ཁོར་ཡུག་གཙང་ཉར་བྱེད་དགོས་པ་དེ་གལ་ཆེན་པོ་ཡིན།

ཟླ་འདིའི་ཚེས་༢༢ ཉིན་ནས་གཟུང་དགའ་ལྡན་བྱང་རྩེ་སློབ་གྲྭའི་གོ་སྒྲིག་འོག ༧གོང་ས་མཆོག་གིས་ལམ་རིམ་གསུང་ཆོས་རིང་ལ་ཁོར་ཡུག་གཙང་གཟོའི་ལས་འགུལ་ཞིག་སྤེལ་བཞིན་ཡོད་པ་དང་། དེའི་སྐོར་དགའ་ཤར་སློབ་སྤྱི་དགེ་བཤེས་རྒྱལ་མཚན་དབང་འདུས་ལ་གསར་འགོད་པས་བཅར་འདྲི་བྱས་པར།

ཁོང་གིས་གསུང་དོན། དགའ་ཤར་སློབ་གྲྭའི་ངོས་ནས་ནམ་བཞག་རྒྱུན་དུ་ཁོར་ཡུག་གཙང་བཟོ་དེ་གལ་ཆེན་ལ་བརྩི་ཡི་ཡོད། རྩ་བའི་ཁོར་ཡུག་གཙང་ཉར་བྱེད་དགོས་པ་དེ་གལ་ཆེན་པོ་ཡིན་པ་ང་རང་ཚོ་ཚང་མས་མཁྱེན་གསལ་རེད། ལྷག་པར་དུ་ང་ཚོའི་ཆོས་ཕྱོགས་ནས་བཤད་ན། བྱི་དོར་རམ་འཕྱག་བདར་བྱས་པའི་ཕན་ཡོན་ནི་དམོའི་ནང་ན་ལྔ་ཙམ་གསུངས་ཡོད་པ་རེད། འོན་ཀྱང་ངས་སྐབས་འདིར་ཞུ་མི་དགོས་པ་བྱོས། ལྷག་པར་དུ་ཡན་ལག་བདུན་གྱི་ནང་ན་ཐོག་མར་གནས་ཁང་བྱི་དོར་བྱ་ནས་ཕྱོགས་བཅུའི་རྒྱལ་བ་སྲིས་བཅས་གདན་དྲང་ནས་མཆོད་པ་ཕུལ་དེ་འདྲ་བྱེད་པ་ལ། ཐོག་མར་གནས་ཁང་དང་ཁོར་ཡུག་བྱི་དོར་བྱེད་པ་དེ་གལ་ཆེན་པོ་གཅིག་གསུང་བཞིན་ཡོད་པ་རེད། གཞན་ཡང་ཤེར་ཕྱིན་གྱི་མདོ་ཡི་སྐབས་སུ་དེ་བཞིན་གཤེགས་པ་ཆོས་འཕགས་ཤེར་ཕྱིན་གྱི་ཆོས་སྟོན་དུ་ཕེབས་པའི་སྐབས་སུ་ཁོང་གིས་སློབ་མ་རྟག་ཏུ་ངུས་ཁོར་ཡུག་ཆག་ཆག་གདབ་བྱེད་ཀྱི་ཆུ་བདུན་གྱིས་བྱིན་གྱིས་བརླབས་པའི་ཆོ་འཕྲུལ་གྱི་མ་མཐོང་བའི་ཕྱིར་ན།ཁོང་གིས་ལུས་གྱི་རྩ་བཆད་ནས་ཁྲག་གིས་ས་ཕྱོགས་ཆག་ཆག་གདབ་ནས་ཚོགས་ཚོགས་རླབས་པོ་ཆེ་རྫོགས་ནས་དེང་ངེས་འཛིན་གྱི་སྒོ་མང་པོ་རྙེད་པ་སོགས་ཤེར་ཕྱིན་གྱི་མདོའི་ནང་གསུང་ཡོད་པ་རེད།དེ་དག་དང་སྒོ་བསྟུན་ནས་ཁོར་ཡུག་གཙང་བཟོའི་ལས་གཞི་འདི་བཞིན་སྤེལ་བཞིན་ཡོད་ཅེས་གསུངས་སོང་།

ཁོང་གིས། ལྷག་པར་དུ་༧གོང་ས་མཆོག་འདིར་ཆིབས་བསྒྱུར་ནམ་གནང་སྐབས་སུ་དམིགས་བསལ་སྒྲིག་ཆས་སོགས་གྲ་སྒྲིག་བྱས་ནས་ཁོར་ཡུག་གཙང་གཟོ་བྱེད་ཀྱི་ཡོད་ལ། ད་ལོ་ལས་གཞི་དེ་རྒྱ་ཆེ་རུ་བཏང་ནས་ལམ་རིམ་གསུང་ཆོས་སྐབས་གད་སྙིགས་བླུགས་ས་གྱིག་སྣོད་༤༠ ཙམ་དགའ་ལྡན་གླིང་དུ་བཀྲམས་ཟིན་པ་ཡིན། ཁོར་ཡུག་གཙང་བཟོ་གནང་མཁན་ཉིན་རེར་སློབ་ཕྲུག་གྲངས་༢༠ རེ་རེས་མོས་བྱས་ནས་གཏོང་གི་ཡོད་པ་རེད། རྩ་བའི་སློབ་ཕྲུག་ཁོ་རིང་ཚོའི་ངོས་ནས་མ་སྐུལ་དང་བླངས་ལས་འགུལ་འདི་སྤེལ་གཞིན་ཡོད་ཅེས་གསུངས་སོང་།

