བཙན་བྱོལ་ནང་གི་མང་གཙོའི་ལམ་བུ།

བོད་ཀྱི་བང་ཆེན་སྤྱིའི་འདོན་ཐེངས་ ༥༠༥   ཕྱི་ལོ་ ༢༠༡༤/༩/༣
བཙན་བྱོལ་བོད་པའི་མང་གཙོ་དེ་ཉིད་འཛམ་གླིང་སྤྱི་ཡོངས་ཀྱི་མང་གཙོ་དང་མི་འདྲ་བར་དབུ་ཁྲིད་ཀྱིས་མི་མང་ལ་བཙན་ཐབས་སུ་བསྩལ་བའི་མང་གཙོ་ཞིག་ཏུ་གྱུར་ཡོད། མང་གཙོའི་ཆ་ལག་མང་པོ་ཞིག་ཚང་བར་དུས་ཚོད་ཀྱི་འཕེལ་འགྱུར་དང་སྤྱི་ཚོགས་ཀྱི་དགོས་མཁོ་དངོས་ལ་གཞིགས་ནས་གོམ་པ་མདུན་སྤོ་བྱས་པ་དག་ཀྱང། ༧གོང་ས་མཆོག་གིས་དུས་ནས་དུས་སུ་ལམ་སྟོན་དང་སྐུལ་འདེད་གནང་བ་ཁོ་ན་ལ་བརྟེན་ནས་བྱུང་ཡོད། བཙན་བྱོལ་བོད་པའི་སྤྱི་ཚོགས་ནང་མང་གཙོ་ལག་བསྟར་བྱེད་འགོ་བཙུགས་ནས་མི་ལོ་ཧྲིལ་པོ་༥༤ ཙམ་འདས་ཟིན་ཀྱང། ད་དུང་སྤྱི་ཚོགས་ནང་མང་གཙོ་དང་རང་དབང་ལ་དེ་ཙམ་གྱིས་དགའ་ཞེན་མེད་པ་དང། སྤྱི་ཚོགས་ཧྲིལ་པོའི་ཆ་ནས་མང་གཙོའི་གོ་རྟོགས་སྐྱོ་ཙམ་ཡིན་པའི་ཚོར་སྣང་ཞིག་རང་ཤུགས་ཀྱིས་སྤྲད་ཡོང་གི་འདུག ལྷག་པར་དུ་འཛམ་བུའི་གླིང་གི་མང་གཙོ་ཤུགས་ཆེ་ཤོས་ཀྱི་རྒྱལ་ཁབ་ཨ་རི་དང། རྒྱ་གར་ལྟ་བུར་བསྡུར་ཐབས་གཏན་ནས་མེད་པར་རྗེས་སུ་ལུས་ཡོད་ཀྱང། བོད་པའི་ཁྱད་ཆོས་ལྡན་པའི་མང་གཙོ་ཞེས་པ་དེ་འདི་ལྟ་བུ་ཞིག་ཏུ་ངོས་འཛིན་བྱེད་དགོས་པ་ལྟ་བུར་གྱུར་ཡོད།

སྤྱིར་མིའི་ལུང་པ་རུ་སྐྱབས་བཅོལ་བའི་སྤྱི་ཚོགས་ཤིག་ལ་རང་དབང་རང་བཙན་ལྡན་པའི་རྒྱལ་ཁབ་གཞན་ལྟ་བུ་ཞིག་ཡོང་ཐབས་མེད་པ་གསལ་པོ་ཡིན་ཡང། མང་གཙོ་དང་རང་དབང་གི་ཐོག་ལ་དགའ་ཞེན་དེ། རང་དབང་ཆ་ཚང་ཡོད་པ་ཞིག་ལས་ཀྱང་ཆེ་ཙམ་ཡོད་དགོས་པ་ལྟ་བུ་རེད། འོན་ཀྱང་དོན་དམ་པར་བཙན་བྱོལ་བོད་མི་ཕལ་མོ་ཆེའི་སེམས་ངོ་ན་སྤྱི་པའི་འདུ་ཤེས་ཆུང་ཞིང་རང་དོན་གཙོ་བོར་འཛིན་མཁན་མང་བ་ལྟ་བུ་ཞིག་ཏུ་འགྱུར་བཞིན་པ་དང། སྤྱི་པའི་ཆེད་དུ་ལྷག་བསམ་རྣམ་དག་གིས་སྐད་ཆ་བཤད་ན་རང་ཉིད་སྒེར་གྱི་ཐོག་ལ་དཀའ་ངལ་འཕྲད་པའི་རྒྱུ་རྐྱེན་མང་པོ་ཞིག་ཀྱང་སྤྱི་ཚོགས་ཀྱི་བར་གསེང་ཐམས་ཅད་དུ་ཡོད་སྟབས། མི་ཚང་མས་མགོ་གུག་གུག་དང་ལྕེ་སྣར་སྣར་ཁོ་ན་བྱེད་པ་ལས། གཞུང་གི་ལས་དོན་བྱེད་མཁན་དང། སྤྱི་ཚོགས་ཀྱི་སྣེ་ཁྲིད་མཁན་རྣམས་ཀྱི་སྐྱོན་དང་ནོར་འཁྲུལ་གྱི་རིགས་ལ་ཕན་སེམས་ཀྱི་ཐོག་ནས་མཛུབ་མོ་བཙུགས་ཏེ་སྐྱོན་བརྗོད་བྱེད་མཁན་ནི། ཉིན་མོའི་སྐར་མ་ལས་ཀྱང་དཀོན་པ་ལྟ་བུར་གྱུར་ཡོད།

