བདེན་པ་གཞིར་བཞག་ནས་ཤེས་ཡོན་ཡར་རྒྱས་སུ་གཏོང་རྒྱུ་གལ་ཆེན་རེད།

སུད་སི་དང་ལིཀ་ཏེན་སིཊ་ཡན་བོད་རིགས་མི་མང་གིས་ཅི་ལྟར་གསོལ་འདེབས་ཞུས་དོན་བཞིན། ༧གོང་ས་མཆོག་སུད་སིར་ཆིབས་བསྒྱུར་གྱིས་ཁུལ་དེའི་དད་ལྡན་མང་ཚོགས་ལ་གསུང་ཆོས་ཉིན་གཉིས་ཀྱིས་རིང་གནང་གི་འདུག

ཐེངས་འདིར་༧གོང་ས་མཆོག་སུད་སིར་ཆིབས་བསྒྱུར་གནང་བ་དང་། ཟླ་འདིའི་ཚེས་༧ ཞོགས་(hotel Les Trols Rols) ཚོགས་ཁང་ནང་དུ་གསར་འགོད་གསལ་བསྒྲགས་དང་འབྲེལ་གསར་འགོད་པའི་དྲི་བ་ཁག་ཅིག་ལ་ལན་འདེབས་གནང་ཡོད་པ་རེད།

སྐབས་དེར་གསར་ལམ་ཁག་འདྲ་མིན་ནས་གསར་འགོད་པ་སུམ་བཅུ་ཡས་མས་ཤིག་ཡོད་པ་དང་། ༧གོང་ས་མཆོག་གིས་“ངས་ནམ་རྒྱུན་གསར་འགོད་པར་བརྗོད་པ་གཅིག་མཚུངས་ཡིན། དེ་ནི་ང་ནི་འགྲོ་བ་མི་ཞིག་ཡིན་ཞེས་པ་དེ་ཡིན་ལ་འཛམ་གླིང་གི་གཅིག་གྱུར་གྱི་ལྟ་བ་ལྟར་བདེ་པ་གཞིར་བཞག་ནས་ཤེས་ཡོན་ཡར་རྒྱས་གཏོང་རྒྱུ་གལ་ཆེན་རེད་”ཅེས་གསུངས་སོང་།

གསར་འགོད་པ་ཞིག་གིས་ཡོ་རོབ་ཏུ་མཚོན་ན་ཤེས་ཡོན་ཡར་རྒྱས་སུ་ཕྱིན་པའི་གནས་ཤིག་ཡིན་པ་དང་། སྐུ་ཉིད་ཀྱིས་ཤེས་ཡོན་ཟེར་བ་དེ་གང་དུ་ངོས་འཛིན་གྱི་ཡོད་མེད་སྐོར་བཀའ་འདྲི་ཞུས་པའི་ལན་དུ། ༧གོང་ས་མཆོག་ཤེས་ཡོན་ཡར་རྒྱས་ཟེར་བ་དེ་ཕྱིའི་དངོས་པོ་ཡར་རྒྱས་ཀྱི་ཤེས་བྱ་ཡོན་ཏན་དང་། ནང་སེམས་ཀྱི་རྣམ་བཞག་གི་ཤེས་བྱ་ཡོན་ཏན་ཞེས་བཤད་དགོས་ལ། ནུབ་ཕྱོགས་སུ་ཕྱི་མ་དེར་ཅུང་གཙོ་བོ་ཡར་རྒྱས་གཏོང་དགོས་སྐོར་དང་། ནང་ཆོས་དང་ཚན་རིག་གི་འབྲེལ་བ་དེར་ནང་བཅུད་ཀྱི་རྟེན་འབྲེལ་གྱི་ཡན་ལག་གི་རྣམ་བཞག་དེར་དེང་གི་དུས་འདིར་ཚན་རིག་པས་ཀྱང་དོ་སྣང་ཆེར་འགྲོ་གི་ཡོད་པ་རེད་པ་རེད་ཅེས་གསུངས་སོང་།

ཡང་༧གོང་ས་མཆོག་གིས་གསར་འགོད་པར་མུ་མཐུད་དུ་གསུངས་དོན་“འཛམ་གླིང་གི་ཆོས་ལུགས་ཚང་མས་དམིགས་ཡུལ་གཙོ་བོ་ནི་འགྲོ་བ་མིའི་རིགས་ཀྱི་སྤྱི་ཚོགས་སུ་བྱམས་བརྩེ་གསོ་སྐྱོང་བྱེད་རྒྱུ་ལས་འཚེ་བ་གཏོང་རྒྱུ་དེ་མ་རེད་”ཆོས་གང་རུང་གི་མིང་སྤྱད་ནས་འཚེ་བ་བྱེད་པ་དེ་ནོར་འཁྲུལ་ཡིན་སྐོར་སོགས་གསུངས་སོང་།

