ཁ་ན་ཊའི་ལོ་ན་ཆུང་ཤོས་ཀྱི་གསང་ཉུལ་བ།

གནས་ཚུལ་ཡོངས་ཁུངས། ཐའེ་ཝན་ཀུ་ཤུ་ཉིན་རེའི་ཚགས་པར།

སྒྱུར་བ་པོ། རྫ་ཚེ་རིང་བཀྲ་ཤིས། 

ཁ་ན་ཊའི་བྱང་ཕྱོགས་ཀྱི་མངའ་སྡེ་བི་རི་ད་ཁོ་ལུམ་པི་ཞེས་པའི་ས་ཁུལ་གྱི་རང་ལོ་དྲུག་ལ་སོན་པའི་བྱིས་པ་（Jacob St. Jean）ལྗེན་ཞེས་པས་གསང་འཕྲིན་མི་སྣ་ནི་སྒྲུང་དེབ་ཁྲོད་ཀྱི་མི་སྣ་ཙམ་མིན་པ་ཤེས་པ་དང་། ཁོས་ཨ་མ་ལ་གསང་ལས་མི་སྣ་དངོས་སུ་འཚོལ་རོགས་ཞེས་བཤད། དེ་རྗེས་ཨ་མས་རོགས་པ་བྱས་ཏེ་༢༠༡༤ ལོའི་ཟླ་༡༡ པར་འཕྲིན་ཡིག་ཞིག་ཁ་ན་ཊའི་བདེ་འཇགས་གསང་འཕྲིན་ཁང་ལ་བཏང་ཞིང་། གསང་ཕྲིན་ཁང་གི་ནང་དུ་ཕྲུ་གུའི་མཉམ་སྤྲོ་ཁང་(俱樂部) ཞིག་བཙུགས་ནས་ཇིན་ལ་གསང་ལས་མི་སྣ་བྱེད་སྟངས་ཉམས་སུ་མྱོང་དུ་བཅུག་ན་འགྲིག་གི་རེད་དམ་ཞེས་དྲིས།

དེ་ནས་བཟུང་། ཟླ་བ་བཞིའི་རིང་ལྗེན་གྱིས་ཉི་མ་རེ་རེ་བཞིན་གསང་འཕྲིན་ལས་ཁུངས་ཀྱི་འཕྲིན་ལན་ཡོང་རེའི་ཡིག་སྒམ་ལ་བལྟས་ཤིང་། ཡིག་སྒམ་སྟོང་བ་ཡིན་པ་མཐོང་ཐེངས་རེ་བཞིན་རེ་བ་སྟོང་ཟད་ངང་ནང་དུ་ལོག་གི་ཡོད་ལ། ད་དུང་ལྗེན་གྱི་ཨ་མས། ཁོང་ཚོར་བྲེལ་བ་ཆེན་པོ་ཡིན་སྟབས་ལན་སློག་རྒྱུའི་དུས་ཚོད་མ་བྱུང་བ་ཡིན་རྒྱུ་རེད་ཅེས་ལྗེན་ལ་སེམས་གསོ་བྱེད་ཀྱི་ཡོད། འོན་ཀྱང་སྤྱི་ཟླ་གསུམ་པའི་ཟླ་སྐེད་ཀྱི་ཉིན་ཞིག་རྟོགས་དཀའ་བའི་སྐུར་དངོས་འབོག་སྒྲིལ་ཞིག་ལྗེན་གྱི་ལག་པར་འབྱོར་ཞིང་། འཕྲིན་ཡིག་དང་སྒྲིལ་ཐུམ་སྐུར་མཁན་ནི་ཁ་ན་ཊའི་བདེ་འཇགས་གསང་ལས་ཁང་གི་ཡན་ལག མངའ་སྡེའི་བདེ་འཇགས་གསང་དོན་ཁང་གི་མགོ་དཔོན་ཡིན་པ་རེད།

ཐུམ་པོའི་ནང་དུ་འཕྲིན་ཡིག་ཅིག་དང་། ད་དུང་ལྗིན་གསང་ཕྲིན་མི་སྣ་ཞིག་ཏུ་འགྱུར་རྒྱུར་དགོས་ངེས་ཀྱི་གཞི་རྩའི་ཅ་ལག་དག་ཀྱང་ཡོད་པ་སྟེ། ཁ་ན་ཊའི་བདེ་འཇགས་གསང་ཕྲིན་ཁང་གི་རྟགས་མ་ལྡན་པའི་ཞྭ་མོ་དང་། བདེ་འཇགས་གསང་དོན་ཁང་གི་གསང་འཕྲིན་གྱི་ཉེན་རྟགས།（警徽） ད་དུང་ཕྲུ་གུའི་མིང་དངོས་སུ་བརྐོས་པའི་གསང་ཉུལ་ཨང་གྲངས་ཀྱི་སྒོར་དབྱིབས་རྟགས་མ་ཞིག་བཅས་མཉམ་དུ་ཡོད་པ་རེད།

