མ་ཨ་མའི་པང་དུ་བུ་ཞིག་འཁྲུངས།

མ་ཨ་མའི་པང་དུ་བུ་ཞིག་འཁྲུངས། །བུ་ཁྱོད་འདྲ་འཁྲུངས་ན་རེ་རེས་ཆོག།

ཀུན་དགའ་ཕྲིན་ལས།

བོད་པ་ཚང་ལ་སྲོལ་ངན་རྒྱུན་འབྱམས་སུ་སོང་བའི་གོམས་གཤིས་ཐབས་སྡུག་ཅན་ཞིག་ནི་རང་གི་སྤྱི་ཚོགས་ནང་དུ་མི་སྣ་བྱས་རྗེས་ཅན་ཞིག་བྱུང་ཚེ་ལྐོག་བཤད་དང་ངན་སྨྲས་སྐྱོན་བརྗོད་སོགས་ཀྱིས་འབུར་འཇོམས་བྱེད་རྒྱུ་ལ་ཧ་ཅང་དགའ། རྒྱུ་མཚན་དེས་བཀའ་དྲིན་རྗེས་དྲན་ཞུ་འོས་པའི་མི་སྣ་མང་པོ་ཞིག་ལ་བཟང་བྱས་ཀྱི་དྲིན་ལན་སྐྱོན་བརྗོད་ཀྱིས་འཇལ་ཏེ་སེམས་ཤུགས་དང་ནུས་སྟོབས་ལ་རྒོལ་རྡུང་བཏང་ནས་སྔོན་ཐོན་གྱི་མི་སྣ་ཤིན་ཏུ་ཉུང་བར་གྱུར།དེས་ན་ང་ཚོས་གཞན་གྱི་སྤྱི་ཚོགས་ལ་མིག་དཔེ་བྱས་དེ་རླབས་ཆེན་གཞན་ཕན་ཅན་གྱི་མི་སྣ་དག་ལ་བསྔགས་བརྗོད་དང་གཟེངས་བསྟོད་ཀྱིས་ཆེ་བ་འབུར་དུ་ཐོན་པར་བྱེད་དགོས། ཁོ་བོས་ཀྱང་རང་དང་ཧ་ཅང་ཁ་ཐག་ཉེ་བའི་མི་སྣ་ཞིག་གིས་ཡི་རངས་དང་གུས་བཀུར་ཞུ་འོས་ཀྱི་བྱ་བཞག་གང་ཞིག་བསྒྲུབས་པའི་གནད་དོན་ཞིག་འདིར་གླེང་ན་འདོད།

དེ་ནི་གོང་གི་པར་རིས་ནང་དུ་ཡོད་པའི་དཀོན་མཆོག་བསྟན་འཛིན་ཟེར་བའི་ཕོ་གསར་འདིའི་སྐོར་ཡིན་ལ་ཁོང་ཉིད་ད་ལྟར་ཨ་རི་ཁ་ལ་རལ་སྒྲོ་ལ་བཞུགས་ཡོད། སྤྱིར་ཁོང་གིས་ཉམ་ཐག་ལ་རོགས་སྐྱོར་དང་། སྤྱི་དོན་ལ་ཞབས་ཞུས། རང་རིགས་ལ་མཐུན་སྒྲིལ་སོགས་ཆེས་བཀུར་འོས་ཀྱི་བྱ་བ་ཇི་སྙེད་ཅིག་བསྒྲུབས་ཡོད་མོད་དེ་དག་ལས་རང་ཉིད་ཆེས་དགའ་བ་ནི་མི་གཞན་གྱིས་གཡོ་འོག་ཏུ་ཚུད་པའི་བོད་ཀྱི་བུ་མོ་གཉིས་ཨ་ཧྥི་རི་ཀའི་ནང་དུ་ཚེ་སྲོག་ལའང་དཀའ་ངལ་འཕྲད་ནས་ཅི་བྱ་གཏོལ་མེད་ཀྱི་གནས་སུ་གྱུར་སྐབས། ཁོང་གིས་ཉེན་ཁ་གང་ལའང་མ་འཛེམས་པར་བློས་བཏང་ཆེན་པོས་གནས་དེར་བསྐྱོད་ནས་བུ་མོ་གཉིས་ཀྱི་ཚེ་སྲོག་བསྐྱབས་གནང་བ་དེ་རེད།

