ཆུ་སྒང་ལོ་རྒྱུས་ལ་གཞུང་འབྲེལ་གྱིས་ཆེ་མཐོང་དགོས་ངེས་ཤིག་རེད།

ཟླ་༢ ཚེས་༢༨ ཉིན་གྱི་ཕྱི་དྲོ་བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག དྷ་ས་མེག་གྷན་དུ་ཨ་རིའི་ཁོ་ལ་རཱ་དྷོ་སློབ་ཆེན་གྱི་འབུམ་རམ་པ་ཁེ་རཱོལ་གྱིས་ཆུ་སྒང་དམག་གི་སྐོར་གྱི་ལོ་རྒྱུས་དྲན་གསོ་ཞེས་པའི་བརྗོད་གཞིའི་ཐོག་གཏམ་བཤད་གནང་བ་དང་། ཁོང་གིས་ལོ་ཉི་ཤུའི་རིང་ཆུ་སྒང་སྐོར་ལ་ཞིབ་འཇུག་བྱས་ཏེ། ལོ་རྒྱུས་ལ་དྲན་གསོའི་སྐོར་གྱི་དཔེ་དེབ་ཅིག་ཀྱང་བཏོན་ཡོད་པ་རེད།

འབུམ་རམ་པ་ཁེ་རཱོལ་(Carole McGranahan) གྱིས་གཏམ་བཤད་གནང་སྐབས། ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་ཐོག་མར་ལྕག་ཚ་གྲི་གུ་ཐང་ནས་དབུ་བརྙེས་པ་དང་། དེ་ནས་ཨ་རིའི་གསང་བའི་ལས་ཁུངས་དང་འབྲེལ་བ་བྱས་ཏེ་སྦྱོང་བརྡར་སྤྲད་པ། བོད་དུ་སྦྱོང་བརྡར་ཡོད་པའི་མི་སྣ་མཁའ་མཆོང་བྱས་པའི་སྐོར་དང་། ༸གོང་ས་མཆོག་སྐྱབས་བཅོལ་དུ་ཕེབས་སྐབས། ཕེབས་ལམ་གཙང་སེལ་བྱས་པའི་སྐོར། བཙན་བྱོལ་དུ་འབྱོར་རྗེས་སྒྲིག་འཛུགས་དེའི་བྱུང་རིམ་དང་། གློ་དམག་སྒར་སྐོར། དེ་བཞིན་བོད་སོག་ལས་ཁུངས་དང་འབྲེལ་བའི་དོན་ཚན་གསུམ་གྱི་གླེང་རྙོག་བཅས་ཀྱི་སྐོར་ལ་གཏམ་བཤད་གནང་བ་དང་། དེ་བཞིན་དེ་སྔོན་དམག་གི་སྒྲིག་འཛུགས་དེ་ད་ཆ་སྤྱི་ཚོགས་བདེ་དོན་ཚོགས་པའི་ངོ་བོར་གནས་ཡོད་སྐོར་འགྲེལ་བརྗོད་གནང་སོང་།

