བུད་མེད་སྒེར་ལངས་ཉིན་གཞོན་ལྷན་གྱི་བུད་མེད་ལས་འགུལ་བ་བཀག་ཉར།

ཟླ་འདིའི་ཚེས་ ༡༢ ཉིན་ནི་༡༩༥༩ ལོའི་ཟླ་ ༣ ཚེས་ ༡༢ ཉིན་བོད་ཀྱི་བེུད་རྣམས་ཀྱིས་བོད་རྒྱལ་ཁབ་ཀྱི་བདག་དབང་སྲུང་སྐྱོབ་ཆེད་རྒྱ་དམར་གྱི་དབང་ བསྒྱུར་དང་བཙན་གནོན་ལ་ངོ་རྒོལ་སྒེར་ལངས་བྱས་པའི་ཡིན་མོ་ཡིན་པས། དེའི་ཉིན་སྲུང་བརྩིའི་ཆེ་ལྡི་ལི་རོ་ཧི་ནི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་བུད་མེད་རྒྱུན་ལས་དང་ཚོགས་མི་རྣམས་ཀྱིས་རྒྱ་ནག་གཞུང་ཚབ་ཁང་མདུན་ལ་སྐད་འབོད་ཀྱི་ངོ་རྒོལ་ལས་འགུལ་སྤེལ་བཞིན་ཡོད་པ་རེད།

ད་ལོ་ཡང་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ནས་ཁང་དང་ལྡི་ལི་རོ་ཧི་ནི་ས་གནས་གཞོན་ལྷན་མཉམ་རུབ་ཀྱིས་ཕྱི་ཟླ་ ༣ ཚེས་ ༡༢ ཉིན་བེུད་སྒེར་ལངས་ཀྱི་ཉིན་མོ་དང་སྟབས་བསྟུན་ནས་རྒྱ་གར་རྒྱལ་ས་ལྡི་ལའི་རྒྱ་གར་རྒྱལ་སྒོ་ཆེན་པོའི་ (India Gate) མདུན་རང་ལུས་མེར་སྲེག་སྐོར་གྱི་རྔམ་སྟོན་ (flashmob) ལས་འགུལ་དང། གཏམ་བརྗོད། དེ་བཞིན་མར་མེའི་ཁྲོམ་སྐོར་བཅས་ཀྱི་ལས་འགུལ་སྤེལ་རྒྱུའི་འཆར་གཞིའི་འོག་གཞོན་སྐྱེས་རྣམས་རུ་ཁག་སོ་སོར་འགོས་ནས་སྐྱོད་ཡོད་པ་དང་། ལས་འགུལ་བ་རྣམས་ས་གནས་སུ་འབྱོར་སྐབས་རྒྱ་གར་ཉེན་རྟོགས་པ་ཧ་ཅང་མང་པོ་བཀྲམ་ཡོད་འདུག་པས། ལས་འགུལ་བ་རྣམས་ས་གནས་སུ་འབྱོར་མ་ཐག་རིམ་པས་འཛིན་བཟུང་བྱས་བཀག་ཉར་བྱས་ཡོད་པ་རེད།

རུ་ཁག་གཉིས་ཙམ་ཞིག་གིས་རྔམ་སྟོན་ལས་འགུལ་སྤེལ་ཐུབ་པ་བྱུང་བ་དང་། མཐར་ཉིན་དེའི་ཕྱི་དྲོར་དབུས་གཞོན་ལྷན་གྱི་སྤྱི་ཁྱབ་ཚོགས་གཙོ་བསྟན་འཛིན་འཇིགས་མེད་དང་། ཕྱི་འབྲེལ་འགན་འཛིན། དཔལ་འབྱོར་འགན་འཛིན་བཅས་ཀྱི་གཙོས་པའི་ལྡི་ལི་རོ་ཧི་ནི་ས་གནས་གཞོན་ལྷན་གྱི་ལས་འགུལ་བ་ཁྱོནམི་ ༤༠ འཛིན་བཟུང་བཀག་ཉར་བྱས་ཡོད་འདུག། དེའི་ནང་བེུད་ ༣༣ ཡོད་པ་དང་། ལས་འགུལ་བ་རྣམས་དེའི་ཉིན་གྱི་དགོངས་དྲོ་ཚོུད་དགུ་པ་ཙམ་ལ་གློད་གྲོལ་བཏང་ཡོད་འདུག །
གསར་འགོད་པ་ཆོས་ཉིད་འོད་ཟེར།