ལུགས་ཟུང་བསམ་གྲུབ་གླིང་གི་མཉམ་འབྲེལ་ཚོགས་ཆེན།

ཟླ་འདིའི་ཚེས་༢༣ ཉིན་གྱི་སྔ་དྲོ་རྒྱ་གར་ལྷོ་ཕྱོགས་སྦེལ་ཀོབ་ས་གནས་ལུགས་ཟུང་བསམ་གྲུབ་གླིང་གཞིས་རིམ་བོད་མིའི་སོ་ནམ་མཉམ་འབྲེལ་གྱིས་གོ་སྒྲིག་འོག ལུགས་བསམ་ས་གནས་མཉམ་འབྲེལ་ཤས་བདག་མི་མང་གི་ལོ་འཁོར་ལས་བསྡོམས་དང་འབྲེལ་བའི་ཚོགས་ཆེན་ཞིག་ལུགས་བསམ་མཉམ་འབྲེལ་ཚོགས་ཁང་ནང་འཚོགས་ཡོད་པ་རེད།

༢༠༡༣ དང་༢༠༡༤ ལོའི་ལུགས་བསམ་མི་མང་མཉམ་འབྲེལ་ལོ་འཁོར་ཚོགས་ཆེན་ཐོག་སྐུ་མགྲོན་གཙོ་བོ་ལུགས་ཟུང་བསམ་གྲུབ་གླིང་གི་ས་གནས་འགོ་འཛིན་ཀརྨ་དགྲ་འདུལ་དང་། མཉམ་འབྲེལ་ཚོགས་གཙོ་གླིང་ཚང་པདྨ་བདེ་ལེགས་གཉིས་ཀྱི་གཙོས་སྦེལ་ཀོབ་ས་གནས་ཀྱི་གཞུང་དང་གཞུང་འབྲེལ་མ་ཡིན་པའི་ལས་ཀྱི་སྣེ་མོ་རྣམས་དང། ལུགས་བསམ་ས་གནས་མཉམ་འབྲེལ་ཤས་བདག་མང་ཚོགས་༦༠༠ ལྷག་ཚོགས་ཆེན་ནང་མཉམ་ཞུགས་བྱས་ཡོད་པ་རེད།

ཚོགས་ཆེན་ཐོག་མཉམ་འབྲེལ་ཚོགས་གཙོ་པདྨ་བདེ་ལེགས་ཀྱིས་མཉམ་འབྲེལ་ཚོགས་ཆེན་དང་འབྲེལ་བའི་གསུང་བཤད་གནང་དོན། བོད་དོན་བདེན་མཐའ་མ་གསལ་གྱི་བར་དུ་བོད་མི་སྐྱབས་བཅོལ་བ་རྣམས་གནས་ཡུལ་ས་གནས་སོ་སོར་སྤྱི་པའི་སྒྲིག་འཛུགས་སྤྱི་དང་། ལྷག་པར་དུ་མཉམ་འབྲེལ་གྱི་སྒྲིག་འཛུགས་དགོས་རྒྱུ་གནད་འགག་ཆེན་པོ་ཡིན་པ་མ་ཟད། སྒྲིག་འཛུགས་དེ་མུ་མཐུད་རྒྱུན་གནས་དགོས་རྒྱུ་ཡང་ཧ་ཅང་གནད་འགག་ཆེན་པོ་ཡིན་སྐོར་དང་། ལྷག་པར་དུ་སྦེལ་ཀོབ་ལུགས་ཟུང་བསམ་གྲུབ་གླིང་གི་མཉམ་འབྲེལ་གྱི་ངོས་ནས་དེང་དུས་བོད་རིགས་ན་གཞོན་རྣམས་ནུབ་ཕྱོགས་རྒྱལ་ཁབ་ཁག་ཏུ་འགྲོ་རྒྱུར་དོ་སྣང་དང་འབད་བརྩོན་བྱེད་ཀྱི་ཡོད་ལ། བཙན་བྱོལ་བོད་མིའི་གཞིས་ཆགས་ཁག་གི་ནང་འཚོ་གནས་བྱེད་ཐུབ་ཀྱི་མེད་པའི་དཀའ་ངལ་དང་དེའི་གནས་སྟངས་ལ་གཞིགས་ཏེ། ལུགས་བསམ་ས་གནས་མཉམ་འབྲེལ་གྱི་ངོས་ནས་གཞིས་ཆགས་སྲ་བརྟན་དང་འབྲེལ་བ་ཡོད་པར་ངོས་འཛིན་བྱས་པའི་ཐོག་ནས། མུ་མཐུད་རྒྱུན་གནས་དང་ཡར་རྒྱས་ཚག་ཚུད་གནས་ཐུབ་རྒྱུར་དེ་སྔའི་ལས་དོན་བྱེད་ཕྱོགས་ཀྱི་ཐད་བཅོས་འགྱུར་གྱི་ཡོང་འབབ་ཡོད་སའི་ཚོང་ལས་ཚོང་ཁང་གསར་རྒྱག་དང་གཞིས་གྲོང་དང་གདན་ས་བཅས་སུ་ཆུ་མཛོད་གསར་རྒྱག་གིས་མཚོན། ལས་གཞི་མང་དག་ཅིག་རྒྱ་བསྐྱེད་ཤུགས་སྣོན་བྱེད་ཀྱི་ཡོད་པ་བཞིན། བོད་མིའི་སྒྲིག་འཛུགས་ཀྱི་དབུས་ས་གཉིས་ཀྱི་རྒྱབ་སྐྱོར་འོག་སྦེལ་ཀོབ་ས་གནས་ལུགས་ཟུང་བསམ་གྲུབ་གླིང་གི་མཉམ་འབྲེལ་གྱི་ཐོག་ནས་རྒྱ་གར་ཀར་ན་ཌ་ཀ་མངའ་སྡེ་གཞུང་ལ་ཆུ་རྐྱལ་རྫིང་བུ་དང་སྤྱི་སྤྱོད་རླུང་འཁོར་བཅས་ཀྱི་ལས་གཞི་འཆར་འབུལ་ཞུས་པ་ཁག་རིམ་པས་ལག་བསྟར་ཐུབ་རྒྱུའི་རེ་བ་ཡང་བྱེད་ཀྱི་ཡོད་སྐོར་དང་།

