ཞིབ་འཇུག་པའི་མིག་ནང་གི་ཆུ་སྒང་།

བོད་ཀྱི་བང་ཆེན་སྤྱིའི་འདོན་ཐེངས་ ༥༣༢ ཕྱི་ལོ་ ༢༠༡༥/༣/༤
ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དེ་ཉིད་ཕྱི་ལོ་༡༩༥༨ ལོའི་ཕྱི་ཟླ་༦ ཚེས་༡༦ ཉིན་བོད་ལྷོ་ཁ་ལྕགས་ཚ་གྲུ་གུ་ཐང་དུ་བཙུགས་པ་དང་། དེའི་ནང་ཁམས་པའི་ཕོ་རྒོད་གང་མང་ཞིག་གིས་གཙོས་བོད་མི་མང་པོས་རང་སྲོག་བློས་གཏོང་གནང་ནས་བོད་རྒྱལ་ཁབ་ཀྱི་རང་དབང་རང་བཙན་སྲུང་ཐབས་སུ་འབད་བརྩོན་བྱས་ཡོད་ལ། ལྷོ་ལམ་གཙང་སེལ་བྱས་ནས་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་བོད་མི་འབུམ་ལ་ཉེ་བ་ཞིག་བཙན་བྱོལ་དུ་བདེ་འབྱོར་ཐུབ་པ་སོགས་བྱས་རྗེས་ཆེན་པོ་བཞག་ཡོད། བཙན་བྱོལ་དུ་འབྱོར་བའི་རྗེས་སུ་གློ་སྒྲིག་འཛུགས་དང། དང་སློབ་དམག་སྒར་ཨང་༢༢ པའང་རྨང་གཞི་འདི་ལ་བརྟེན་ནས་བྱུང་བ་ཞིག་ཡིན། བོད་ལ་ཛ་དྲག་གནས་སྟངས་ཤིན་ཏུ་ཆེ་བའི་སྐབས་སུ་མི་མང་དཀྱུས་མ་དག་གིས་དེ་ལྟ་བུའི་དམག་སྒར་ཞིག་འཛུགས་རྒྱུའི་བསམ་བློ་ཙམ་འཁོར་བ་དེ་ཡང་ཧ་ཅང་གཟི་བརྗིད་ཆེན་པོ་ཞིག་ཡིན་པ་དང། སྐབས་དེར་བོད་གཞུང་གི་དམག་སྒར་གྱིས་རྭ་སྟག་དོན་རྐྱེན་སྐབས་སེར་བྱེས་གྲྭ་ཚང་གི་ཐོག་ལ་དམག་གྲ་བསྒྲིགས་པ་བཞིན་རྒྱ་དམག་ལ་ཁ་གཏད་གཅོག་རྒྱུའི་གྲ་སྒྲིག་བྱས་མེད།

རྒྱལ་ཁབ་ཀྱི་ཆེད་དུ་རང་སྲོག་བློས་གཏོང་བྱེད་མཁན་རྣམས་ཀྱིས་བཙུགས་པའི་ཆུ་བཞི་སྒང་དྲུག་ལ་བཙན་བྱོལ་བོད་པའི་སྤྱི་ཚོགས་ནང་ལྟ་ཚུལ་མི་འདྲ་བ་ཞིག་ཡོད་ལ། དེ་ལྟ་བུའི་འབྱུང་རྐྱེན་ཡང་ཕྱོགས་གཅིག་ནས་ཁམས་པའི་མི་དེ་རང་གཤིས་ཚ་པོ་དང། ཁ་རི་ཁ་ཐུག་ཡིན་པ། དེ་བཞིན་དམག་འཁྲུགས་ཁྲོད་བློས་གཏོང་བྱས་པ་དེ་དག་གང་སར་གླེང་རྒྱུ་མང་དྲགས་པ་ལྟ་བུའི་ཐོག་ནས། བཙན་བྱོལ་བོད་གཞུང་གི་གནད་ཡོད་དཔོན་རིགས་ཤིག་གིས་ག་དུས་ཡིན་ཡང་ཆུ་བཞི་སྒང་དྲུག་ཅེས་གླེང་རྒྱུ་མང་དྲགས་ནས་ཡ་མ་ན་ཡི་འདུག་ཅེས་བརྗོད་པའི་ལོ་རྒྱུས་ལ་བལྟས་ན་ཤེས་ཐུབ་པ་ཞིག་རེད། ཕྱོགས་གཞན་ཞིག་ནས་རང་ཉིད་ཀྱི་བསམ་བློ་བཏང་ནས་འབད་བརྩོན་བྱེད་མཁན་ལ་བོད་པའི་སྤྱི་ཚོགས་ནང་ལྟ་ཕྱོགས་གཞན་པ་ཞིག་ཡོད་པའང་འདས་པའི་ལོ་རྒྱུས་མང་པོའི་ཐོག་ནས་ར་སྤྲོད་ཐུབ་པ་ཞིག་རེད། མདོར་ན་ཤར་ཉི་མའི་ལན་གྱིས་ཡིན་ནམ། བྱང་བྲག་ཕུག་གི་རྐྱེན་གྱིས་ཡིན། གང་ལྟར་ཡང་བཙན་བྱོལ་བོད་པའི་སྤྱི་ཚོགས་ནང་ཆུ་སྒང་སྒྲིག་འཛུགས་ལ་དེ་ཙམ་གྱི་ལྟ་ཚུལ་ཡག་པོ་ཞིག་མེད།