ནུབ་ཕྱོགས་དག་ཞིང་དུ་བརྩི་བའི་བོད་པ་རྣམས་ནི་ཨ་རི་སོགས་ནུབ་ཕྱོགས་སུ་བསྐྱོད་རྒྱུའི་གོ་སྐབས་ཤིག་བྱུང་ན་རང་གི་ལུས་དང་ལང་ཚོ་རྒྱུ་ནོར་དཔལ་འབྱོར་ཆ་ཚང་དེའི་གཏའ་མ་འཇོག་རྒྱུ་ལ་ཐེ་ཚོམ་ཅི་ཡང་མེད།ནུབ་ཕྱོགས་སུ་བསྐྱོད་རྒྱུའི་གྲ་སྒྲིག་འོག་ཏུ་ཚེ་སྲོག་དང་ལང་ཚོ་དཔལ་འབྱོར་སོགས་ལ་གྱོང་གུད་ཕོག་མཁན་གྱི་བོད་རིགས་ན་གཞོན་ཧ་ཅང་མང་། འོན་ཏེ་ད་དུང་དཀའ་ངལ་དང་འཇིགས་སྣང་ཡོངས་ལ་མིག་བཙུམ་དེ་སྲོག་བསྡོས་ཀྱིས་ནུབ་ཕྱོགས་སུ་འགྲོ་རྒྱུ་ལ་འབད་བརྩོན་བྱེད་མཁན་དེ་ལས་ཀྱང་མང་། ཕྱོགས་གཞན་ཞིག་ནས་བསམ་བློ་བཏང་ན་དེ་དག་ནི་ཐབས་ཤེས་མེད་པའི་ཐབས་ཤེས་ཤིག་ཡིན་ངེས་ཏེ་རང་ཡུལ་དགྲ་ལག་ཏུ་ཤོར་ནས་རྒྱ་བལ་སོགས་སུ་འབྱོར་མཁན་དག་ལ་འཚོ་བའི་ཐོག་ནས་དཀའ་ངལ་ཧ་ཅང་ཆེ་བས་སོ།གང་ལྟར་ཁམས་སྡེ་དགེ་ནས་ཡིན་པའི་བུ་མོ་ཞིག་དང་སྟོད་དབུས་གཙང་ནས་ཡིན་པའི་བུ་མོ་ཞིག་དང་བཅས་བལ་བོད་ཀྱི་མི་ཁ་ཤས་བོད་རིགས་ཞབས་འདྲེན་པ་ཞིག་གིས་ཕྱི་རྒྱལ་གཏོང་རྒྱུའི་ཁ་ཆད་བྱས་ཏེ་ཧིན་སྒོར་འབུམ་ཕྲག་ཁ་ཤས་སྔོན་ལེན་བྱས་ནས་ཨ་ཧྥི་རི་ཀའི་ལུང་པ་ཆེས་སྐྱོ་བ་ཞིག་གི་ནང་དུ་བསྐྱལ་ནས་ལག་ཁྱེར་ཡང་ཁུར་ནས་བྲོས་སོང་འདུག བུ་མོ་གཉིས་ཀྱིས་བཤད་པ་ལྟར་ན་མི་དེས་ཐོག་མར་མི་བཞི་བཅུ་ཙམ་གཏོང་འཆར་བྱས་ཀྱང་དེ་དག་མང་ཆེ་བས་ཁོ་ལ་ཡིད་མ་ཆེས་ནས་ཕྱི་འཐེན་བྱས་སོང་འདུག