༧གོང་ས་༧སྐྱབས་མགོན་ཆེན་པོ་མཆོག་གིས་ད་བར་བོད་པའི་སྤྱི་ཚོགས་ནང་ཐུགས་རེ་ཆེན་པོའི་ཐོག་ནས་ལམ་སྟོན་གནང་བ་གཙོ་བོ་གཅིག་ནི། མང་གཙོ་ལག་བསྟར་དགོས་པ་དེ་ཡིན་ནའང། དེའི་འོག་ནས་འགོ་ཁྲིད་མཁན་མང་པོ་ཞིག་གིས་སྤྱི་ཚོགས་ཀྱི་ག་ས་གང་དུ་༧གོང་ས་མཆོག་གི་བཀའ་དང་དགོངས་གཞི་རེད་ཅེས་མ་ཎི་འདོན་འདོན་བྱེད་བཞིན་ཡོད། སྤྱིར་༧གོང་ས་མཆོག་གི་དགོངས་གཞི་དང་ལམ་སྟོན་ཁག་ལ་ཡིད་ཆེས་བློ་གཏད་བྱེད་པ་ལྟ་བུའི་རྣམ་འགྱུར་དེ་དགའ་འོས་པ་ཞིག་ཡིན་ཡང། ཕྱོགས་གཅིག་ནས་རང་ཉིད་ཀྱི་ལས་དོན་མ་འགྲུབ་པའི་ཁག་འགེལ་སའམ། ལག་པ་འཕྱི་ས་ལྟ་བུར་གྱུར་མེད་དམ་བསམ་པ་དེ་ཡང་ངང་ངམ་ཤུགས་ཀྱིས་མཐོང་ཡོང་བ་ཞིག་དང། ད་དུང་དེ་ལས་ཚབས་ཆེ་ཙམ་བཤད་ན་༧གོང་ས་མཆོག་གི་བཀའ་དང་དགོངས་གཞི་ཞེས་པའི་སྐད་ཆ་དེ་སྤྱི་ཚོགས་ནང་ཟུར་ངོས་གང་སར་ཁུར་ཡོང་སྐབས། སྤྱི་ཚོགས་ནང་རང་ཉིད་ཀྱི་དམིགས་ཡུལ་གཞན་ཞིག་འགྲུབ་ཐུབ་པའི་ཆེད་དུ་བེད་སྤྱོད་བྱེད་མཁན་ཡང་མང་པོ་ཡོད་པ་ལྟ་བུར་མངོན།