འོན་ཀྱང་རྒྱ་ནག་གོ་མིན་ཏང་གི་ཁྲི་དམག་བརྒྱད་བརྒྱ་ཕམ་པར་བཏང་བའི་རྒྱ་དམར་གུང་ཁྲན་ཏང་གི་དམག་དཔུང་ལ་དམག་འཐབ་ཀྱི་སྦྱོང་བརྡར་གང་ཡང་མེད་པའི་ཁམས་པ་ཁག་ཅིག་གིས། རང་བྲོ་ཁུག་མ་དང། རང་རྟ་སྐེ་བཟུང་བྱས་ནས་ཁ་གཏད་བཅགས་པའི་ལོ་རྒྱུས་དེ་དག་ལ་ཨ་རིས་གཙོས་ནུབ་ཕྱོགས་ཀྱི་ཞིབ་འཇུག་པ་མང་པོ་ཞིག་གིས་གདེང་འཇོག་དང་ཆེ་མཐོང་ཆེན་པོ་སྤྲད་བཞིན་པ་འདི་ཡང་དངོས་ཡོད་གནས་ཚུལ་ཞིག་ཏུ་གྱུར་ཡོད། དཔེར་ན་ཨ་རི་ནས་ཡིན་པའི་འབུམ་རམས་པ་ཁེ་རཱོལ་(Carole McGranahan) གྱིས་མི་ལོ་༢༠ ལྷག་ཆུ་བཞི་སྒང་དྲུག་གི་གནས་སྟངས་སྐོར་ལ་ཞིབ་འཇུག་བྱས་ནས་རྩོམ་དེབ་ཅིག་འགྲེམས་སྤེལ་བྱས་ཡོད་པ་དང། ཨ་རིའི་གསང་བའི་ལས་ཁུངས་ཀྱི་འབྲེལ་ཡོད་ཁག་ཅིག་གི་ངོས་ནས་ཀྱང་གནས་ཚུལ་དེའི་སྐོར་ལ་དཔེ་དེབ་འགྲེམས་སྤེལ་བྱས་ཡོད་པ་རེད། གནས་ཚུལ་འདི་དག་ནི་བོད་པ་ནང་ཁུལ་ཕྱོགས་ཞེན་གྱི་ལྟ་ཚུལ་གཙོར་འདོན་བྱས་པ་ཙམ་མ་ཡིན་པར། འབྲེལ་མེད་ཅིག་གིས་རྒྱུན་རིང་ཞིབ་འཇུག་བྱས་པའི་གྲུབ་དོན་ཡིན་པས་དོ་སྣང་བྱ་རིན་ཡོད་པ་ཞིག་ཏུ་གྱུར་ཡོད།