འོན་ཏེ་ཁོང་གཉིས་ནས་བླ་མ་ཞིག་ལ་ཕྱག་མོ་ཞུས་པས་དཀའ་ངལ་ཆེན་པོ་ཞིག་འཕྲད་ངེས་ཀྱང་མཐར་སླེབས་ཐུབ་ས་རེད་ཅེས་གསུངས་པ་ལ་ཡིད་ཆེས་ཀྱིས་དཀའ་ངལ་ཁྱད་བསད་ཀྱིས་སོང་བ་ཡིན་ཟེར།མི་དེས་ཐོག་མར་ཨ་ཧྥི་རི་ཀ་བརྒྱུད་ནས་ཨ་རི་དང། ཁེ་ན་སྒྲ། ཡོ་རོབ་སོགས་སུ་བཏང་རྒྱུའི་ཁ་ཆད་བྱས་ནས་ཁོང་ཅག་ཁྲིད་དེ་ཨ་ཧྥི་རི་ཀའི་གནམ་ཐང་དུ་འབྱོར་སྐབས་དུག་སྦྲང་གི་ནད་དུག་འགོག་བྱེད་སྨན་ཁབ་རྒྱབ་དགོས་ཀྱི་ཡོད་ཀྱང་སྨན་རིན་ཨ་སྒོར་བརྒྱ་རེ་རེད་འདུག་པས་མི་དེས་སྨན་ཁབ་རྒྱབ་ཚར་བའི་འཛིན་བྱང་རྫུན་མ་རེ་ཁོང་ཅག་ཚང་མ་ལ་སྤྲད་ནས་སྨན་ཁབ་རྒྱབ་བཅུག་མི་འདུག

ཨ་ཧྥི་རི་ཀ་ལ་འབྱོར་ནས་བདུན་ཕྲག་ཁ་ཤས་རྗེས་སུ་བལ་ཡུལ་གྱི་ཕོ་གསར་ཞིག་དུག་སྦྲང་ནད་དུག་གིས་ཤི་བ་དང་ལྷན། ལམ་ཁྲིད་པ་བོད་པ་དེས་དངུལ་དང་ལག་ཁྱེར་ཆ་ཚང་ཁུར་ཏེ་བྲོས་བྱོལ་དུ་སོང་བར་བརྟེན་བལ་ཡུལ་ཕོ་གསར་གཞན་རྣམས་ཀྱིས་བོད་རིགས་བུ་མོ་གཉིས་ལ་ཞེ་ནད་འཁོན་འཛིན་བྱས་ཏེ་མི་སྤྱོད་ལས་འདས་པའི་རྡུང་རྡེག་བཏང་འདུག ད་དུང་ཁོ་ཚོས་མི་རིགས་ནག་པོའི་ཕོ་གསར་ཁ་ཤས་ཁྲིད་ཡོང་ནས་བུ་མོ་འདི་གཉིས་ལ་ག་རེ་བྱས་ནའང་ཆོག་རེད་ཅེས་བརྗོད་དེ་རྡུང་རྡེག་བྱས་ཤིང་བཙན་གཡེམ་བཏང་བཅུག་གྲབ་བྱེད་སྐབས་བུ་མོ་གཉིས་ཀྱིས་ནུས་ཤུགས་གང་ཡོད་ཀྱིས་འགོག་རྒོལ་བྱས་ཏེ་བྲོས་བྱོལ་ཡོང་སྐབས་ཅ་དངོས་དང་གྱོན་གོས་ཕལ་ཆེར་ལྷག་ཤོར་ཏེ་བུ་མོ་གཅིག་གི་སྟོད་ཐུང་དང་གཞན་དེས་ལྷམ་ཡང་གྱོན་རྒྱུ་རྙེད་མི་འདུག འོན་ཏེ་སྟབས་ལེགས་པ་ཞིག་ལ་ཁོང་གཉིས་བྲོས་ཐར་པ་མ་ཟད་བུ་མོ་གཅིག་གིས་ཁ་པར་ཡང་མཉམ་དུ་ཁུར་ཐུབ་པས་ཁོང་ཚོ་གཉིས་ཀྱི་ཛ་དྲག་གི་གནས་ཚུལ་དེ་ཉིད་དྲ་ཐོག་ནས་བརྡ་སྐྱེལ་བྱས་ཐུབ་པར་བརྟེན་སྡེ་དགེ་རྒྱལ་ཡོངས་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ལ་ཛ་དྲག་གི་སྙན་ཞུ་འབྱོར་འདུག 