བོད་ཀྱི་གྲྭ་པ་ཞི་རྒོལ་བ་ཞིག་རྒྱ་གཞུང་གིས་འཇུ་བཟུང་།

ཟླ་འདིའི་ཚེས་༢༦ ཉིན་གྱི་ཕྱི་དྲོ་བོད་ནང་གི་ཆུ་ཚོད་ ༤ དང་སྐར་མ་ ༤༠ ཡས་མས་སུ་ཨ་མདོ་རྔ་བ་རྫོང་གི་ཁྲོམ་གཞུང་དུ་རྔ་བ་ཀིརྟི་དགོན་པའི་དགེ་འདུན་པ་ཞིག་གིས་༸གོང་ས་མཆོག་གི་སྐུ་པར་ཞིག་ལག་ཏུ་འཕྱར་ནས། “རྒྱལ་བ་ཡིད་བཞིན་ནོར་བུའི་སྐུ་ཚེ་ཁྲི་ལོར་བརྟན་པར་ཤོག བོད་ལ་རང་དབང་དགོས་”སྐད་འབོད་བྱེད་སྐབས། རྒྱ་གཞུང་གི་དམག་མི་དང་ཉེན་རྟོག་པ་སླེབས་ནས་ཁོང་འཛིན་བཟུང་བཙན་ཁྲིད་བྱས་ཡོད་འདུག

རྨེའུ་དཀོན་རྒྱམ་གྱིས་གནས་ཚུལ་འགྲེལ་བརྗོད་བྱས་པ་ལྟར་བ། གྲྭ་པ་དེས་མིང་ལ་བློ་བཟང་འཕྲིན་ལས་ཟེར་ཞིང་། ཁོང་གིས་རྒྱ་གཞུང་དང་དེའི་སྲིད་བྱུས་གདུག་རྩུབ་ཅན་ལ་ཞི་རྒོལ་སྐད་འབོད་བྱས་ཏེ། སྐར་མ་གསུམ་བཞིའི་རྗེས་ནས་རྒྱ་གཞུང་གི་དྲག་ཆས་དམག་དཔུང་རུ་ཁག་དང་ཉེན་རྟོག་རུ་ཁག་ཚན་པས་གཅར་རྡུང་དྲག་པོའི་ཁྲོད་ནས་འཛིན་བཟུང་བཙན་ཁྲིད་བྱས་ཡོད་འདུག

གྲྭ་བློ་བཟང་འཕྲིན་ལས་ནི་རྔ་བ་ཀིརྟི་དགོན་པའི་བློ་རིག་འཛིན་གྲྭ་ནས་ཡིན་པ་དང་། ཕ་ཡུལ་ནི་རྔ་བའི་འབྲོག་སྡེ་རྨེའུ་རུ་མ་ཡུལ་ཚོའི་རུ་ཆེན་བཞི་པ་ནས་ཡིན་འདུག ཨ་ཕའི་མིང་ལ་ནོར་ལྡན་དང་ཨ་མའི་མིང་ལ་མཆོག་གྲུབ་ཟེར་བ་ཙམ་ལས་ལོ་རྒྱུས་ཞིབ་ཕྲ་ད་དུང་གསལ་པོ་ཤེས་རྟོགས་ཐུབ་ཀྱི་མེད་པ་རེད།།
གསར་འགོད་པ་ཆོས་ཉིད་འོད་ཟེར།