ཤིང་རྟ་ལོ་འདི་ལྟར་རྫོགས་སོང་།

བོད་ཀྱི་བང་ཆེན་སྤྱིའི་འདོན་ཐེངས་ ༥༣༠ ཕྱི་ལོ་ ༢༠༡༥/༢/༡༨
བོད་ཤིང་རྟ་ལོ་དེ་རིང་ནས་རྫོགས་ཏེ་སང་ཉིན་བོད་ཤིང་མོ་ལུག་གི་ལོ་གསར་དུ་ཚེས་རན་པ་རེད། འདས་པའི་ལོ་གཅིག་རིང་གི་བོད་དོན་སྤྱི་དང་འབྲེལ་བའི་ཐོག་ནས་བཤད་ན་ཡག་ས་ནས་གྲུབ་འབྲས་གང་ཡང་མཐོང་རྒྱུ་མེད་པ་ལྟ་བུར་གྱུར་ཡོད། ལོ་འདིར་གནས་ཚུལ་ཤུགས་ཆེ་ཤོས་ནི་གདུག་འདྲེ་དོལ་རྒྱལ་རྗེས་འབྲངས་པ་ཚོས་རྒྱལ་སྤྱིའི་ཐོག་ལ་བོད་དོན་གྱི་སྔོ་ལོ་གནམ་ལ་འཕྱར་བ་དེ་ཡིན་པ་དང། དེ་དང་འབྲེལ་བའི་ཐོག་ལ་ཁ་གཏད་ཀྱི་ལས་འགུལ་སྤེལ་བ་ཡང་མང་པོ་བྱུང་སོང། གནད་དོན་འདི་ལ་བརྟེན་ནས་བོད་དོན་བདེན་མཐའ་གསལ་བར་ཕན་ཐོགས་གང་ཡང་མེད་པ་དང། མ་འོངས་པར་གཞིས་བྱེས་མཉམ་འཛོམས་ཡོང་བའི་དབང་དུ་བཏང་ཡང་རྩོད་རྙོག་དེ་མུ་མཐུད་དུ་འགྲོ་རྒྱུའི་ཉེན་ཁ་ཡང་ཆེན་པོ་ཡོད། གཞན་ལོ་འདིར་བོད་དོན་དང་འབྲེལ་བའི་ཐོག་ནས་རྒྱ་དམར་གཞུང་གི་ངོས་ནས་རྣམ་འགྱུར་མཁྲེགས་སུ་སོང་བ་ལས་བཟང་ཕྱོགས་ཀྱི་རྣམ་པ་གང་ཡང་བསྟན་མེད་པ་སོགས། བོད་ཀྱི་གནད་དོན་ཐག་གཅོད་དང་འབྲེལ་བའི་ཐོག་ནས་བཟང་ཕྱོགས་ཀྱི་གནས་ཚུལ་གལ་ཆེན་པོ་གང་ཡང་བྱུང་མེད།

བཙན་བྱོལ་སྤྱི་ཚོགས་ནང་བོད་པའི་གྲངས་འབོར་ཉུང་དུ་འགྲོ་བཞིན་པ་དང། ལྷག་པར་དུ་དྷ་རམ་ས་ལར་མཚོན་ན་དེང་སྐབས་བོད་པའི་གྲངས་འབོར་ནི་ཧ་ཅང་ཉུང་དུ་སོང་འདུག ཕྱིའི་ཡུལ་གྲུ་ཁག་ཏུ་འགྲོ་མཁན་མང་ནས་མང་དུ་འགྲོ་བཞིན་པ་དང། བོད་དུ་ཕྱིར་ལོག་བྱེད་མཁན་ཡང་མང་པོ་ཡོད་ཚོད་དུ་སྣང། མདོར་ན་དྷ་རམ་ས་ལ་དང། ལྡི་ལི་ལྟ་བུ་བོད་པ་ཁ་འཐོར་གནས་སྡོད་བྱེད་ཡུལ་ཁག་ཏུ་བོད་མི་ཉུང་ནས་ཉུང་དུ་འགྲོ་བཞིན་པས། གོང་གསལ་ས་གནས་དེ་དག་ཏུ་བོད་པའི་ལོ་གསར་དང་འབྲེལ་བའི་ཅ་ལག་བཙོང་མཁན་དག་གིས་ལོ་སྔོན་མ་རྣམས་དང་མི་འདྲ་བར་ཚོང་ཧ་ཅང་སྡུག་ཏུ་སོང་ཡོད་ཚུལ་བརྗོད་བཞིན་འདུག་ལ། ལྡི་ལིར་ཡོད་པའི་མགྲོན་ཁང་དག་ལ་མཚོན་ན་ད་ལྟའི་དུས་ནི་སྡོད་མཁན་མང་བས་ཁང་པ་མི་ཐོབ་པའི་དུས་ཚོད་ཡིན་ནའང། ད་ལོ་མགྲོན་ཁང་མི་རག་པའི་དཀའ་ངལ་མེད་པ་ལྟ་བུར་གྱུར་འདུག མང་པོ་ཞིག་གིས་སློབ་གྲྭ་ཁག་ཏུ་སློབ་ཕྲུག་ཉུང་དུ་འགྲོ་བཞིན་ཡོད་སྐོར་བཤད་བཞིན་ཡོད་ནའང། དོན་དུ་དགོན་པ་དང་སྤྱི་ཚོགས་གང་སར་བོད་པ་ཉུང་དུ་འགྲོ་བཞིན་ཡོད་པ་རེད།