2014 ལོའི་ཕྱི་ཟླ་1 ནས་འགོ་བཙུགས་སྟེ། སྡེ་དགེ་རྒྱལ་ཡོངས་ལྷན་ཚོགས་ཀྱི་ཚོགས་གཙོ་འཆམ་ར་དྲི་མེད་རྒྱལ་མཚན་གྱིས་དབུ་ཁྲིད་པའི་ཡན་ལག་མྱུར་སྐྱོབ་ཁང་དུ་གཏོང་ཕོད་དང་ལྷག་བསམ་ཆེ་བའི་སྡེ་དགེ་བའི་ཡུལ་མི་རྣམས་ཀྱིས་རྒྱབ་སྐྱོར་དང་རོགས་རམ་གང་འཚམས་འབྱོར་ཡང་། ཆ་རྐྱེན་ཞན་ལ་ཉེན་ཁ་ཆེ་བའི་ཨ་ཧྥི་རི་ཀའི་ལུང་པ་སྐྱོ་བོ་དེ་ཡི་ནང་དུ་ཇི་ལྟར་བྱས་ནས་རོགས་སྐྱོར་རྣམས་འབྱོར་ཐུབ།བུ་མོ་གཉིས་ཀྱི་གནས་ཚུལ་དེ་དག་ཀྱང་བདེན་པ་ཡིན་མིན་གང་ཤེས་སྙམ་ནས་བསམ་བློ་བཏང་དགོས་པའི་ཚད་དུ་སླེབས།གནས་སྐབས་དཔལ་འབྱོར་གྱི་རོགས་སྐྱོར་ཙམ་དུ་མ་ཟད་མ་འོང་པར་བུ་མོ་གཉིས་ཀྱི་མདུན་ལམ་ལའང་བསམ་གཞིག་བྱེད་དགོས་དུས་སྡེ་དགེ་རྒྱལ་ཡོངས་ལྷན་ཚོགས་ཀྱི་ཡན་ལག་མྱུར་སྐྱོབ་ཁང་གིས་དེའི་ཐད་དུ་བགྲོ་གླེང་གྲོས་བསྡུར་མང་པོ་བྱས།མཐའ་མར་ཡན་ལག་མྱུར་སྐྱོབ་ཁང་ནས་འགྲོ་གྲོན་བཏང་རྒྱུ་བྱས་ཤིང་། ཡན་ལག་མྱུར་སྐྱོབ་ཁང་གི་ཚོགས་མི་དཀོན་མཆོག་བསྟན་འཛིན་གྱིས་གཏོང་ཕོད་དང་བློ་ཁོག་ཆེན་པོས་ཁོང་རང་ཉིད་ལུང་པ་དེ་ལ་དངོས་སུ་འགྲོ་རྒྱུའི་ཁས་ལེན་བྱས། ཁོང་གི་གཉེན་ཉེ་དང་བློ་དཀར་བ་རྣམས་ཀྱིས་དེ་ནི་ཉེན་ཁ་ཧ་ཅང་ཆེ་བའི་གནད་དོན་ཞིག་ཡིན་སྟབས་བསམ་བློ་ནན་པོ་བཏང་དགོས་པའི་དྲན་སྐུལ་དང་སློབ་གསོ་བྱས་འདུག