རྒྱལ་སྤྱི་ཉེས་ཡང་ཚོགས་པའི་སྙན་ཐོའི་ནང་གི་བོད་དང་ཤིན་ཅང་།

རྒྱལ་སྤྱི་ཉེས་ཡང་ཚོགས་པས་ཟླ་འདིའི་ཕྱི་ཚེས་༢༥ ཉིན་བཏོན་པའི་ལོ་འཁོར་སྙན་ཐོའི་ནང་། འདས་པའི་ལོ་གཅིག་གི་རིང་རྒྱལ་ཁབ་སོ་སོའི་འགྲོ་བ་མིའི་ཐོབ་ཐང་གི་གནས་སྟངས་གསལ་སྟོན་བྱེད་ཡོད་པ་བཞིན། རྒྱ་ནག་གིས་བོད་དང་ཤིན་ཅང་ཐོག་འཛིན་པའི་དྲག་གནོན་གྱི་སྲིད་ཇུས་ལ་དམིགས་བསལ་འགྲེལ་བརྗོད་ཞིབ་ཕྲ་བྱས་འདུག

ཡུ་གུར་མི་རིགས།

རྒྱལ་སྤྱི་ཉེས་ཡང་ཚོགས་པས་བཏོན་པའི་ལོ་འཁོར་སྙན་ཐོའི་ནང་བསྟན་དོན། རྒྱ་ནག་སྲིད་གཞུང་གིས་ཤིན་ཅང་ཡུ་གུར་མི་རིགས་རང་སྐྱོང་ལྗོངས་དང་ས་ཁུལ་གཞན་དུ་བྱུང་བའི་ཐེངས་འགའི་དྲག་པོའི་དོན་རྐྱེན་དེ་ཡུ་གུར་གྱི་མིས་སྤེལ་བར་སྙད་འདོགས་ཏེ། སྲིད་གཞུང་གི་དྲག་གནོན་སྲིད་ཇུས་ལག་བསྟར་བྱེད་བཞིན་ཡོད། ལོ་སྔོན་མའི་ཕྱི་ཟླ་༥ པའི་ནང་། སྲིད་གཞུང་གིས་དྲག་པོའི་འཇིགས་སྐུལ་ལས་འགུལ་ལ་རྒོལ་རྡུང་ཚ་ནན་ཟེར་བའི་དམིགས་བསལ་གྱི་བྱ་སྤྱོད་སྤེལ་བའི་ཁྲོད། མི་སྒེར་གྱི་ཉེས་འཛུགས་ལ་དྲང་བདེན་གྱི་ཁྲིམས་ཞིབ་བྱས་ཡོད་མེད་ཐད་བློ་འཚབ་ཡོད།

སྙན་ཐོ་དེར་གཞིགས་ན། ཕྱི་ལོ་༢༠༡༤ ཟླ་༥ པའི་ཚེས་༢༦ བར། ཤིན་ཅང་ཡུ་གུར་མི་རིགས་རང་སྐྱོང་ལྗོངས་ཀྱིས་གཞུང་འབྲེལ་ཐོག་ཕྱིར་བསྒྲགས་བྱས་པའི་“འཇིགས་སྐུལ་དང་དྲག་སྤྱོད་སྒྲིག་འཛུགས་”ཀྱི་དོགས་གཞིའི་མི་སྣ་༢༠༠ འཇུ་བཟུང་དང་། ཁྱོན་འཇིགས་སྐུལ་ཤོག་ཁག་༢༣ ཙམ་རྩ་གཏོང་བཏང་ཡོད་པ་རེད། སྙན་ཐོའི་ནང་། ཡུ་གུར་མི་རིགས་ཀྱི་ལས་ཞུགས་དང་སློབ་གསོ། སྡོད་ཁང་གླ་གཏོང་སོགས་ཀྱི་ཕྱོགས་ལ་སྤྱི་ཡོངས་ནས་དབྱེ་འབྱེད་དང་ཁྱད་གསོད། དེ་བཞིན་ཆོས་ལུགས་དད་མོས་རང་དབང་བཙན་འཕྲོག ཆབ་སྲིད་ཐོག་ལའང་ཟུར་འབྱེད་བཅས་བྱེད་བཞིན་ཡོད་འདུག
བོད།

སྙན་ཐོའི་ནང་འཁོད་དོན། བོད་མིའི་ཆོས་ལུགས་དང་སྨྲ་བརྗོད་རང་དབང་། འདུ་འཛོམས་རང་དབང་སོགས་ཀྱི་ཐོག་ལ་སྔར་བཞིན་དབྱེ་འབྱེད་དང་ཚད་བཀག་བཟོ་བཞིན་པ་མ་ཟད། བོད་མིའི་ཆོས་ལུགས་ཀྱི་དབུ་ཁྲིད་དང་རྩོམ་པ་པོ། ལས་འགུལ་བ་མང་པོ་འཇུ་བཟུང་བྱས་ཡོད།