སྣེ་ལེན་ཁང་གསར་རྒྱག་བྱས་ནས་མཐུན་རྐྱེན་ཡག་པོ་བསྐྲུན་ཡོད་ཀྱང། ད་ལྟའི་ཆར་བོད་ནས་གསར་དུ་ཡོང་མཁན་དཀོན་པ་དང། གསོག་སྒར་སློབ་གྲྭར་མཐུན་རྐྱེན་བཟང་དུ་བཏང་བ་མ་ཟད། སློབ་མའི་དུས་ཡུན་རིང་དུ་བཏང་ཡོད་ཀྱང་སློབ་ཕྲུག་མེད་པའི་དཀའ་ངལ་ནི་རང་བཞིན་གྱིས་ཡོད་པ་རེད། ཆབ་སྲིད་བཙོན་ཟུར་དང། འབྲེལ་ཆགས། འབྲེལ་ཡོད་བཅས་ཀྱི་ནང་མི་དང་བཅས་མང་པོ་ཞིག་ལོ་འདིར་ཨོ་སི་ཁྲོ་ལི་ཡར་བཏང་བས་ཀྱང་མི་འབོར་ཉུང་དུ་འགྲོ་བཞིན་ཡོད། ད་དུང་དྷ་སྟེང་དུ་ནང་སྲིད་ལས་ཁུངས་ཀྱི་གོ་སྒྲིག་འོག་ཆབ་སྲིད་བཙོན་ཟུར་རྣམས་ལ་སྡོད་ཤག་ཅིག་གསར་སྐྲུན་བྱེད་བཞིན་འདུག་ཀྱང། འདིར་སྡོད་མཁན་གྱི་ཆབ་སྲིད་བཙོན་ཟུར་ལྷག་ཡོད་མེད་ཀྱང་ཐེ་ཚོམ་དུ་གྱུར་ཡོད། དེ་བཞིན་གསར་འབྱོར་ལ་སྡོད་ཁང་གསར་སྐྲུན་བྱ་རྒྱུའི་ལས་འཆར་ཞིག་ཀྱང་ཡོད་ནའང། ད་ལྟའི་ཆར་གསར་འབྱོར་དཀོན་ནས་དཀོན་དུ་འགྲོ་བཞིན་པ་སོགས་གསར་འབྱོར་ཡོད་དུས་མཐུན་རྐྱེན་དཀོན་པ་དང། མཐུན་རྐྱེན་ཡོད་དུས་གསར་འབྱོར་དཀོན་པ་ལྟ་བུའི་གནས་སྟངས་ཤིག་ཀྱང་མིག་མདུན་དུ་ལྷགས་འདུག