ཁོང་ཅག་ལ་ཁག་ཅི་ཡོད་ཨ་ཧྥི་རི་ཀ་ནི་རྐུན་ཇག་མང་ལ་ནད་ངན་སྣ་ཚོགས་ཀྱིས་བཙེས་པའི་ལུང་པ་ཞིག་ཡིན་སྟབས་སེམས་ཁྲལ་ཡོད་དང་ཡོད། དཀོན་མཆོག་བསྟན་འཛིན་གྱིས་ཁོང་གིས་ཕྱོགས་གང་ཐད་ནས་གཟབ་ནན་དང་དོ་དན་བྱེད་ཆོག་པའི་རྒྱུ་མཚན་བཤད་དེ་དངོས་སུ་ཨ་ཧྥི་རི་ཀ་ལ་སོང་། ཁོང་ཉིད་ཨ་ཧྥི་རི་ཀ་ལ་འབྱོར་ནས་བུ་མོ་གཉིས་ཀྱི་གནས་ཚུལ་ངོ་མ་དེ་མཐོང་སྐབས་མིག་ཆུ་དབང་མེད་དུ་ཤོར་སོང་ཞེས་རྗེས་སུ་ཁོང་གིས་བཤད་ཀྱི་འདུག བུ་མོ་གཉིས་ལ་བལ་པོའི་ཕོ་གསར་ཁྱི་འདྲ་བ་དེ་དག་གིས་ལུས་པོ་གང་སར་སོ་རྒྱག་བྱས་པའི་རྗེས་ཤུལ་ནི་ཁྱི་ཡིས་རྨུགས་པ་ལྟར་རྨ་ཁ་མཛུག་གུ་ཤོང་ས་ཙམ་མང་པོས་ཁེངས་ཡོད་པ་མ་ཟད་བུ་མོ་གཅིག་གིས་སྟོད་ཐུང་ཐེབས་ཆག་ཅིག་རྗེས་སུ་གོན་རྒྱུ་རྙེད་ཡོད་ཀྱང་ནུ་མ་སོགས་ཆ་ཚང་མཐོང་བ་སོགས་མདོར་ན་མི་སྤྱོད་ལས་འདས་པའི་གདུག་རྩུབ་མྱོང་བའི་གནས་ཚུལ་དག་ནི་ལབ་ཀྱང་ཡིད་ཆེས་བྱེད་ཐུབ་པ་དཀའ་བའི་ཚུལ་དུ་འདུག་ཅེས་མིག་རྩར་མཆི་མས་ཁེངས་བཞིན་དཀོན་མཆོག་བསྟན་འཛིན་གྱིས་ང་ལ་དངོས་སུ་བཤད་བྱུང་། གང་ལྟར་དཀོན་མཆོག་བསྟན་འཛིན་གྱིས་བུ་མོ་གཉིས་ལ་མགྲོན་ཁང་ཞིག་གླ་རོགས་བྱས་ཏེ་ཟས་གོས་སོགས་གྲ་སྒྲིག་བྱས། ཨ་རི་ནེའུ་ཡོག་ཏུ་ཡོད་པའི་ཨ་ཐུབ་འཕྲིན་ལས་སྒྲོལ་མ་དང་ཁོ་ཀོ་པདྨ་གཉིས་ཀྱི་ངོ་ཤེས་བརྒྱུད་རྒྱལ་སྤྱིའི་རོགས་སྐྱོར་ཚོགས་པ་ཞིག་ལ་འབྲེལ་ལམ་བྱས་ཐུབ་པ་བརྟེན་དཀོན་མཆོག་བསྟན་འཛིན་དངོས་སུ་རྒྱལ་སྤྱི་རོགས་སྐྱོར་ཚོགས་པའི་ལས་ཁུངས་སུ་བཅར། སྤྱིར་དཀོན་མཆོག་བསྟན་འཛིན་དབྱིན་སྐད་ལ་བྱང་ཚད་དེ་ཙམ་མེད་ཀྱང་ཨུ་ཚུགས་ཀྱིས་བརྒྱུད་རིམ་ཆ་ཚང་ངོ་སྤྲོད་བྱས་པ་དང་མཉམ་དུ་རང་ཡུལ་བོར་བའི་བོད་པ་ཡོངས་ཀྱི་དཀའ་ངལ་དང་དམིགས་བསལ་བུ་མོ་གཉིས་ཀྱི་གནས་སྟངས་སོགས་ཡིད་ལ་འཁོར་ནས་སྐད་ཤུགས་ཆེན་པོས་ངུ་འབོད་བྱས།