བོད་མི་རིགས་སྤྱི་ཡོངས་ཀྱི་ངོས་ནས་༧གོང་ས་མཆོག་གི་བཀའ་གསུངས་ཇི་བཞིན་བསྒྲུབ་དགོས་པ་དེ་ཧ་ཅང་གལ་ཆེན་ཞིག་ཏུ་གྱུར་ཡོད་ཀྱང། བཀའ་དགོངས་དར་ཆ་རུ་འཕྱར་ནས་སྤྱི་དོན་འཐུས་ཤོར་དུ་གཏོང་བའི་མགོ་ཁྲིད་རིགས་ལ་མང་གཙོའི་གོམས་གཤིས་མེད་པ་མ་ཟད། སྤྱི་ཚོགས་ཀྱི་སྣེ་ཁྲིད་པ་བཟང་པོ་ཞིག་ཀྱང་གཏན་ནས་མིན། ༧གོང་ས་མཆོག་གི་བཀའ་དགོངས་སྒྲུབ་མཁན་ཡིན་པའི་འབོད་སྒྲ་དེ་ཁ་རུ་ཁུར་ནས་རང་ཉིད་ཀྱི་ཁེ་ཕན་དང་སྡུག་ཉེས་བསགས་པ་དག་ཀྱང། སྤྱི་ཚོགས་ནང་དག་ཐབས་བྱེད་མཁན་ཡང་ཡོད་པ་ཡོངས་གྲགས་ཆགས་ཡོད། དེ་ལ་བརྟེན་ནས་སྤྱི་ཚོགས་ནང་ནས་ཀྱང་བལྟ་སྟངས་མི་འདྲ་བ་ཞིག་ཡོད་པ་དེ་གསལ་པོ་རེད། དེར་བརྟེན་བཙན་བྱོལ་བོད་པའི་སྤྱི་ཚོགས་ནང་མང་གཙོ་དང་འདྲ་མཉམ་གྱི་ལྟ་བ་དེ་ད་དུང་མི་ལོ་ལྔ་བཅུ་ཙམ་གྱི་སྔོན་དང་བསྡུར་ནའང་འགྱུར་བ་ཆེན་པོ་ཞིག་སོང་ཡོད་དམ་སྙམ་པ་ལྟ་བུར་གྱུར་ཡོད།

མདོར་ན་བཙན་བྱོལ་བོད་པའི་སྤྱི་ཚོགས་ནང་མི་ཕལ་མོ་ཆེར་༧གོང་ས་མཆོག་ལ་གུས་བཀུར་དང་ཡིད་ཆེས་ཆེན་པོ་ཡོད་པ་ཚོད་དཔག་བྱེད་ཐུབ་ཀྱང། སྤྱི་ཚོགས་ནང་ང་ཚོ་༧གོང་ས་མཆོག་གི་བཀའ་བརྩི་མཁན་ཡིན་པ་དང། ཁོ་ཚོ་བཀའ་མི་བརྩི་མཁན་དག་ལ་ཁ་གཏད་གཅོག་དགོས་ཞེས་པའི་སྐད་ཆ་དེ་མང་གཙོའི་སྤྱི་ཚོགས་ཤིག་གི་གནས་བབས་ཐོག་ནས་བལྟས་ན་དེ་ཙམ་གྱི་ཚད་དང་ལྡན་པའི་ཚིག་ཅིག་མིན་ལ། སྐབས་རེ་ཚིག་དེ་དག་༧གོང་ས་མཆོག་ལ་སྐུར་འདེབས་ཀྱི་རྒྱུ་རུ་འགྱུར་སྲིད་མིན་ཡང་བསམ་བློ་ངེས་པར་དུ་གཏོང་དགོས་པ་ཞིག་རེད། ད་དུང་ཕྱོགས་གཅིག་ནས་བཙན་བྱོལ་བོད་པའི་སྤྱི་ཚོགས་ཀྱི་མང་གཙོ་དེ་གཙོ་ཆེ་ཤོས་མ་འོངས་པར་བོད་ནང་མང་གཙོ་ལག་བསྟར་གྱི་ཆེད་དུ་ཡིན་ཚུལ་གཞུང་འབྲེལ་ཐོག་ཡང་ཡང་བསྒྲགས་ཟིན་ཀྱང། མི་རིགས་ས་གནས་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆའི་ནང་རྒྱུན་འཁྱོངས་གསུམ་ཁས་ལེན་བྱས་ཟིན་པ་མ་ཟད། མང་གཙོའི་དགོས་འདུན་མེད་པ་དེ་ཡང་ཕྱི་གསལ་ནང་གསལ་ཆགས་ཟིན་པ་རེད། དེར་བརྟེན་མ་འོངས་པའི་སྦྱོང་བརྡར་ཆེད་རེ་བ་རྒྱག་ས་མེད་པ་དང། བཙན་བྱོལ་སྤྱི་ཚོགས་ནང་མང་གཙོའི་ཁེ་ཕན་ལ་གཙིགས་ཆེར་འཛིན་གྱི་མེད་དུས་བཙན་བྱོལ་བོད་པའི་སྤྱི་ཚོགས་ནང་གི་མང་གཙོ་དེ་ནམ་ཞིག་བེད་མེད་ལྟ་བུར་ཡང་འགྱུར་མི་སྲིད་པ་མ་རེད།།