མཐར་༧གོང་ས་མཆོག་གིས་ང་ཚོས་སེམས་དང་སྲོག་གི་ལས་འཆར་དེ་ད་ལྟ་ཡོ་རོབ་ཏུ་ཡང་འགོ་འཛུགས་རྩིས་ཡོད་ལ་སིད་སིར་ཡང་དེར་དོ་སྣང་ཡོད་པའི་རེ་བ་བྱེད་ཀྱིན་ཡོད་སྐོར་གསུངས་སོང་།

ཐེངས་འདིའི་གསུངས་ཆོས་འདིེར་ས་གནས་མི་འདྲ་མང་པོ་ནས་མི་རིགས་འདྲ་མིན་༨༠༠༠ ལྷག་ཅིག་འཛོམས་འདུག་ལ། གསུང་ཆོས་ཀྱི་འཛིན་བྱང་མ་རག་པའི་མི་མང་ཚོས་ཚོགས་ཁང་གི་ཕྱི་རོལ་ཏུ་༧གོང་ས་མཆོག་གི་ཆིབས་བསྒྱུར་བསྒུག་ནས་ཡོད་པ་རེད།

ཚོགས་ཁང་གི་ཕྱི་རོལ་གྱི་ལམ་ཟུར་ཞིག་ཏུ་བོད་པ་བཅུ་ཕྲག་ཅིག་དང་མི་རིགས་དཀར་པོ་ཁག་ཅིག་ལས་གྲུབ་པའི་དོལ་རྒྱལ་ཚོགས་པའི་ནམ་རྒྱུན་ལྟར་༧གོང་ས་མཆོག་ལ་མཚན་སྨད་ཞུ་བའི་འཕྲེད་དར་འདྲ་མིན་བཤམས་ནས་ངོ་རྒོལ་བྱེད་བཞིན་འདུག་ལ། བོད་ཀྱི་ཚོགས་པ་མང་པོས་དང་བླངས་སྒོས་བོད་ཀྱི་ཐུན་མིན་གྱི་གླུ་དང་ཞབས་བྲོ་སོགས་རྒྱུན་ཆད་མེད་པར་དོ་ཚོགས་ལ་ལན་འདེབས་ཀྱི་ཆེད་དུ་འཁྲབ་སྟོན་བྱེད་ཀྱི་འདུག རྒྱལ་སྤྱིའི་དང་བླངས་ཚོགས་པའི་དང་བླངས་ཞབས་ཞུ་བ་སུམ་བཅུ་ལྷག་གིས་ཐེངས་འདིའི་ཆིབས་བསྒྱུར་སྐབས་ཀྱི་༧གོང་ས་མཆོག་གི་སྐུའི་སྲུང་སྐྱོབ་བྱེད་པར་ཤུགས་སྣོན་ཆེད་དང་བླངས་ངང་ཚོགས་ཁང་གི་ཕྱི་རོལ་ཏུ་སྲུང་སྐྱོབ་བྱེད་ཀྱི་ཡོད་པ་རེད།

རྒྱལ་སྤྱིའི་དང་བླངས་ཚོགས་པ་ནི་བྱང་ཨ་རིར་རྟེན་གཞི་བྱས་ཡོད་པའི་དང་བླངས་ཚོགས་པ་ཞིག་རེད་འདུག་ལ། ད་ལྟའི་ཆར་འཛམ་གླིང་གང་སར་ཡོད་པའི་བོད་རིགས་མི་མང་གིས་དང་བླངས་སྒོས་༧གོང་ས་མཆོག་གང་དུ་ཕེབས་སྐབས་ཀྱི་སྐུའི་སྲུང་སྐྱོབ་ཡར་རྒྱས་གཏོང་ཆེད་བཙུགས་པའི་དང་བླངས་ཚོགས་པ་གསར་བ་ཞིག་རེད་འདུག ད་ལྟའི་ཆར་ཚོགས་པ་འདིར་འཛམ་གླིང་ཁྱོན་ཡོངས་སུ་ཚོགས་ཞུགས་པ་ཉིས་བརྒྱ་ལྷག་ཡོད་འདུག །
ས་གནས་གསར་འགོད་པ་ཀླུ་རྒྱལ།