ཁོང་གིས་མུ་མཐུད་ནས་གསུང་དོན། གཞི་རྩའི་ཁོར་ཡུག་གཙང་གཟོའི་ལས་གཞི་འདི་ནི་༧གོང་ས་མཆོག་གི་དགོངས་གཞི་དང་། འགྲོ་བ་མིའི་ཁོར་ཡུག་གི་བསྒྲགས་གཏམ་སོགས་ཁ་བཤད་ཙམ་མིན་པར་ལག་ལེན་དུ་བསྟར་ཆེད་ང་ཚོས་དུས་རྒྱུན་ཟླ་རེའི་ནང་ཐེངས་མ་གཉིས་རེར་གདན་ས་དགའ་ལྡན་གླིང་དུ་ཁོར་ཡུག་གཙང་བཟོའི་ལས་འགུལ་འདི་ལྟར་སྤེལ་བཞིན་ཡོད། དེ་ནི་རང་གཞན་གཉིས་ལ་ཕན་ཡོད་གནོད་མེད་ཀྱི་ལས་གཞི་ཞིག་ཡིན་པ་དང་། ལྷག་པར་རང་ཅག་གི་འཚོ་གནས་སུ་གྱུར་པའི་ཁོར་ཡུག་འདི་རྒྱུ་རྐྱེན་སྣ་ཚོགས་ཀྱིས་ཉམས་རྒུད་དུ་འགྲོ་བཞིན་པའི་སྐབས་འདིར་སྣོད་བཅུད་སྲུང་སྐྱོབ་བྱེད་པ་ནི་ཤིན་ཏུ་ནས་ཀྱང་གལ་ཆེ་བར་མཐོང་། འགྲོ་བ་མིའི་རིགས་འཚོ་སྡོད་བྱེད་སའི་རང་བྱུང་ཁམས་འདིའི་ཆག་ཆེ་ཉམ་ང་ནི་ཐད་ཀར་མིའི་རིགས་ཀྱི་སྲིད་འབྱོར་རིག་གསུམ་གྱི་འཕེལ་རྒྱས་དང་ཉམས་རྒུད་ལ་འབྲེལ་བ་དམ་ཟབ་ཡོད་པ་མ་ཟད། ཕྱི་སྣོད་ཀྱི་འཇིག་རྟེན་ཆགས་འཇིག་དང་ནང་བཅུད་ཀྱི་སེམས་ཅན་སྐྱེ་འཆི་ཀུན་ལ་དབང་བསྒྱུར་བའི་བདག་པོ་ལྟ་བུ་རང་བྱུང་ཁམས་འདི་ཉིད་ཡིན་པས་ཚན་རིག་པ་སོགས་ཀུན་གྱིས་འདི་ལ་ཚེ་སྲོག་སྐྱེད་སྲིང་བྱེད་པའི་མ་མ་ཡང་ཟེར་གྱི་ཡོད།

ནམ་ཞིག་རང་བྱུང་ཁོར་ཡུག་འདི་འཇིག་ཚེ་སྐྱེ་འགྲོ་ཡོངས་ཀྱི་ཚེ་སྲོག་ཀྱང་དེ་ནས་མཇུག་བསྡུས་ཟིན་པས་ན། ཁོར་ཡུག་སྲུང་སྐྱོབ་བྱེད་པ་ནི་རྒྱལ་ཁབ་དང་ལས་ཁུངས་དག་གི་འོས་འགན་ཡིན་པ་མ་ཟད།་ཁོར་ཡུག་དེ་དང་དེར་འཚོ་སྡོད་བྱེད་པའི་མི་ཚང་མའི་འོས་འགན་ཡང་ཡིན།་དེའི་ཕྱིར་༧གོང་ས་མཆོག་གིས་ཀྱང་མི་རྣམས་ཀྱི་སྐྱེ་ཁམས་ཀུན་སྤྱོད་དང་ཁོར་ཡུག་སྲུང་སྐྱོང་གི་འདུ་ཤེས་གསོ་སྐྱོང་བྱ་དགོས་པའི་ཐད་དུ་བཀའ་སློབ་རིམ་པར་གནངས་ཡོད་ལ།བདག་ཅག་གི་སྟོན་པས་ཀྱང་། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། དེ་ལ་ས་ཆེན་འདི་བརྟེན་དེ་ལ་འགྲོ་བ་འདི་དག་བརྟེན། ཞེས་དང་། སྤྱོར་བའི་ཆོས་དྲུག་ཏུའང་གནས་ཁང་བྱི་དོར་བྱེད་པ་ནི་དང་བོར་འཇོག་དགོས་པའི་རྒྱུ་མཚན་ཡང་དེ་ཀ་ཡིན་པས།་ང་ཚོས་འདི་དང་འདི་ལྟ་བུའི་ཁོར་ཡུག་གཙང་བཟོའི་ལས་འགུལ་གང་མང་ཞིག་སྤེལ་དགོས་གལ་ཧ་ཅང་ཆེན་པོ་ཡོད་པ་རེད་ཅེས་འགྲེལ་བརྗོད་གནང་སོང་།

ལྷོག་ཕྱོགས་གསར་འགོད་པ་ཐུབ་བསྟན་བཀྲ་ཤིས།