གཞན་ཡང་འདི་ལོ་བོད་མིའི་མཉམ་འབྲེལ་ཁག་༡༥ལས་སྦེལ་ཀོབ་ལུགས་ཟུང་བསམ་གྲུབ་གླིང་གི་མཉམ་འབྲེལ་གཅིག་པུར་མཉམ་འབྲེལ་གྱི་སྡེ་ཚན་ཡོངས་རྫོགས་ཀྱི་ནང་ནས་གཙང་ཁེ་བྱུང་བ་ཨང་དང་པོར་ངོས་འཛིན་གྱི་བྱ་དགའ་གསོལ་རས་ཞིག་ཀྱང་། འདི་ལོ་བོད་མིའི་སྤྱི་མཐུན་མཉམ་འབྲེལ་གྱི་འཛིན་སྐྱོང་ཚོགས་ཆེན་གྱི་ཐོག་གནང་ཡོད་པ་མ་ཟད། འདས་པའི་ལོ་གཉིས་ནང་ལུགས་བསམ་མི་མང་མཉམ་འབྲེལ་ལ་གཙང་ཁེ་བྱུང་བ་ལས་ལུགས་བསམ་ས་གནས་མཉམ་འབྲེལ་ཁྱབ་ཁོངས་གཞིས་གྲོང་རེ་ལ་ཧིན་སྒོར་འབུམ་གཅིག་རེ་བཅས་ཁྱོན་བསྡོམས་གཞིས་གྲོང་དྲུག་ལ་ཧིན་སྒོར་འབུམ་དྲུག་ཤས་བདག་མང་ཚོགས་ལ་བགོ་འགྲེམས་བྱས་ཡོད་པ་རེད། རྩ་བའི་ད་ལོ་ཙམ་མ་ཡིན་པར་འདས་པའི་ལོ་གསུམ་རིང་ལུགས་བསམ་མཉམ་འབྲེལ་གྱི་ངོས་ནས་ལུགས་བསམ་གཞིས་གྲོང་ཁག་དྲུག་ལ་ཧིན་སྒོར་འབུམ་བཅོ་བརྒྱད་ཙམ་བགོ་འགྲེམས་བྱེད་ཐུབ་པ་བྱུང་ཡོད་སྐོར། དེ་བཞིན་ཐེངས་འདིའི་ཚོགས་ཆེན་ཐོག་ལུགས་བསམ་མཉམ་འབྲེལ་ངོས་ནས་ཤས་བདག་མི་མང་༥༠ ལྷག་ལ་བྱ་དགའ་གསོལ་སྩོལ་ཡང་གནང་སྐོར་མཉམ་འབྲེལ་ཚོགས་གཙོ་པདྨ་བདེ་ལེགས་ཀྱིས་འགྲེལ་བརྗོད་གནང་སོང་།

