བོད་ནང་རང་ལུས་མེར་སྲེག་གིས་རྒྱ་ནག་ལ་ངོ་རྒོལ་བྱེད་མཁན་༡༣༣ ཟིན་འདུག

ཟླ་འདིའི་ཚེས་༡༦ ཉིན་གྱི་སྔ་དྲོ་བོད་མདོ་སྨད་བླ་བྲང་ཨ་མཆོག་ཡུལ་ཚོར་བོད་མི་སངས་རྒྱས་མཁར་གྱིས་རང་ལུས་མེར་སྲེག་གིས་རྒྱ་ནག་ལ་ངོ་རྒོལ་བྱས་ཏེ་སྐུ་གྲོངས་པར་བརྟེན། ཟླ་འདིའི་ཚེས་༡༧ དགོང་མོར་ཁོང་ལ་གདུང་སེམས་མཉམ་བསྐྱེད་མཚོན་ཆེད་དུ་དྷ་སར་མར་མེའི་ཁྲོམ་སྐོར་གྱི་ལས་འགུལ་ཞིག་སྤེལ་ཡོད་པ་རེད།

དེ་ཡང་ཟླ་འདིའི་ཚེས་༡༧ དགོང་མོ་བོད་རང་བཙན་སློབ་ཕྲུག་ཚོགས་པ་དང་། ས་གནས་བོད་ཀྱི་གཞོན་ལྷན། ས་གནས་བོད་ཀྱི་བུད་མེད་ཚོགས་པ་བཅས་ཀྱིས་མི་མང་གི་མར་མེའི་ཁྲོམ་སྐོར་གོ་སྒྲིག་བྱས་པ་དང་། དེར་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མས་སངས་རྒྱས་མཁར་གྱིས་རང་ལུས་མེར་སྲེག་གི་ངོ་རྒོལ་དེ་བོད་མི་རིགས་དང་རྒྱལ་ཁབ། ཆོས་ལུགས་ཀྱི་ཆེད་དུ་རྒྱ་ནག་ལ་ངོ་རྒོལ་བྱས་པ་ཡིན་སྐོར་དང་འབྲེལ་ནས་གསུང་དོན། “ང་ཚོ་འདིར་འཛོམས་པ་དེ་མི་རིགས་ཀྱི་ལ་རྒྱ་རེད་ལ། མི་རིགས་ཀྱི་ལ་རྒྱ་ཡོད་ཅེས་སེམས་ལ་ཉར་འདུག་རྒྱུ་ཞིག་མ་རེད། མི་རིགས་ཀྱི་ལ་རྒྱ་སེམས་ལ་ཉར་དགོས་རེད་དེ། སྟོན་ས་ཞིག་ལ་སྟོན་དགོས་རེད། སྤྲོ་པོ་བྱེད་པའི་སྐབས་དང་སྡུག་པོ་མྱངས་པའི་སྐབས་གཉིས་ཀར་ཕྱི་ལ་ཐོན་ནས་རྣམ་འགྱུར་སྟོན་དགོས་པ་རེད་”ཅེས་གསུངས་སོང་།

ཁོང་གིས་བོད་དོན་ཆེད་འདས་གྲོངས་བ་རྣམས་ལ་ནང་པ་ཞིག་ཡིན་པའི་ཆ་ནས་བསྔོ་བ་སྨོན་ལམ་དགོས་སྐོར་དང་། “རྒྱལ་གཅེས་དཔའ་བོ་དཔའ་མོ་ཚོས་རང་སྲོག་ཤོར་བ་དེ་མི་རིགས་ཀྱི་འཐབ་རྩོད་ཆེད་དུ་རེད། ང་ཚོ་མི་རིགས་ཀྱི་འཐབ་རྩོད་པ་ཞིག་ཡིན་པའི་ཆ་ནས་དེ་ལ་རྒྱབ་སྐྱོར་དང་གདུང་སེམས་མཉམ་བསྐྱེད་དགོས་པ་རེད། རྒྱལ་གཅེས་དཔའ་བོ་དཔའ་མོ་ཚོས་༧རྒྱལ་བ་རིན་པོ་ཆེ་བོད་ལ་གདན་འདྲེན་དགོས་པ་དང་། བོད་ལ་རང་དབང་དགོས་པ། སྐད་ཡིག་སྲུང་སྐྱོབ་དགོས་པ། སངས་རྒྱས་ཆོས་ལུགས་རང་དབང་གི་ཐོག་ནས་དར་ཁྱབ་དགོས་སྐོར་བརྗོད་ཡོད་རེད། ཁོང་ཚོའི་ཤུལ་ང་ཚོས་འཛིན་དགོས་པ་དང་། བོད་མི་མཐོ་དམན་མེད་པར་ཚང་མང་རིག་གཞུང་ལ་བདག་པོ་རྒྱག་དགོས་པ་རེད་”ཅེས་སོགས་གསུངས་སོང་།

༢༠༠༩ ལོ་ནས་བོད་ནང་རྒྱ་ནག་ལ་རང་ལུས་མེར་སྲེག་གི་ངོ་རྒོལ་བྱེད་མཁན་༡༣༣ ཟིན་ཡོད་པ་དང་། མང་ཆེ་འདས་གྲོངས་སུ་སོང་། ཁག་ཅིག་བཀག་ཉར་ཁང་དང་སྨན་ཁང་སོགས་སུ་ཡོད་པ་རེད། བཙན་བྱོལ་བོད་མིའི་སྤྱི་ཚོགས་ནང་༡༩༩༨ ནས་ད་ལྟའི་བར་རང་ལུས་མེར་སྲེག་གིས་རྒྱ་ནག་ལ་ངོ་རྒོལ་བྱེད་མཁན་༧ བྱུང་བ་དང་། དེའི་ནང་ནས་༤ འདས་གྲོངས་སུ་སོང་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།