འཕྲིན་ཡིག་གི་ནང་དུ། ཁྱོད་རང་ལ་འཕྲིན་ལན་འགོར་འགྱངས་སོང་བའི་རྒྱུ་མཚན། དེང་ཐོག་ང་ཚོས་སྦས་ཐབས་(隱形)སྣག་ཚ་བེད་སྤྱོད་བཏང་ནས་ཡིག་ལན་ཞིག་སྐུར་བ་ཡིན་ཏེ། ཡི་གེ་དེ་གཡུགས་བཞག་འདུག དེ་ནས་ང་ཚོས་གསང་ཨང་ཅན་གྱི་ཡི་གེ་ཞིག་བྲིས་པ་ཡིན་ཏེ། ལྗེན་ལ་གསང་ཨང་བཀྲོལ་སྟངས་ཀྱི་སྦྱོང་བརྡར་ཐོབ་མྱོང་མེད་པ་བསམ་བློར་འཁོར་རྗེས། ད་བཟོད་ང་ཚོས་སྤྱིར་བཏང་གི་དབྱིན་ཡིག་བེད་སྤྱོད་བཏང་ན་ཡི་གེ་འདི་བྲིས་པ་ཡིན། ཞེས་གསལ་བཤད་བྱས་ཡོད་པ་མ་ཟད། ཡང་ཕྲིན་ཡིག་ཏུ། ལྗེན་ཇི་ལྟར་བྱས་ན་གསང་ཉུལ་བ་ཞིག་བྱེད་སྟངས་ཀྱི་སྐོར་ལ་ཉམས་འཇོག་དགོས་པའི་དོན་ཚན་གླེང་ཡོད་པའི་ནང་དུ།  བདེན་པ་དྲང་མོ་དང་བསམ་པ་རྣམ་དག་བྱེད་དགོས་པར་མ་ཟད། ཁྱད་པར་དུ་ཕ་མའི་ངག་ལ་ཉན་དགོས་ཞེས་འཁོད།

འཕྲིན་ལན་དང་ཅ་ལག་འབྱོར་བར་ལྗེན་ལ་དགའ་ཚོར་ཆེན་པོ་བྱུང་ཞིང་། གསར་འགོད་པས་ཁྱོད་ཀྱི་གསང་ཉུལ་ཨང་གྲངས་ག་ཚད་རེད་ཅེས་དྲིས་པར། ལྗེན་གྱིས་བག་ཟོན་དང་ལྡན་པའི་ཐོག་ནས། རང་ཉིད་གསང་འཕྲིན་ལས་ཁུངས་ཀྱི་མི་སྣ་ཞིག་ཡིན་པའི་ཆ་ནས་ཧ་ཅང་ནན་ཏན་གྱིས་གསང་བ་སྲུང་སྐྱོབ་བྱེད་རྒྱུའི་འོས་འགན་ཡོད་པ་རེད། ཅེས་ལན་བཏབ།

གསར་འགྱུར་འདི་བོད་བསྒྱུར་བྱས་པའི་དམིགས་ཡུལ་ནི་ཁྱེད་ལ་བསམ་གཞིག་གི་ཁོངས་སྣེ་ཁག་ཅིག་འཁོ་འདོན་བྱ་རྒྱུའི་ཆེད་དུ་སྟེ། གཤམ་དུ་ངས་དྲི་བ་ཁག་གཅིག་འགོད་རྒྱུ་ཡིན།

གཅིག གལ་ཏེ་བྱིས་པ་དེ་ང་ཚོའི་ཁོར་ཡུག་གི་བྱིས་པ་ཞིག་ཡིན་ན་ཨ་མས་བྱིས་པའི་ངག་ལྟར་དངོས་སུ་གསང་ཕྲིན་ཁང་ལ་ཡི་གེ་གཏོང་གི་རེད་དམ།

གཉིས། ལྗེན་གྱི་ཨ་མས་ག་རེ་བྱས་ནས་རང་གི་ཕྲུ་གུའི་བསམ་བློར་དགག་པ་མ་བརྒྱབ་པར་དེ་ལས་ལྡོག་ཏེ་ཕྲིན་ཡིག་དངོས་སུ་བྲིས་པ་རེད།

གསུམ། ཇིན་གྱི་ཨ་མར་ཕྲུ་གུའི་སེམས་ཁམས་ཀྱི་ལྡོག་ཟླར་ལངས་རྒྱུའི་བསམ་བློ་མེད་པ་མ་ཟད། ཕྲུ་གུ་མགོ་སྐོར་གཏོང་བའི་ཐབས་ཤེས་ཀྱང་མ་འཐེན་པ་རེད།

བཞི། གལ་ཏེ་ང་ཚོའི་ཨ་མ་ཞིག་ལ་ཡི་གེ་དངོས་སུ་གཏོང་རྒྱུའི་བསམ་བློའི་འཆར་སྣང་ཡོད་ཀྱང་། གསང་འཕྲིན་ཁང་ལ་དངོས་སུ་འཕྲིན་ཡིག་དེ་འདྲ་ཞིག་གཏོང་རྒྱུ་ནི་ཉེན་ཁ་ཅན་ཞིག་ཏུ་ཚོར་སྲིད་རྒྱུ་མ་རེད་དམ།

ལྔ། གལ་ཏེ་ང་ཚོའི་གནས་ཡུལ་རྒྱལ་ཁབ་ཀྱི་གསང་འཕྲིན་ཁང་ལ་ཡི་གེ་དེ་འདྲ་ཞིག་འབྱོར་ན་དེར་ལྟ་སྟངས་ག་འདྲ་ཞིག་འཛིན་སྲིད་ཀྱི་རེད།

དྲུག ཁ་ན་ཊའི་གསང་ཉུལ་ལས་ཁུངས་ཀྱིས་ག་རེ་བྱས་ནས་ཕྲུ་གུ་ལོ་དྲུག་ཅན་ཞིག་གི་དགའ་མོས་དང་སེམས་ཁམས་ལ་དེ་ཙམ་ཆ་འཇོག་དང་བརྩི་མཐོང་གནང་བ་རེད།།