དེ་བཞིན་ཚོགས་ཆེན་དེའི་ཐོག་སྦེལ་ཀོབ་ལུགས་ཟུང་བསམ་གྲུབ་གླིང་ས་གནས་འགོ་འཛིན་ཀརྨ་དགྲ་འདུལ་གྱིས་ཤས་བདག་མང་ཚོགས་ལ་མཉམ་འབྲེལ་གྱི་ལས་དོན་བྱེད་ཕྱོགས་དང་རྩིས་ཁྲར་དོ་སྣང་དགོས་སྐོར་སོགས་ལུགས་བསམ་མཉམ་འབྲེལ་གྱི་ཚོགས་ཆེན་དང་འབྲེལ་བའི་གསུང་བཤད་གནང་གྲུབ་པ་དང་། སྦེལ་ཀོབ་ས་གནས་བོད་རང་དབང་བདེན་པའི་ལས་འགུལ་ཚོགས་ཆུང་གི་ཚོགས་གཙོ་ཆུང་བདག་གིས་སྦེལ་ཀོབ་ལུགས་བསམ་མཉམ་འབྲེལ་དེ་ཚགས་ཚུད་བྱུང་བ་དེ་ནི་བོད་མི་རྒན་རབས་ཚོས་སྐུ་ལས་བསྐྱོན་པ་དང་། མཉམ་འབྲེལ་གྱི་འགན་འཛིན་ལྷན་ཚོགས་དང་དྲུང་ཆེ་རིམ་པས་ཕྱར་གྲུ་མཉམ་འདེགས་གནང་བས་གྲུབ་འབྲས་ཞིག་ཡིན་སྐོར་སོགས་གསུངས་སོང་།

དེ་ནས་ལུགས་བསམ་མཉམ་འབྲེལ་གྱི་དྲུང་ཆེ་ཚེ་དབང་རྣམ་རྒྱལ་དང་རྩིས་པ་ཉི་མ་སྒྲོལ་མ་གཉིས་ནས་རིམ་པས་ལུགས་བསམ་མཉམ་འབྲེལ་གྱི་ལོ་འཁོར་ལས་སྡོམས་དང་རྩིས་ཁྲ་བཅས་སྒྲོགས་སྦྱང་དང་གྲུབ་པ་དང་། ལུགས་བསམ་མཉམ་འབྲེལ་གྱི་ ༢༠༡༤་དང་༢༠༡༥ལོའི་སྔོན་རྩིས་བཀའ་ཁྲོལ་ཞུས་ཡོད་པ་བཅས་ཉིན་འདིའི་ལུགས་བསམ་ས་གནས་མཉམ་འབྲེལ་ཚོགས་ཆེན་རྒྱལ་ཁའི་ངང་མཇུག་ཡོངས་སུ་དྲིལ་ཡོད་པ་རེད།

དེ་ཡང་སྦེལ་ཀོབ་ལུགས་ཟུང་བསམ་གྲུབ་གླིང་བོད་མིའི་གཞི་རིམ་སོ་ནམས་མཉམ་འབྲེལ་དབུ་བརྙེས་ནས་འདི་ལོ་ལོ་༥༠ ཕྱིན་ཡོད་པ་དང་། ལུག་བསམ་མཉམ་འབྲེལ་དེ་ནི་ཐོག་མར་༡༩༦༤ ལོའི་ཟླ་བ་༣ ཚེས་༢༠ ཉིན་རྒྱ་གར་གཞུང་གི་ཁྲིམས་ཐོག་དེབ་བསྐྱལ་བྱས་པའི་ཚོགས་པ་ཞིག་ཡིན་ཞིང་མཉམ་འབྲེལ་དེའི་ནང་ཐོག་མར་ཤས་བདག་ཚོགས་མི་༣༡༧༠ ཡོད་པ་ལས་ད་ལྟའི་ཆར་ཤེས་བདག་ཚོགས་མི་གྲངས་༣༠༧༡ ཡོད་པ་རེད་འདུག མཉམ་འབྲེལ་གྱི་འགན་འཛིན་ལྷན་ཚོགས་ཀྱི་ནང་འཐུས་མི་༩ དང་ལས་བྱེད་ཁྱོན་བསྡོམས་༡༡༧ ཙམ་ཡོད་ཅིང་། མཉམ་འབྲེལ་དེའི་ཁྱབ་ཁོངས་སུ་མཉམ་འབྲེལ་དབུས་མ་དང་རུམ་བཟོ། འཕྲུལ་བཟོ་དང་འཕྲུལ་རྨོས།དེ་བཞིན་འཕྲུལ་ལམ་སྡེ་ཚན་སོགས་སྡེ་ཚན་ཁག་གཅིག་ཡོད་པ་རེད་འདུག །

ལྷོ་ཕྱོགས་གསར་འགོད་པས།