ལོ་སྔོན་མའི་ཕྱི་ཟླ་༨ པའི་ནང་། སི་ཁྲོན་དཀར་མཛེས་(རྒྱ་ནག་གིས་བཅད་བགོས་བྱས་པའི་དེང་གི་སྲིད་འཛིན་ས་ཁུལ) ཀྱི་བོད་མི་རྣམས་ཀྱིས་གྲོང་སྡེའི་འགོ་ཁྲིད་ཅིག་འཇུ་བཟུང་བྱས་པའི་གནད་དོན་ཆེད་ངོ་རྒོལ་འདུ་འཛོམས་བྱེད་སྐབས། ཉེན་རྟོག་པས་གང་བྱུང་མེ་མདའ་བརྒྱབ་པར་བརྟེན། ཉུང་མཐར་ཡང་ངོ་རྒོལ་བ་མི་༤ ལ་རྨས་སྐྱོན་ཚབས་ཆེ་ཕོག་སྟེ་འདས་གྲོངས་སུ་གྱུར་པ་དང་། ངོ་རྒོལ་བ་གཞན་ཞིག་བཀག་ཉར་གྱི་དུས་སྐབས་སུ་རང་སྲོག་བཅད།

རྒྱལ་སྤྱིའི་ཉེས་ཡང་ཚོགས་པས་བཏོན་པའི་སྙན་ཐོའི་ནང་འཁོད་པ་ལྟར་ན། ཕྱི་ལོ་༢༠༡༤ ལོར་ཁྱོན་བོད་མི་༧ གྱིས་བོད་རིགས་འདུས་སྡོད་ས་ཁུལ་དུ་རང་ལུས་མེར་སྲེག་བཏང་སྟེ། རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་གྱི་སྲིད་ཇུས་ལ་ངོ་རྒོལ་བྱས་པའི་ཁྲོད། ཉུང་མཐར་ཡང་བོད་མི་གཉིས་འདས་གྲོངས་སུ་གྱུར་པ་དང་། ཕྱི་ལོ་༢༠༡༡ ལོའི་ཕྱི་ཟླ་༣ པ་ནས་ད་ལྟའི་བར། བོད་མིས་རང་སྲེག་བྱས་པའི་གྲངས་ཀ་༡༣༡ ཙམ་འཕར་ཡོད་ལ། བོད་མི་རང་སྲེག་མཁན་གྱི་ནང་མི་དང་གྲོགས་པོ་རྣམས་སྲིད་གཞུང་གི་ཉེས་འཛུགས་ཀྱི་དམིགས་འབེན་དུ་གྱུར་པ་མ་ཟད། ས་ཁུལ་དང་རྫོང་ཁ་ཤས་ཀྱི་ནང་དུ། རང་སྲེག་མཁན་གྱི་ནང་མི་དང་༧གོང་ས་ཏཱ་ལའི་བླ་མ་མཆོག་གི་དྲུང་ནས་ཆོས་ཞུ་མྱོང་མཁན་གྱི་བོད་མི་རྣམས་གྲོང་ཚོ་ནང་གི་འོས་བསྡུའི་འོས་མི་ལའང་ལངས་ཆོག་གི་མེད་པ་རེད།

སྙན་ཐོ་དེའི་ནང་དུ་ད་དུང་ཕྱོགས་གཞན་དག་གི་ཐོག་ནས་རྒྱ་ནག་གི་འགྲོ་བ་མིའི་ཐོབ་ཐང་ཀྱི་གནས་སྟངས་ཐད་དབྱེ་ཞིབ་བྱས་ཡོད་པའི་ཁྲོད། རྒྱ་མཚན་མེད་པར་བཀག་ཉར་དང་སྡུག་སྦྱོང་གནར་གཅོད། ཁྲིམས་ལུགས་བེད་སྤྱོད་ལོག་པར་གཏོང་བ། སྲོག་ཁྲིམས་ལག་བསྟར། འགྲོ་བ་མིའི་ཐོབ་ཐང་། སྨྲ་བརྗོད་རང་དབང་། ཆོས་ལུགས་དད་མོས། བུ་བཙའ་ཐོབ་ཐང་། ཕྱི་མི་ལས་མིའི་ཐོབ་ཐང་། ད་དུང་ཧོང་ཀོང་དང་མའེ་ཁའོ་དམིགས་བསལ་སྲིད་འཛིན་ས་ཁུལ་གྱི་སྡེ་ཚན་སོགས་ཚུད་ཡོད་པ་རེད།།

གསར་འགོད་པ་ཏྲེ་ཧོར་ཐུབ་བསྟན།