སྤྱིར་མི་འབོར་མང་བ་ལས་སྤུས་ཀ་ཡག་དགོས་པའི་ལྟ་ཚུལ་འཛིན་མཁན་ཡོད་ནའང། ཤེས་ཡོན་དང་འཇོན་ཐང། དཔལ་འབྱོར་ཡོད་མཁན་ཚང་མ་ལུང་པ་གཞན་དུ་སྐྱབས་བཅོལ་གཉིས་པ་ཞིག་འཐོབ་ཆེད་དུ་འགྲོ་བ་དང། དེ་དག་ཀྱང་རིམ་པས་ཤེས་ཡོན་དང་འཇོན་ཐང་གང་ཡང་བེད་སྤྱོད་མེད་པར་འགྱུར་བཞིན་པ་འདི་ལ་བལྟས་ན། གྲངས་ཀ་ཉུང་བའི་དཀའ་ངལ་གཅིག་པུ་མ་ཡིན་པར་སྤུས་ཚད་ཀྱི་ཐོག་ནས་ཀྱང་རང་ཉིད་ཀྱི་རྐང་པའི་ཐོག་ཏུ་རང་ཉིད་ལངས་ཐུབ་པའི་མི་རབས་གསར་པ་ཞིག་དཀོན་པ་དང། རང་དོན་རྒྱབ་ཏུ་བསྐྱུར་ནས་སྤྱི་དོན་ཁུར་དུ་འཁྱེར་མཁན་གྱི་མི་སྣ་ནི་ཧ་ཅང་དཀོན། སྐད་རིགས་སྣ་ཚོགས་ལ་བརྟེན་ནས་བོད་པའི་ཆོས་དང་རིག་གཞུང་སྐད་ཡིག་ཡར་རྒྱས་གཏོང་ཐུབ་པར་བསམ་བློ་གཏོང་མཁན་ནི། ད་ལྟའི་ཆར་མེད་པའི་ཚོད་དུ་གྱུར་ཡོད་པ་དང། བོད་པའི་ཆོས་དང་རིག་གནས་ཀྱི་ཉིང་བཅུད་སྐད་ཡིག་གཞན་ལ་བསྒྱུར་ནས་རང་གི་ལྟོ་གོས་ཙམ་འཕུད་ཐབས་བྱེད་མཁན་ཅུང་ཙམ་རེ་ཡོད་པའང། ལྟོས་ས་ལྟོས་འཇོག་གིས་གལ་ཆེན་པོར་གྱུར་ཡོད།

མདོར་ན་ད་ཆ་བཙན་བྱོལ་བོད་པའི་སྤྱི་ཚོགས་ནང་མི་འབོར་ཉུང་དུ་འགྲོ་བཞིན་པའི་གནས་སྟངས་འདིའི་རྒྱབ་ལྗོངས་ལ་བསམ་བློ་གཏོང་དགོས་པ་དང། ཞིབ་འཇུག་བྱེད་དགོས་པ་ཧ་ཅང་གལ་ཆེན་པོར་གྱུར་ཡོད། རང་ཉིད་ཀྱི་འཚོ་གོས་ཆེད་ཁོ་ན་ཡིན་ན་དེ་ཙམ་ཉེན་ཁ་མི་ཆེ་ནའང། བསམ་བློ་མི་མཐུན་པ་དང་དམིགས་འདུན་མི་གཅིག་པའི་ཐོག་ནས་བཙན་བྱོལ་བོད་པའི་སྤྱི་ཚོགས་ཁ་འཐོར་དུ་འགྱུར་བཞིན་པ་ལྟ་བུའི་གནས་ཚུལ་ཡོད་ན། དེ་ནི་ཧ་ཅང་གི་ཉེན་ཁ་ཆེན་པོ་དང། ཕ་རོལ་དགྲ་ཕྱོགས་ལ་དགོས་པའི་གནས་ཚུལ་ཁོ་ནར་གྱུར་ཡོད། གནད་དོན་འདིའི་ཐོག་ལ་དབྱེ་ཞིབ་ནན་པོ་ཞིག་བྱེད་མ་ཐུབ་ན་མ་འོངས་པར་ཆབ་སྲིད་དང། དཔལ་འབྱོར། གཅིག་སྒྲིལ་སོགས་གང་ཐད་ནས་རེ་བ་རྒྱག་ས་གང་ཡང་མེད་པ་ཞིག་ཏུ་འགྱུར་ངེས་པ་དང། བོད་མི་རིགས་ཀྱི་ཆེད་དུ་རང་སྲོག་བློས་གཏོང་མཁན་དག་གི་དམིགས་འདུན་གྱི་ཟུར་ཙམ་ཡང་འགྲུབ་ཐབས་མེད་པས། བོད་པ་རྣམས་རྡོག་རྩ་གཅིག་སྒྲིལ་དགོས་པ་ལས་དབྱེ་འབྱེད་བྱེད་རྒྱུ་མང་དྲགས་ན་མ་འོངས་པར་བོད་སྤྱི་ལ་གྱོང་གུད་ཆེན་པོ་ཞིག་ཏུ་འགྱུར་ངེས་པ་རེད།།