རྒྱལ་སྤྱི་རོགས་རམ་ཚོགས་པས་ཁོང་གི་སྙིང་སྟོབས་དང་བློས་བཏང་ལ་བསྔགས་བརྗོད་དང་བུ་མོ་གཉིས་སྐྱབས་བཅོལ་གྱི་རོགས་རམ་བྱེད་རྒྱུ་ཁས་བླངས་བྱས་པས་དཀོན་མཆོག་བསྟན་འཛིན་གཞི་ནས་བློ་ལྷོད་ལ་བབས། ཉིན་ཤས་རིང་བུ་མོ་གཉིས་ལ་སྡོད་ཁང་གླ་བ་དང་།ཉེ་མཁོའི་བཅའ་དངོས་ཉོ་བ། ཟ་ཁང་དུ་ཁྲིད་པ་སོགས་ཀྱིས་མཐུན་འགྱུར་རོགས་རམ་གང་དགོས་བྱས་སྟེ་ཚེ་འདི་ཕྱི་གཉིས་ལ་བརྩི་རྒྱུ་ཡོད་པའི་རླབས་ཆེན་གྱི་བྱ་བ་དེ་ཉིད་ལེགས་གྲུབ་བྱུང་བའི་རྗེས་སུ་དཀོན་མཆོག་བསྟན་འཛིན་རྒྱལ་ཁའི་ངང་དུ་ཨ་རི་ལ་ལོག་ཕེབས། ཁོང་ཉིད་ས་གནས་དེའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཡིན་སྟབས་ལོ་འདིར་ས་གནས་དེར་༧གོང་ས་མཆོག་དང་༧ས་སྐྱ་གོང་མ་གཉིས་ཀར་ཕེབས་རྒྱུ་ཡིན་སྟབས་ཧ་ཅང་ཐུགས་བྲེལ་ངང་དུ་ལས་དོན་སྒྲུབ་ཀྱིན་བཞུགས་ཡོད། དེ་ལྟར་བུ་མོ་གཉིས་ཀྱི་ཆེད་དུ་སྡེ་དགེ་རྒྱལ་ཡོངས་ལྷ་ཚོགས་དབུས་སྤྱི་ཁྱབ་རྒྱུན་ལས་ཁང་བརྒྱུད་གཏོང་ཕོད་དང་ལྷག་བསམ་ཅན་གྱི་སྡེ་དགེ་བའི་ཡུལ་མི་རྣམས་ཀྱིས་ཞབས་འདེབས་ཧིན་སྒོར་འབུམ་ཕྲག་མང་པོས་འགྲོ་སོང་བཏང་བ་དང་། དེ་བཞིན་དཀོན་མཆོག་བསྟན་འཛིན་གྱིས་འགྲོ་སོང་དང་བློས་བཏང་སེམས་ཤུགས་སོགས་ཀྱིས་བཀའ་དྲིན་ལ་བརྟེན་བུ་མོ་གཉིས་ཀྱི་དམིགས་ཡུལ་དང་རེ་བ་ལྟར་གང་མགྱོགས་ཕྱི་རྒྱལ་ཡུལ་གྲུ་བཟང་ས་ཞིག་ཏུ་བདེ་འབྱོར་ཡོང་ངེས་འདུག་པས། ལས་དོན་འདི་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་རོགས་རམ་གནང་མཁན་ཡོངས་ལ་གུས་བརྩི་དང་ཡིད་རངས་ཞུ་ཆེད་གནས་ཚུལ་འདི་ཉིད་རང་འགུལ་གྱིས་ཡིག་ཐོག་ཏུ་ཕབས་པ་ཡིན། །