རྒྱལ་ཁབ་ཅིག་གི་ངོས་ནས་བདེ་འཇགས་སྲུང་སྐྱོབ་བྱེད་པ་ལ་དམག་དཔུང་མེད་ཐབས་མེད་པ་ཞིག་ཡིན་པ་དང། རང་དབང་རྩོད་ལེན་བྱེད་པའི་མི་རིགས་ཤིག་གི་ངོས་ནས་བཤད་ན་དེ་བས་ཀྱང་གལ་ཆེན་པོ་ཡིན་པ་བཤད་མི་དགོས་པ་རེད། བདག་ཉིན་ཆེན་པོ་གཱན་དྷི་ཡིས་འཚེ་མེད་ཞི་བའི་ཐོག་ནས་རྒྱ་གར་གྱི་རང་བཙན་རྩོད་ལེན་བྱེད་པར་ཤུགས་རྐྱེན་ཆེན་པོ་ཐེབས་ཡོད་ཀྱང། དེའི་ཞོར་དུ་དྲག་པོའི་ཐོག་ནས་ངོ་རྒོལ་བྱེད་མཁན་ཡང་གང་མང་ཞིག་བྱུང་ཡོད་པའི་སྟོབས་ཤུགས་ལ་བརྟེན་ནས་རྒྱ་གར་ལ་དབྱིན་ཇིའི་འོག་ནས་རང་བཙན་ཐོབ་ཐུབ་པ་རེད། དེ་དང་དེ་ལྟ་བུའི་ལོ་རྒྱུས་ཤིན་ཏུ་མང་པོ་ཡོད་པ་དང། ཆུ་སྒང་དྲག་པོའི་སྒྲིག་འཛུགས་ཀྱི་ངོས་ནས་ཀྱང་གོང་དུ་བརྗོད་པ་བཞིན་བོད་ཀྱི་གནས་སྟངས་ཛ་དྲག་པའི་སྐབས་སུ་ནུས་པ་དང་ཤུགས་རྐྱེན་ཆེན་པོ་ཐེབས་ཐུབ་ཡོད་པ་ནི་སྨྲོས་མི་དགོས་པ་ཞིག་ཡིན་པ་དང། གཞུང་སྒེར་གང་ཐད་ནས་དོ་སྣང་དང་རྗེས་དྲན་བྱེད་འོས་པའི་གནས་སྟངས་ཤིག་ཏུ་གྱུར་ཡོད་པ་ནི་ཕྱོགས་གང་ནས་བལྟས་ཀྱང་ཧ་ཅང་གསལ་པོ་རེད།

ད་ཆ་ཆུ་བཞི་སྒང་དྲུག་གི་སྒྲིག་འཛུགས་ཀྱི་ཤུལ་འཛིན་པ་ཞིག་ཡོད་ཀྱང། རྒྱ་གར་གཞུང་ལ་བདེ་དོན་ཚོགས་པའི་ངོ་བོར་དེབ་སྐྱེལ་བྱས་པའི་སྒྲིག་འཛུགས་ཤིག་ཡིན་པ་དང། རྒྱ་གར་དུ་སླེབས་རྗེས་ཕྱི་ནང་གི་རྒྱུ་རྐྱེན་གང་མང་ཞིག་ལ་བརྟེན་ནས་ནང་ཁུལ་དུ་རྩོད་རྙོག་འདྲ་མིན་བྱུང་ཡོད་ལ། མ་འོངས་པར་བཙན་བྱོལ་བོད་པའི་སྤྱི་ཚོགས་ནང་གི་སྒྲིག་འཛུགས་ཕལ་མོ་ཆེ་དང་གཅིག་མཚུངས་ལྟ་བུ་ལས། འདས་ཟིན་པའི་རྒྱལ་གཅེས་དཔའ་བོ་དག་གི་རྗེས་ཤུལ་འཛིན་ཐུབ་པའི་མི་རབས་གསར་པ་ཞིག་ཕལ་ཆེར་གསོ་སྐྱོང་ཐུབ་མེད་པ་དང། ཆུ་བཞི་སྒང་དྲུག་གི་དབུས་དང་ཡན་ལག་སྒྲིག་འཛུགས་ཁག་གི་ངོས་ནས་འདས་པའི་དུས་སུ་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་བཙུགས་ནས། རང་སྲོག་བློས་གཏོང་གིས་རྒྱ་དམར་གྱི་དམག་དཔུང་ལ་ཁག་གཏད་བཅགས་པའི་ལོ་རྒྱུས་དག་ལོ་རེ་བཞིན་མི་བརྗེད་པར་དྲན་གསོ་ཙམ་བྱེད་ཐུབ་པ་དང། སྒྲིག་འཛུགས་དེའི་ནང་དུ་ཞུགས་མྱོང་བའི་མི་རྒན་འཚོ་བའི་ཐོག་དཀའ་ངལ་ཡོད་པ་རྣམས་ལ་རོགས་རམ་ཙམ་རེ་བྱེད་རྒྱུ་ལས་གོ་སྐབས་དང་ནུས་པ་གཉིས་ཀ་ཕལ་ཆེར་མེད་པར་གྱུར་ཟིན།།