དམག་འཁྲུག་བྱས་ནས་ཟླ་བ་དྲུག་ཕྱིན་ཡང་དམག་འཁྲུག་མཚམས་འཇོག་བྱེད་རྒྱུའི་རྟགས་མཚན་ད་དུང་མི་འདུག
ཟླ་འདིའི་ཚེས་༢༥ཉིན་(WION) ཞེས་པའི་གསར་ཁང་གིས་གནས་ཚུལ་སྤེལ་གསལ་ལྟར་ན། ཨུ་རུ་སུ་དང་ཡུག་རེེན་བར་དུ་དམག་འཁྲུག་བྱུང་ནས་ད་བར་ཟླ་བ་དྲུག་ཕྱིན་ཡོད་པ་དང་། ད་ལྟའི་ཆར་རྒྱལ་ཁབ་གཉིས་ཀྱི་ནང་དུ་དམག་མི་དང་མི་སེར་མང་པོ་འདས་གྲོངས་སུ་འགྲོ་བཞིན་ཡོད་པའི་ཐོག་འཛམ་གླིང་ཁྱོན་ཡོངས་ལ་བཟའ་ཆས་ཀྱི་རིགས་མ་འདང་པ་དང་ཡུལ་ཐང་འཕར་ཆ་ཡི་དཀའ་ངལ་འཕྲད་བཞིན་པ་མ་ཟད། རྡུལ་ཕྲན་མཚོན་ཆ་བེད་སྤྱོད་བྱེད་རྒྱུའི་ཉེན་ཁ་ཡོང་བཞིན་ཡོད་པ་སོགས་ཀྱི་དཀའ་ངལ་འཕྲད་བཞིན་ཡོད་ན་ཡང་། དམག་འཁྲུག་མཚམས་འཇུག་བྱེད་རྒྱུ་ཡི་རྟགས་མཚན་གང་ཡང་མེད་རབས་ཀྱི་གནས་ཚུལ་ཐོན་འདུག
འདས་པའི་ཟླ་བ་དྲུག་གི་རིང་ཡུག་རེན་གྱི་མི་སེར་༥,༥༨༧ ལྷག་འདས་གྲོངས་སུ་ཕྱིན་ཡོད་པ་དང་མི་སེར་༧,༨༩༠ ལྷག་ལ་རྨས་སྐྱོན་ཕོག་འདུག་ལ། རྨས་སྐྱོན་ཕོག་མཁན་དང་འདས་གྲོངས་སུ་འགྱུར་མཁན་མང་ཆེ་བ་ནི་མེ་ཤུགས་འཕུར་མདའ་དང་སྒྱོགས་མདེལ་སོགས་འབར་གས་བྱུང་པའི་རྒྱུ་མཚན་གྱིས་ཡིན་རབས་བརྗོད་འདུག
ཨུ་རུ་སུ་དང་ཡུག་རེན་བར་གྱི་དམག་འཁྲུག་གི་ཁྲོད་དུ་འདས་གྲོངས་སུ་འགྱུར་བའི་དམག་མིའི་གྲངས་ཀ་གསལ་བོ་ཞིག་སུ་ལ་ཡང་བརྗོད་རྒྱུ་མེད་ན་ཡང་། ཚོད་དཔག་བྱས་པ་ལྟར་ན་ཡུག་རེན་གྱི་དམག་མི་༩,༠༠༠ ལྷག་དང་ཨུ་རུ་སུ་ཡི་དམག་མི་༡༥,༠༠༠ ནས་༢༠,༠༠༠ བར་འདས་གྲོངས་གྱུར་ཡོད་རབས་བརྗོད་འདུག
སྤྱི་ལོ་༢༠༡༤ ནས་བཟུང་ད་ལྟའི་བར་དུ་ཡུག་རེན་གྱིས་ཧ་ལམ་རང་ཉིད་ཀྱི་མངའ་ཁོངས་ཀྱི་ས་ཆའི་བརྒྱ་ཆ་༢༢% ལ་དབང་བསྒྱུར་བྱེད་མ་ཐུབ་པ་ཆགས་ཡོད་པའི་གནས་ཚུལ་ཐོན་འདུག་ལ།འཛམ་གླིང་དངུལ་ཁང་གིས་སྤྱི་ལོ་༢༠༢༢ ལོར་ཡུག་རེན་གྱི་རྒྱལ་ནང་ཐོན་སྐྱེད་ཕྱོགས་བསྡོམས་བརྒྱ་ཆ་༤༥% མར་ཆག་རྒྱུ་ཡིན་རབས་བརྗོད་འདུག
