་དཔོན་རིགས་གྱི་འགྲོ་འོང་དང་དམག་དོན་གྱི་འབྲེལ་བ་བཟང་པོ་ཡོད་ནའང། དཔལ་འབྱོར་གྱི་འབྲེལ་བ་དེ་ཙམ་གྱི་ཡག་པོ་མེད། འདས་པའི་ལོ་བཅུའི་ནང་རྒྱལ་ཁབ་གཉིས་བར་ཁྱོན་སྡོམ་ཚོང་འབྲེལ་མ་དངུལ་ཨ་སྒོར་ཐེར་འབུམ་༢ ལས་མེད་པ་དང། ཕྱི་ལོ་༢༠༡༤ ནང་ཐེར་འབུམ་༡༢ ལ་འཕར་ཡོད།

གནས་དོན་དབྱེ་ཞིབ་པ་ཚོས་རྒྱ་ནག་གིས་པ་ཀི་སི་ཐན་ནང་མ་དངུལ་ཕོན་ཆེན་པོའི་ལས་འཆར་འཛུགས་དོན་ནི། རྒྱ་ནག་དང་རྒྱལ་ཁབ་གཞན་ཚོའི་ཚོང་འབྲེལ། ཨེ་ཤེ་ཡའི་དབུས་དང་ཨ་ཤེ་ཡའི་ལྷོ་ཕྱོགས་ཁུལ་ལ་སྐྱེལ་འདྲེན་གྱི་མཐུན་འབྲེལ་གོང་འཕེལ་གཏོང་རྒྱུ། དེ་བཞིན་པ་ཀི་སི་ཐན་ནང་རྒྱ་གར་དང་ཨ་རིའི་ཤུགས་རྐྱེན་དེ་དག་ལ་ཁ་གཏད་གཅོག་ཆེད་ཡིན་སྐོར་བརྗོད་འདུག

པ་ཀི་སི་ཐན་རྒྱལ་ཁབ་ནང་ལོ་མང་པོའི་རིང་གློག་དང། དཔར་འབྱོར། དེ་བཞིན་དྲག་སྤྱོད་པའི་དཀའ་ངལ་འཕྲད་རྐྱེན་གྱི་རྒྱལ་ཁབ་ཡར་རྒྱས་འགྲོ་རྒྱུར་བཀག་འགོག་ཐེབས་ཡོད་ཅིང། ཐེངས་འདིའི་ལས་འཆར་ནང་སྟོབས་ཆེན་རྒྱལ་ཁབ་རྒྱ་ནག་ཚུད་པའི་ཨེ་ཤེ་ཡ་དབུས་དང་། ཨ་ཤེ་ཡའི་ལྷོ་ཕྱོགས་ཀྱི་མངའ་ཁུལ་མང་པོ་ཞིག གཞུང་ལམ་དང་མེ་འཁོར་ལྕགས་ལམ་མཐུན་རྐྱེན་ཡོད་པའི་ཚོང་འབྲེལ་གྱི་འབྲེལ་མཐུད་བྱེད་ཐུབ་པ་དང། པ་ཀི་སི་ཐན་དེ་མངའ་ཁུལ་ཁག་གི་དཔལ་འབྱོར་ལྟེ་གནས་ཤིག་ཏུ་བསྒྱུར་ཏེ་དཀའ་ངལ་མང་པོ་ཞིག་སེལ་ཐུབ་སྐོར་གཞུང་ཚབ་པ་ཞིག་གིས་བརྗོད་འདུག

ཡིནའང་རྒྱལ་ཁབ་གཉིས་པ་ཀི་སི་ཐན་ནང་ཡོད་པའི་འཇིགས་སྐུལ་དྲག་སྤྱོད་པ་དང། རྒྱ་ནག་ཤིང་ཅང་ཁུལ་གྱི་ཁ་ཆེའི་དྲག་སྤྱོད་ཚོགས་པ་གཉིས་མཉམ་འབྲེལ་གྱིས་བདེ་འཇགས་ལ་གནོད་འཚེ་གཏོང་སྲིད་པའི་འཇིགས་སྣང་བྱེད་ཀྱི་ཡོད་སྟབས། སྲིད་འཛིན་ཞི་ཅིན་ཕིང་པ་ཀི་སི་ཐན་ནང་ཉིན་མཐའ་མའི་འཚམས་གཟིགས་སྐབས་རྒྱལ་སྲུང་དང། དྲག་སྤྱོད་ལ་རྒོལ་རྡུང་། དེ་བཞིན་ཚོང་འབྲེལ་བཅས་ཀྱི་སྐོར་གྲོས་ཚོགས་ནང་གཏམ་བཤད་བྱ་རྒྱུ་ཡིན་པ་མ་ཟད། རྒྱལ་ཁབ་ཀྱི་སྲིད་བློན་ལྷན་དུ་མཇལ་འཕྲད་གནང་འཆར་ཡོད་པ་རེད།།

གསར་འགོད་པ་བསྟན་འཛིན་ཟླ་བ།