འབུམ་རམ་པ་ཁེ་རཱོལ་གྱིས་ཆུ་སྒང་གི་དམག་འཐབ་སྐོར་དེ་བོད་ཀྱི་གཞུང་འབྲེལ་ལོ་རྒྱུས་ནང་འཁོད་དགོས་ངེས་ཤིག་ཡིན་ཡང་། དེ་ལ་དམིགས་བསལ་དོ་སྣང་མེད་པར་མངོན་གསལ་མ་ཡིན་པ་ཆགས་འགྲོ་ཡི་ཡོད་པའི་སྐོར་དང་། དེ་ལ་རྒྱུ་མཚན་བཞི་བགྲང་ཡོད་པ་རེད། དེ་ཡང་དང་པོ་སྐབས་དེར་ཆུ་སྒང་ལ་ཨ་རིའི་གསང་བའི་ལས་ཁུངས་ནས་རོགས་སྐྱོར་བྱས་པ་དེ་སྐབས་དེར་གསང་བ་ཡིན་པས་རྒྱུ་མཚན་ཡིན་སྐོར་དང་། གཉིས་པ་དེ་བོད་གཞུང་གི་དབུ་ཁྲིད་༧གོང་ས་མཆོག་ཡིན་པ་དང་། སྲིད་ཇུས་འཚེ་མེད་ཞི་བའི་ལམ་དུ་བསྐྱོད་ནས། དམག་འཐབ་སྐོར་ལ་དོ་སྣང་དང་མཐོང་ཆེན་བྱེད་མ་བདེ་བ་ཡིན་སྐོར། གསུམ་པ་དེ་རྒྱ་དམག་ཧ་ཅང་མང་བས་རྐྱེན་གྱིས། ཆུ་སྒང་གི་དམག་འཐབ་ལ་ཕམ་ཉེས་བྱུང་བར་བརྟེན། མཐོང་ཆེན་པོ་མེད་པ་ཆགས་པ་ཡིན་སྐོར། བཞི་པ་དེ་ཆུ་སྒང་དམག་མི་མང་ཆེ་བ་བོད་ཆོལ་ཁ་གསུམ་ནང་ནས་ཁམས་པ་ཡིན་པའི་རྒྱུ་མཚན་གྱིས་ཆེ་མཐོང་ཆེན་པོ་མ་རག་པ་ཡང་ཡིན་སྲིད་སྐོར་འགྲེལ་བརྗོད་བྱས་སོང་།

དེ་བཞིན་ཁོང་གིས་རྒྱལ་ཁབ་ཚང་མས་དམག་འཐབ་ལ་རྒྱལ་ཁ་ཐོབ་མིན་ལ་མ་ལྟོས་པར། གཞུང་འབྲེལ་ལོ་རྒྱུས་ནང་གལ་ཆེན་བྱས་ནས་འཁོད་ཀྱི་ཡོད་པ་རེད། ཆུ་སྒང་དབུ་བརྙེས་པའི་ཉིན་མོ་༡༩༥༨ ལོའི་ཟླ་༦ ཚེས་༡༦ ཉིན་དེ་ཧ་ཅང་གལ་གནད་ཡིན་སྐོར་དང་། དམག་འཐབ་ལོ་རྒྱུས་ནི་བོད་ཀྱི་ལོ་རྒྱུས་ནང་ཧ་ཅང་གལ་ཆེན་པོ་ཡིན་པས་གཞུང་འབྲེལ་ལོ་རྒྱུས་ནང་འཁོད་འོས་པ་དང་། སློབ་གྲྭ་ཁག་གི་སློབ་ཚན་ནང་དུ་ངེས་པར་དུ་འཁོད་དགོས་པ་ཞིག་ཡིན་ནའང་། ད་ལྟ་དེ་ལ་དམིགས་བསལ་གྱིས་མཐོང་ཆེན་བྱེད་ཀྱི་མེད་པ་དེ་ལོ་རྒྱུས་ཐོག་ནས་འགྲིག་གི་མེད་སྐོར། དེ་བཞིན་སྐབས་དེའི་དམག་འཐབ་བྱེད་མཁན་རྣམས་ལ་གཞུང་གིས་དམིགས་བསལ་ལྟ་རྟོགས་གང་ཡང་མེད་སྐོར་སོགས་འགྲེལ་བརྗོད་གནང་སོང་།

ཁོང་གི་བྲིས་པའི་ལོ་རྒྱུས་དེབ་ཀྱི་ནང་ཆུ་སྒང་གི་དམག་མི་མང་པོ་དང་། བོད་ཀྱི་རྩོམ་པ་པོ། ཨ་རིའི་སྐབས་དེའི་གསང་བའི་ལས་ཁུངས་ཀྱི་འབྲེལ་ཡོད་མི་སྣ་སོགས་ལ་བཅར་འདྲི་བྱས་པ་དང་། བོད་ནང་དུ་ཆེད་བསྐྱོད་ཀྱིས་ཞིབ་འཇུག་བྱས་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།