ཨུ་རུ་སུས་ཡུག་རེན་ལ་བཙན་འཛུལ་བྱས་པ་དང་ནུབ་ཕྱོགས་པ་ཚོས་ཨུ་རུ་སུ་ལ་ཉེས་ཆད་དུ་མ་ཞིག་བཀལ་ཡོད་པའི་རྒྱུ་མཚན་གྱིས་འཛམ་གླིང་ཁྱོན་ཡོངས་ལ་ནུས་པ་དང་འབྲུ་རིགས། རྫས་ལུད་དང་ལྕགས་རིགས་སོགས་ཀྱི་གོང་ཚད་འཕར་ཡོད་པ་དང་། ཨུ་རུ་སུ་ནི་འཛམ་གླིང་ཐོག་སྣུམ་ཕྱི་ཚོང་བྱེད་མཁན་ཨང་གཉིས་པ་དེ་ཡིན་པ་མ་ཟད། སོལ་རླངས་དང་འབྲུ་རིགས་སོགས་ཕྱི་ཚོང་བྱེད་མཁན་ཆེ་ཤོས་ཤིག་ཀྱང་ཡིན་འདུག་ལ། ཨུ་རུ་སུ་ཡུག་རེན་ལ་བཙན་འཛུལ་བྱས་པའི་རྗེས་སུ། གོ་ལ་ཁྱོན་ཡོངས་ལ་སྣུམ་གྱི་གོང་ཚད་འཕར་ཡོད་པ་དང་། སྤྱི་ལོ་༢༠༠༨ ནས་བཟུང་ད་བར་སྣུམ་གྱི་གོང་ཚད་མཐོ་ཤོས་སུ་བསླེབས་ཡོད་པའི་གནས་ཚུལ་ཐོན་འདུག
ཟླ་འདིའི་ཚེས་༢༥ ཉིན་(Business Time) ཞེས་པའི་གསར་ཁང་གིས་གནས་ཚུལ་སྤེལ་གསལ་ལྟར་ན། ད་བར་རྒྱལ་ཁབ་མང་པོས་ཨུ་རུ་སུ་ལ་དཔལ་འབྱོར་ཉེས་ཆད་བཏང་ཡོད་པ་དང་ཡུག་རེན་ལ་གོ་མཚོན་དང་དཔལ་འབྱོར་གྱི་ཐོག་ལ་རོགས་རམ་ཕོན་ཆེན་བྱས་ཡོད་ཀྱང་། ད་ལྟའི་ཆར་རྒྱལ་ཁབ་སོ་སོའི་ནང་དུ་དཔལ་འབྱོར་གྱི་དཀའ་ངལ་འཕྲད་བཞིན་ཡོད་པས། ཕྱོགས་གཉིས་བར་གྱི་དམག་འཁྲུག་མུ་མཐུད་དུ་ཕྱིན་ན། ཡུག་རེན་ལ་རྒྱབ་སྐྱོར་བྱེད་མཁན་ཇེ་ཉུང་དུ་འགྲོ་སྲིད་རབས་ཀྱི་གནས་ཚུལ་བཀོད་འདུག དེ་ཡང་ལོ་འདིའི་སྤྱི་ཟླ་ལྔ་པའི་ནང་དུ་ཡུ་རོབ་ཀྱི་རྒྱལ་ཁབ་བཅུ་ཡི་ནང་ལ་བསམ་ཤོག་བསྡུ་ལེན་ཞིག་བྱས་ཡོད་པའི་ནང་། མི་མང་བརྒྱ་ཆ་༤༢% ཀྱིས་སོ་སོའི་རྒྱལ་ཁབ་ཀྱིས་ཡུག་རེན་ལ་རོགས་སྐྱོར་དང་དོ་སྣང་བྱེད་རྒྱུ་མང་དྲགས་པའི་བསམ་ཚུལ་བཤད་ཡོད་པའི་གནས་ཚུལ་ཐོན་འདུག།
གསར་འགོད་པ་བློ་བཟང་རྒྱ་མཚོ།
